Genesis 2 - Labrador Inuttitut Heritage Bible

Sabbatemik, perorsêvingmiglo Edeneme, nuliarêngnerublo pingortitauninganik.

¹ Innerput tagva ᴋilaglo nunalo kattigmajoᴋsoaᴋotingillo tamaitaᴋsuit.

² Uvlullo sepangane Gûdib sorairpait sullinine pijane. Uvlullo sepangane merngoerserpoᴋ sullinerminit tamainit pijaminit.

³ Gûdiblo uvlut sepangat saimanartipâ ivsornaitilâlo, tamattomane merngoerserame sullinerminit tamainit pijaminit pingortitsivlune.

⁴ Tamadja ᴋilaublo nunablo pingortitauningak, pingortitaungmannik taipsomane, Gûdib Nâlekab nunalo ᴋilaglo sanangmagik.

⁵ Naternablo ukpigangit sunatuinait nunamêlungilat sulle, naternablo perortungit sunatuinait perorsimangilat sulle. Gûde Nâlegaᴋ sillaluktitsingimat sulle nuname, inuᴋangimallo sulle perorsêvilerijuksamik.

⁶ Kissiane pujoraᴋ ᴋangattarpoᴋ nunamit, ᴋausertilugo nunab ᴋânga ilûnât.

⁷ Gûdelo Nâlegaᴋ ivjomit, nunab ilanganit, inuliorpoᴋ, supporlugolo anernermik ômanartomik ᴋingâkikkut. Taimaglo inuk tarnelingorpoᴋ ômajomik.

⁸ Gudelo Nâlegaᴋ perorsêviliorpoᴋ Edeneme kangilerme, tagvungalo illivâ inuk sanajane.

⁹ Gûdiblo Nâlekab nuitipait nunamit napârtut sunatuinait takorannertut nerᴋiksarsivigijominartut, amma napârtoᴋ ômanartoᴋ perorsêviub ᴋerᴋane, napârtorlo illisimanartoᴋ ajungitomik ajortomiglo.

¹⁰ Kôksoarlo kôkpoᴋ Edenemit, perorsêvik ᴋausertilugo, tagvangallo avigame, avalerᴋoᴋarpoᴋ sittamanik.

¹¹ Kôb sivorliub attinga Pison: tâmna Havilab nunangata ilûnane avatâgut kôkpok. Tagvane goldeᴋarpoᴋ.

¹² Nunablo tâpsoma goldinga pivianartôvoᴋ; amma kutsoᴋ tippitsiariktoᴋ tagvane nagvartaugivoᴋ alligorlo tungujuangajoᴋ.

¹³ Kôb aipangata attinga Gihon; tâmna Kussib nunangata ilûnane avatâgut kôkpoᴋ.

¹⁴ Kôt pingajuata attinga Hidêkele; tâmna Assiriab kiglingagut kôkpoᴋ. Kôllo sittamangat tagva Farat.

¹⁵ Gûdiblo Nâlekab inuk tiguvâ, perorsêvingmut Edenemêtomut illivlugo, sanarᴋovlugo udjertorᴋovlugolo tâpsominga.

¹⁶ Gûdiblo Nâlekab inuk perᴋovâ oᴋautivlugo: Napârtunit perorsêvingmêtunit tamainit nerᴋiksarsiniarpotit,

¹⁷ Kissiane napârtomit ajungitomiglo ajortomiglo illisimanartomit nerᴋiksarsitailigit; uvlut nalliane ômangat nerriguvit, toᴋodlarniarpotit.

¹⁸ Gudelo Nâlegaᴋ oᴋarpoᴋ: Nâmangilaᴋ, inuk kissimetôngmat, ikajortiksalioromavara aipaksanganik.

¹⁹ Gûdib Nâlekab ivjomit saᴋᴋertinamigit ômajut tamaita naternamêtut, tingmitjallo tamaita ᴋilaub atânêtut, pitipait inungmut, nautsertoromavlune, ᴋanoᴋ tainiarmangâgit; ᴋanorlo inub ômajut tarnelît tamaita tainiarmagit, tagva attiksangit.

²⁰ Inublo atteᴋartipait nergjutit tamaita tingmitjallo tamaita ᴋilaub attânêtut, ômajullo tamaita naternamêtut, kissianele inuk ikajortiksarsingilaᴋ aipaksaminik.

²¹ Tagva Gûdib Nâlekab inuk sinidlartipâ, siniktilugolo tullimângita ilangat tiguvâ, inninga illijivigivlugo uviningmik.

²² Gûdiblo Nâlekab tullimâᴋ inungmit tigujane arnaliorpâ, âlâlo tâpsomunga.

²³ Tagva inuk oᴋarpoᴋ: Atso illâ, sauneᴋ saunima illanga, uviniglo uviningma illanga. Angutib aipanganik taijaksauvoᴋ una, angumit tigujaugame.

²⁴ Tamanna pivlugo angutib atâtane anânanelo ᴋemangniarpak, nuliane ungagivlugo, tâpkoalo magguk uvinioniarpuk atautsemik.

²⁵ Tamarmiglo ussingavuk, Adamelo nuliangalo, kangusugatiglo.