Genesis 23 - Labrador Inuttitut Heritage Bible

Sara toᴋolerpoᴋ iluvertauvlunelo.

¹ Sara inôvoᴋ jârinik 127nik, taimak unuktigijunik Sara jâreᴋarpoᴋ.

² Saralo toᴋolerpoᴋ Kiriat-Arbame, tagva Hebroneme, nuname Kânaaneme. Abrahab tagva Sara oggurijartorpâ ᴋeavlugolo.

³ Abrahalo nikovipoᴋ toᴋungajoᴋotime sânganit oᴋariartorlune Hêtib ᴋitornganginut, oᴋarlune:

⁴ Tujormiangovlunga akunapsingne nunaᴋarama, iluverviksamik perᴋuteᴋartisinga illipsingne, toᴋungajoᴋotiga sâmnêtoᴋ illijaurᴋovlugo.

⁵ Tagva Hêtib ᴋitorngangita Abraha kiovât oᴋarlutik:

⁶ Tussartigut, Nâlegaᴋ, Gûdemut nertornartitauvlutit akunaptingne, toᴋungajoᴋotit illijartoruk iluverviksapta ânanaunerpânganut, akunaptingne agviartoᴋarniangilaᴋ iluvermik toᴋungajoᴋotivit illijauviksanganik.

⁷ Tagva Abraha nikovilerpoᴋ okkovlunelo nunab inungita, Hêtib ᴋitorngangita, sângine.

⁸ Oᴋarvigilugillo oᴋarpoᴋ: Perᴋogapsinga, toᴋungajoᴋotiga sâmnêtoᴋ illijartorlugo, tussarsinga tagva, Efronelo, Zoarib erninga, ᴋenuvigijartorsiuk pivlunga,

⁹ Tunidjerᴋovlugo uvamnut ᴋairosuᴋutiminik Makpêlamik, perorsêvingme kiglinganêtomik. Akkinganik akkilertaumaringniarlune tuniliuk uvamnut, iluverviksarijomagapko akunapsingne.

¹⁰ Efronelo iksivavoᴋ Hêtib ᴋitorngangita akorngane. Tagva Efronib Hêtitereojub Abraha kiovâ, Hêtib ᴋitorngangit tussartilugit, ilûnaita iglugasaksuit itertarviksoangagut itertut, oᴋarlunelo:

¹¹ Aukak, Nâlegaᴋ, tussarlaungmingale! Perorsêvik illingnut tunivara, ᴋairosungalo illingnut tunivara, inôᴋatima takoanne tunivâkka illingnut; toᴋungajoᴋotit illijartoruk.

¹² Tagva Abraha okkovoᴋ nunab inungita sângine.

¹³ Efronemullo oᴋarpoᴋ, nunab inungit tussartilugit, oᴋarlunelo: Tussalaungatôᴋ! Perorsêviub akkinga tuniniartara, tigulauruk uvamnit, tagva toᴋungajoᴋotiga illijartorniarpara tagvunga.

¹⁴ Tagva Efronib Abraha kiovâ oᴋarvigivlugolo:

¹⁵ Nâlegaᴋ, tussalaungatôᴋ! Perorsêvik sêkeletut 400tut silberemik akkeᴋartoᴋ uvamnullo illingnullo sugalloarᴋâ? Toᴋungajoᴋotit illijartulauruk tagvunga!

¹⁶ Abrahablo Efrone nâlakpâ, silberemiglo ôktorvigivâ oᴋautigijanganik Hêtib ᴋitorngangit tussartilugit, silberemik sêkeletut 400tut, niuvertit tiguvaktangititut.

¹⁷ Taimak Efronib perorsêvinga Makpêlamêtoᴋ, Mamrib akkiane, perorsêvik ᴋairosungalo napârtullo ilûnatik perorsêvingmêtut kiglinganêtullo

¹⁸ Perᴋutautitaumarikput Abrahamut, Hêtib ᴋitorngangit, ilûnatik iglugasaksuit iterviksoangagut itertut, takonârtilugit.

¹⁹ Kingorngane Abrahab Sara nuliarne illijartorpâ perorsêviub ᴋairosunganut Makpêlamêtomut, Mamrib akkiane, tagva Hebroneme, nuname Kânaaneme.

²⁰ Taimak perorsêvik ᴋairosungalo Hêtib ᴋitornganginit pititaumarikput Abrahamut, iluverviksamik perᴋuteᴋarᴋovlugo.