Genesis 24 - Labrador Inuttitut Heritage Bible

Isaaᴋ nulianikpoᴋ.

¹ Abraha inutoᴋaulerpoᴋ, jâringit unuktôtilugit Nâlekablo saimauserpâ (ilinganingine) tamaine.

² Abrahablo oᴋautivâ kivgarne, iglomine inutoᴋaunerpaujoᴋ, pimaklerteojoᴋ perᴋutinginik tamainik: Aggatit sibviamnut illikit,

³ Nâlegarlo ᴋilaub Gûdinga nunablo Gûdinga taivlugo angermarikkinga, ernimnut nuliaksarsinianginavit Kânaanib panninginit nunaᴋatigijamnit.

⁴ Inôlervigijamnulle illamnullo ingerganiarpotit, taikangat ernera Isaaᴋ nuliaksarsivlugo.

⁵ Kivgab oᴋautivâ: Arnable maligomangipanga nunamut mattomunga? ernît uttertitaksarivigô tagva nunamut ipsomunga ᴋemaktarnut?

⁶ Abrahab oᴋautivâ: Taimailitailigit, ernera uttertitaksaringilat taikunga!

⁷ Nâlekab, ᴋilaub Gûdingata atâtama iglunganit inûlervimnillo aulartingmanga oᴋarvigivlungalo angermariklungalo, oᴋarlune: Kinguvâksarnut nuna tamanna tunijomavara; tâpsoma engeline sivunikkut tillilârpâ, taikangallo ernera nuliaksarsilârpat.

⁸ Arnable maligomangipattit, uvamnut angernivit ilingavigijungnairniarpâtit. Kissiane ernera uttertitaksaringilat taikunga.

⁹ Tagva kivgab aggane illivait angajoᴋâme sibvianganut, angervigivlugolo tamattominga.

¹⁰ Kivgablo kamêlit tallimaujortut, angajoᴋâme kamêleᴋotingita illangit tiguvait aularlunelo, sunatuinaillo angajoᴋâme perᴋutingit naksarlugit. Aularlunelo ingergavoᴋ Mesopotâmiamut, Nahorib iglugasaksoanginut.

¹¹ Iglugasaksuillo sillatâne kamêlit aᴋopitipait imeᴋtarviub sannianut unnungmat, arnallo imeᴋtarvigivaktangat nalliutingmat;

¹² Oᴋarlunelo: Nâlegaᴋ, Gûdeojotit angajoᴋâmnut Abrahamut, tikkitautilaulangatôᴋ uvlome, nâpkigosungnîllo saᴋᴋertilauruk angajoᴋâmnut Abrahamut!

¹³ Takovarma imeᴋtarviub sanniane ᴋikkartunga, iglugasaksuillo inungita panningit annilârput imeᴋtariartorlutik.

¹⁴ Uigasuillo illanganut oᴋaleruma: Imeᴋtautit manileruk imertilungalo; — tâmnalo oᴋarpat: Imilaurit, kamêliᴋotitittauᴋ imertitsomagivakka; — tâmnale piksaurᴋojat kivgarnut Isaamut, taimaglo ᴋaujititauniarpunga, nâpkigosungnermik saᴋᴋertitsigavit angajoᴋâmnut.

¹⁵ Oᴋautsit makkoa nârᴋârnagit sulle, sunaubva, Rebekka ᴋailerpoᴋ, Betuelib panninga, Abrahab nukangata Nahorib nuliangata Milkab erningata panninga, imeᴋtautine tuimiklugo.

¹⁶ Inôsuktorlo tâmna kênatsiarikpoᴋ, uigasuk, angumiglo sulle aipaksarsilungitoᴋ. Tâmna attersârpoᴋ imeᴋtarvingmut, imeᴋtautinelo ullipkinamiuk, majoralerivoᴋ.

¹⁷ Kivgab tagva aᴋpangerdlune pâriartorpâ, oᴋarlunelo: Imeᴋtautingnit imigalâlangatôᴋ!

¹⁸ Oᴋautivâ: Imilaurit, Nâlegara! Imeᴋtautinelo aggangminut aᴋᴋartisârpâ imertilâllo.

¹⁹ Imertijarêramiuglo oᴋautivâ: Kamêleᴋotitittauᴋ imertitsomagivakka, imerugungnairtilugit.

²⁰ Tuavilunelo imeᴋtautine kovivâ imervinginut, ammalo imeᴋtarvingmut aᴋpangerlune imeᴋtarivoᴋ, kamêleᴋotingit tamaita imertilugit.

²¹ Angutiblo tattaminiarivâ nippeᴋaranele, ᴋaujijomavlune ingergarnine sullitsiartitaungmangât sullitsiartitaungimangâllônêt Nâlekamut.

²² Kamêlit ilûnatik imerêrmattale, angutib ᴋingarmiutaᴋ goldeojoᴋ, sêkelib ᴋoppangatut oᴋumaitigijoᴋ, tallermiutaglo magguk, sêkeletut goldetut tallimaujortotut oᴋumaitigijuk tiguvait,

²³ Oᴋarlunelo: Kia pannigivâtît? Oᴋautilaungatôᴋ! Atâtavit iglungane siniktarviᴋarungnaralloarᴋitâ?

²⁴ Oᴋautivâ: Betuelib pannigivânga, Milkab erningata, Nahorimut erniarilauᴋtangata.

²⁵ Amma oᴋautivâ: Ivît nerᴋiksallo amigalungilat uvaptingne, siniktarviksaᴋatsiarpoᴋtauᴋ.

²⁶ Tagva angutib okkungalerlune Nâlegaᴋ opigidlarpâ,

²⁷ Oᴋarlunelo: Nâlegaᴋ, angajoᴋâma Abrahab Gûdinga, nakorijaule, nâpkiningnine mikseᴋârninelo angajoᴋâmnut allalungimagik. Uvangalo Nâlekab nangmineᴋ tassiorpânga apᴋome angajoᴋâma nukangata iglunganut.

²⁸ Uigasuglo aᴋpangerpoᴋ, tamakkoalo tamaita oᴋautigijartorpait anâname iglungane.

²⁹ Rebekkalo anneᴋarpoᴋ Lâbanemik attelingmik. Lâbanelo aᴋpangerpoᴋ imeᴋtarvingmut, angumut tâpsomunga,

³⁰ Takogamigit ᴋingarmiutaᴋ tallermiutaglo najarme tallîgingne, tussalaitalo Rebekkab najarme oᴋausingit, unipkârmat: Imâk oᴋautivânga angutib taipsoma. Tikkinamiuglo angut imeᴋtarvingme ᴋikkartoᴋ, kamêlit sanniane, —

³¹ Oᴋautivâ: Itilaurit, saimausertaujotit Nâlekamut! Sôᴋ sillame ᴋikkarᴋêt? Iglo pijarêrpara, kamêliᴋotitillo iniksarsiormivlugit.

³² Tagva angut iglomut iterpoᴋ; kamêlillo anudjarpait, ivingnik nerᴋiksaniglo tunitjivigivlugit. Imermiglo ᴋaitsivut, tâpsoma ingergaᴋatingitalo ittigangita ubvartaujutiksanganik.

³³ Nerᴋiksallo sâmiutivait tâpsomunga. Tâmnale oᴋarpoᴋ: Nerrijomangilanga oᴋarᴋârnanga perᴋojaunimnik. Oᴋarporle: Attê, oᴋalerit!

³⁴ Oᴋarpoᴋ: Abrahab kivgarivânga.

³⁵ Nâlekablo angajoᴋâra saimausidlarpâ angijorortilugolo, saukaniglo, tuktuvangniglo, silberemiglo, goldemiglo, kivganiglo angutinik, kivganiglo arnanik, kamêliniglo, siuterᴋortojuniglo tunitjivigivlugo.

³⁶ Saralo, angajoᴋâma nulianga, ernermik ernilauᴋpoᴋ angajoᴋâmnut, inutoᴋaugalloarame. Tâpsomunga tunivait perᴋutine tamaita.

³⁷ Angajoᴋâmalo angerᴋovânga ingminut, oᴋarlune: Nuliaksarserᴋongilagit ernimnut Kânaanib paninginit nunaᴋatigijamnit:

³⁸ Atâtamale iglunganut illamnullo ingergavlutit ernera nuliaksarsijaksarivat.

³⁹ Uvangale angajoᴋâmnut oᴋarpunga: Arnable maligomangipanga, ᴋanoᴋ tagva?

⁴⁰ Oᴋautivânga: Nâlekab saᴋᴋâne arvertarpunga: tâpsoma engeline illaurᴋolârpâ illingnut ingergatsiartilutillo, nuliaksarsijungnarᴋovlutit ernimnut illamnit, atâtamalo iglunganit.

⁴¹ Angernivit ilingavigijungnairniarpâtit illamnut tikkikuvit; angerutiginagolo ᴋippilukpatit, angernivit ilingavigijungnairniarpâtit.

⁴² Uvlome imeᴋtarvingmut tikkinama, oᴋarpunga: Nâlegaᴋ, Gûdeojotit angajoᴋâmnut Abrahamut, tamaunga ingergarama, ingergarnera sullitsiartitauletôᴋ illingnut!

⁴³ Takovarma, tamâne imeᴋtarviub sanniane ᴋikkartunga, uigasungmiglo anijoᴋarpat imeᴋtariartortomik, oᴋarvigigupkolo: Imeᴋtautingnit imigalâlangatôᴋ!

⁴⁴ Taimnalo oᴋarpat: Imilaurit, kamêliᴋotitittauᴋ imertitsomagivakka; — tâmnaule arnaᴋ Nâlekab piksaurᴋojanga angajoᴋâma erninganut.

⁴⁵ Oᴋautsit makkoa nârᴋârnagit sulle ômatipkut, sunaubva, Rebekka ᴋaivoᴋ, imeᴋtautine tuimiklugo, atersalerporlo imeᴋtarvingmut imeᴋtarlune. Tagva oᴋautivara: Imertilaunga!

⁴⁶ Imeᴋtautinelo aᴋᴋartisârpâ tuiminit, oᴋarlunelo: Imilaurit, kamêliᴋotitittauᴋ imertitsomagivakka. Imeramalo kamêlittauᴋ imertinivait.

⁴⁷ Apperigapko oᴋarlunga: Kia pannigivâtît? — kiovânga: Betuelib pannigivânga, Milkab erningata, Nahoremut erniarilauᴋtangata. Tagva ᴋingarmiutaᴋ illivara ᴋinganganut, tallermiutaglo tallîgingnut.

⁴⁸ Okkungavlungalo Nâlegaᴋ opigivara, Nâlegaᴋ nakorivlugo, angajoᴋâma Abrahab Gûdingata tassiormanga apᴋome idluartome, angajoᴋâma ᴋatangutingata panninganik tiguserᴋovlunga erninganut.

⁴⁹ Illipsele saᴋᴋertitsijomagupse naglingermik nelâgornermiglo angajoᴋâmnut, ᴋaujitissinga. Pijomangikupselônêt, ᴋaujitilaungmisinga. Tallerpiublônêt saumiublônêt tungânut sâniarpunga tagva.

⁵⁰ Labaniblo Betueliblo kiovâk oᴋarlutiglo: Tamanna Nâlekamit pivoᴋ. Sumik oᴋarlunuk illingnut sapperpoguk, ajortomiglônêt ajungitomiglônêt.

⁵¹ Tagga, Rebekka sângnêpoᴋ, tiguleruk ingergalutillo, angajoᴋâvit erninganut nuliaksaurᴋovlugo, sorlo Nâlegaᴋ oᴋarmat.

⁵² Oᴋausingit tamakkoa Abrahab kivgangata tussaramigit, okkungalerpoᴋ nunamut Nâlekab sângane.

⁵³ Kivgablo perᴋutit goldeojut, perᴋutillo silbereojut, annorâllo, tiguvait Rebekkamullo tunivait. Anningale anânangalo pivianartunik tunitjivigigivak.

⁵⁴ Tagva nerrivlunelo imerpoᴋ angutit illagijane illagivlugit, siniktarpullo. Kaulermalle, makiput oᴋarporlo: Aularᴋolersingatôᴋ angajoᴋâmnut!

⁵⁵ Anningale anânangalo oᴋarpuk: Uigasuk uvlilerle sulle uvaptingne tallimaujortuniglônêt; kingorngane aulalârpotit.

⁵⁶ Oᴋautivaille: Agviarniarasinga, Nâlekab ingergarnera sullitsiartingmago. Aularᴋolersingatôᴋ, angajoᴋâmnut ingerarᴋovlunga.

⁵⁷ Oᴋarput: Uigasuk ᴋairᴋolavut tukisiniarlugo.

⁵⁸ Rebekkalo ᴋairᴋovât apperivlugolo: Angut una ingergaᴋatigijomaviûk? Kiovoᴋ: Ahaila, ingergaᴋatigijomavara.

⁵⁹ Tagva aularᴋovât Rebekka ᴋattangutitik pairijigijangalo, illautilugik Abrahab kivganganut ingergaᴋatinginullo.

⁶⁰ Rebekkalo pillorirᴋovât oᴋautilugo: ᴋattangutîk tausendeoᴋattartunik pijoᴋarle illingnit; kinguvâksavillo ômigijimik upkoaᴋsoangit perᴋutigiligit!

⁶¹ Tagva Rebekka parngnailerpoᴋ, kivgane illagivlugit; kamêlinullo ikkinamik, angut malikpât. Kivgable Rebekka tigugamiuk, aularpoᴋ.

⁶² Isaarle tikkisimavoᴋ “Omajub uvamnik takojub puilavinganit”; nunab seᴋerngane nunaᴋarame.

⁶³ Unnulermallo, pisukpoᴋ natername, issumaksarsiorlune. Arloramelo kamêlit tikkilertut takovait.

⁶⁴ Rebekkablo ârlorlune Isaaᴋ takogamiuk, kamêlemit aᴋᴋarsârpoᴋ.

⁶⁵ Kivgamullo oᴋarpoᴋ: Angut tâmna kinauvâ, pagrearluta naternakut pisuktoᴋ? Kivgaᴋ oᴋarpoᴋ: Tâmnauvoᴋ angajoᴋâra. Tagva kênailitaᴋ tiguvâ mattuvlunelo ingminik.

⁶⁶ Kivgablo Isaaᴋ pinialauᴋtaminik tamainik ᴋanoᴋ unipkârvigijartorpâ.

⁶⁷ Isaable Rebekka itertipâ anânagilauᴋtame Sarab tuppinganut, Rebekkalo illaliorlugo nuliarivâ nagligilâlo. Taimak Isaaᴋ manigortaulerpoᴋ anâname toᴋungata kingorngagut.