Genesis 20 - Labrador Inuttitut Heritage Bible

Abrahab nunaᴋarninga ilinganingalo Gêrareme.

¹ Abrahalo tagvangat aularpoᴋ nunamut seᴋinerdlermut, Kâdesiblo Suriblo akorngangne nunaᴋalerpoᴋ tujormiangovlune Gêrareme.

² Nulianelo Sara Abrahab najagivlugo oᴋautigingmago, tagva Abimêlegib, Gêrarib attaningata, tiliklerlune Sara aijaurᴋovâ.

³ Gûdible unnuarme Abimêlege sinnaktômanikut tikkipâ, oᴋautivlugolo: Ahâk, toᴋolertuksauvotit arnaᴋ tâmna tigujat pivlugo, angutib nuliaringmago.

⁴ Abimêlegible aktolunginamiuk, oᴋarpoᴋ: Nâlegaᴋ, inuit idluartut toᴋotsomagalloarᴋigît?

⁵ Najagivlugo oᴋalungilâᴋ uvamnut? Amma tâmna nangmineᴋ (arnaᴋ) oᴋarpoᴋ annigivlugo. Omatipkut nelâgôrlunga, aggapkullo passijaksaunanga, taimailiorpunga.

⁶ Gûdiblo sinnaktômanikut oᴋautivâ: Uvangatauᴋ ᴋaujimavagit, ômatikkut nelâgôrlutit taimailioravit. Tamanna pivlugo idluitulerᴋonak uvamnut aktuitailitipagit tâpsominga.

⁷ Mânale angutib nuliane pigiliuk, nelautaijôngmat, tuksiarutiniarpâtillo inôrᴋovlutit. Uttertitsomangikungnele, ᴋaujilerit toᴋolertuksaugavit pigijatillo ilûnatik.

⁸ Abimêlegelo tagva uvlâkut makiname, kivgarne tamaita ᴋairᴋovait tussartipaillo oᴋautsit tamakkoa tamaita oᴋautigivlugit; angutillo taipkoa sivôralerput angijomik.

⁹ Abimêlegible Abrahatauᴋ ᴋairᴋovâ oᴋautivlugo: Sôᴋ taimailiorvigivitigût? Sumik idluitulivingâ illingnut, taimaitoâlungmik ajortoᴋsoarmik uvamnut nâlegauvimnullo pititsijomagavit? piniaraksaungitunik piniarvigivarma.

¹⁰ Abimêlegiblo Abraha amma oᴋautivâ: Suna pitjutigiviûk, taimailiorlutit?

¹¹ Abraha oᴋarpoᴋ: Issumaᴋarama: Gûdemik sivôrajoᴋarpallaingilaᴋ nuname tamattomane; nuliara pivlugo toᴋoniarpânga.

¹² Nalâguttauᴋ najagigalloarpara, atâtama pannigingmago: anânamale pannigingilâ, uvangalo nuliarivara.

¹³ Gûdiblo aularᴋongmanga atâtama iglunganit, oᴋautivara: Imâk nagliginiarparma: annigivlunga oᴋautiginiarparma tikkiviksaptingne tamaine.

¹⁴ Tagva Abimêlegib saukat tuktuvaillo kivgallo angutit arnallo tiguvait tunivlugillo Abrahamut, nuliangalo Sara tâpsomunga uttertipâ.

¹⁵ Oᴋarporlo: Ahâk, nunaga atuinauvoᴋ illingnut, nunaᴋalerit nanelônêt nâmagijarnik.

¹⁶ Saramullo oᴋarpoᴋ: Ahâk, annît kênaujanik tausendenik tunitjivigivara; tamakkoninga ilûnatik illingnêtut ijingit mattusertauvut pivlutit; taimaglo passijaksautailivotit tamaita pivlugit.

¹⁷ Abrahable Gûde tuksiarvigingmago, tagva Gûdib Abimêlege nuliangalo kivgangillo arnat inûlivait, ernilerivullo.

¹⁸ Nâlekab arnat tamaita Abimêlegib iglunganêtut ernitailitingmagit Sara Abrahab nulianga pivlugo.