Genesis 22 - Labrador Inuttitut Heritage Bible

Isaab tunergutauninga. Nahorib kinguvângit.

¹ Mattoma kingorngagut Gûdib Abraha ôktorpâ oᴋarvigivlugo: Abraha! Kiovâle: Mânêpunga.

² Oᴋautivâlo: Isaaᴋ ernituat, nagligijat tiguleruk ailutillo nunamut Moriamut, taikanelo ôtaksamik tunergutautileruk ᴋaᴋᴋat illangane, oᴋautiginiartamne illingnut.

³ Tagva Abraha uvlâkut makipoᴋ, siuterᴋortojoᴋotinelo iksivaviktârpâ, kivgâglo magguk erninelo Isaaᴋ illaurᴋovait, ikoalatiksaniglo ᴋetjiorpoᴋ, aularlunelo ingergavoᴋ taikunga, Gûdib oᴋautigijanganut tâpsomunga.

⁴ Uvlûk pingajuangne Abrahab ârlorlune aiviksane takovâ ᴋaningitomit.

⁵ Kivgângnelo oᴋautivak: Tamâne innilanganiarpotik siuterᴋortojorlo, uvanga nukapiarlo takpaunga aijomavoguk; tuksiarêrumnuk, tikkitsomârivoguk illiptingnut.

⁶ Abrahablo ᴋejuit tunergumut ôtaksamut tiguvait nangmartaurᴋovaillo ernerminut Isaamut, nangminerlo ikomamik savingmiglo aggangminut tigusivoᴋ; taimaidlutiglo pissuᴋatigêlerpuk.

⁷ Tagva Isaaᴋ atâtaminut Abrahamut oᴋarpoᴋ: Atâtak! Abrahab kiovâ: Ernîk, mânêpunga! oᴋarporlo: Tamadja ikoma ᴋejuillo, kissianele saugaᴋ ôtaksaᴋ naûk?

⁸ Abrahab kiovâ: Gûde saugarmik ôtaksamik tautugaᴋarniarpoᴋ, ernîk! Pissuᴋatigêkpuglo.

⁹ Takpaungalo Gûdib oᴋautigijanganut tikkinamik, Abraha tunerguserviliorpoᴋ, ᴋejuillo illiorᴋappait ᴋânganut, erninelo Isaaᴋ ᴋellaksorlugo illivâ tunerguservingmut, ᴋejuit ᴋânganut.

¹⁰ Issaklunelo savik tiguvâ, ernine toᴋotsomavlugo.

¹¹ Tagva Nâlekab engelingata ᴋilangmit ᴋaigarsugvigivâ oᴋarlunelo: Abraha! Abraha! Kiovâle: Mânêpunga.

¹² Oᴋautivâ: Nukapiaᴋ issaktailivlugo âniatiniarnago pît; mâna ᴋaujimagapkit Gûdemik sivôrajotit ernituat ivlerinago pivlunga.

¹³ Arlorlune tagva Abrahab takosârpâ tunuminêtoᴋ angusaloᴋ, nakjungagut nâsimajoᴋ ukpiganut; aivigivlugolo angusaloᴋ tiguvâ tunergutautipâlo ôtaksamik, ernime simertinga.

¹⁴ Abrahablo nuna tamanna atserarpâ: Nâlegaᴋ tautugaᴋarniarpoᴋ. Tamanna pivlugo sulle uvlome oᴋartoᴋarpakpoᴋ: Kaᴋᴋame, Nâlekab tautugaᴋarviane.

¹⁵ Nâlekablo engelingata aipanganik Abraha ᴋaigarsugvigivâ ᴋilangmit,

¹⁶ Oᴋarlunelo: Nangminimnik taivlunga angervikpunga, oᴋarpoᴋ Nâlegaᴋ, taimailioravit, ernituallo ivleringinangne,

¹⁷ Tamanna pivlugo saimauseromavagit, kinguvâksatillo unuksivalliatitsomavakka uvloritjatitut ᴋilangmêtutitut, siorᴋatitullo imarbiksûb sikjanganêtutitut. Kinguvâksavillo akkerartortimik upkoaᴋsoangit pigijomârpait.

¹⁸ Kinguvâksakkullo inôᴋatigêksuit ilûnamatsiatik nuname saimausertaujomârput, nippiga nâlagangne.

¹⁹ Tagva Abraha utterpoᴋ kivgângminut, aularlutiglo ingergaᴋatigêkput Bersêbamut; Abrahalo nunaᴋarpoᴋ Bersêbame.

²⁰ Pijokartut tamakkoa kingorngane Abraha oᴋautjaulerpoᴋ: Ahâk, Milkatauᴋ nukangnut Nahoremut ernernik ernivoᴋ.

²¹ Tamadja attingit: Uz angajukleᴋ, Buzelo nukanga, Kemuelelo, Aramib atâtanga,

²² Kêsedelo, Hazolo, Pildaselo, Jedlafelo, Betuelelo.

²³ Betuelible Rebekka pannigivâ. Sittamaujortut tâpkoa Milkab erniarivait Nahoremut, Abrahab nukanganut.

²⁴ Pannervgangalo Reumamik attelik ᴋitorngaᴋarpoᴋtauᴋ: Tebamik, Gahamik, Tahasemik, Makamiglo.