Genesis 19 - Labrador Inuttitut Heritage Bible

Sodomab asserortauninga. Lotib piulijauninga.

¹ Engelik magguk taipkoa Sodomamut tikkipuk unnulertilugo, Lotele Sodomab itertarviksoangane iksivavoᴋ. Lotiblo takogamigik, nikovipoᴋ pagreartorlugik, nunamut okkolerlune.

² Oᴋarlunelo: Okoᴋsê, Nâlegâkka, itilauritik kivgaptik iglunganut, siniktarlutik tagvane, ittikatiglo ubvarsigik, uvlârorlutik ingergalaurniarpotik apᴋutiksaptingnik. Tâpkoa oᴋarpuk: Aukagle, iglut akorngane unnuiniarpoguk.

³ Katsungaitomik tagva inadlarmagik, ᴋippilugungnairlutik iglunganut iterpuk. Nerᴋiksaliorpaglo niaᴋôjamiglo sêrnartoᴋangitomik igavoᴋ; nerrivuglo.

⁴ Sulle innilarᴋârtinagik, iglugasaksuit angutingita Sodomamiut iglo illumavât, inôsuktut inutoᴋaujullo, inuit ilûnamatsiatik.

⁵ Lotelo ᴋairᴋovât oᴋautivâllo: Naûk angutîk taipkoa unnuaᴋ illingnut itertûk? Uvaptingnut anitikik, ajortulivigijomagaptigik.

⁶ Lotiblo anivigivait pâmut, upkuaᴋ tunumigut parngnanairlugo,

⁷ Oᴋarlunelo: Idluituliniarasetôᴋ, ᴋattangutikka!

⁸ Takugitse, maggungnik panneᴋarpunga, angumut uvineᴋataulungitungnik sulle, tâpkoa anitilaulâkka illipsingnut, issumapsingniglo piniarviginiarpase; kissianele angutîk taipkoa aktorniarasigik, terliklutik iglumnut itermanik.

⁹ Tâpkoale oᴋarput: Pêrâlugit! Amma oᴋarivut: Atauseᴋ una tujormiaᴋ tikkitoᴋ attaniojuksauvâ? Attaeᴋ! piluartomik taipkonangat kapiasuktilaptigit. Angullo tâmna Lote, pagvisarpât angijomik. Opaklutiglo upkuaᴋ serᴋominasuarpât.

¹⁰ Tagva angutîk taipkoa issaklutik Lote amuarpâk ingmingnut iglomut, upkoarlo parngnanairpâk.

¹¹ Angutillo iglub pânganêtut tautungitipait, inôsuktullo inutoᴋaujullo, merngortulerput tagva, upkoaᴋ nagvârlugo ajuleramitsuk.

¹² Angutîglo Lotemut oᴋarpuk: Tamâne illaᴋaruvit ningaumiglônêt, ernerniglônêt, panningniglônêt, ilûnaita illagijatit iglugasaksoarne, tagvangat aulartikit!

¹³ Iglugasaksuit tamakkoa asserorniaraptigik, iglugasaksuit pivlugit Nâlekab sângane niplianeᴋ angijôngmat. Nâlekablo tilivâtiguk, asserortaurᴋovlugit.

¹⁴ Tagva Lote anilerpoᴋ ningauksângne oᴋarvigilugik pannîngme uiksâgik, oᴋarlune: Parngnailutik aularitik iglugasaksoarnit tamakkonangat, Nâlekab iglugasaksuit tamakkoa asserorniarmagit. Ningauksâkitale mittagasugivâk.

¹⁵ Kaulermalle, engelîk Lote tuaverᴋovâk oᴋautilâllo: Parngnaisâlerit, nuliallo pannîkiglo magguk tamânêtuk naksakkit, asserortaudlaroaravit iglugasaksoarmiut idluitulininginut.

¹⁶ Tuavilukatailingmalle, angutîk aggangitigut tiguvâk, Lote nuliangalo pannîgiglo, Nâlekab nâpkigingmago, aulartipâglo. Iglugasaksuille avatânêtilugo ᴋemakpâk.

¹⁷ Aulartimatikik, (Nâlegak) oᴋarpok: Inôtsit piulijartoruk; ᴋeviarniarnak noᴋanganiarnaktauᴋ tamattoma erᴋâne ilûnâne. Kaᴋᴋamut ᴋemâlerit nungutaurᴋonak.

¹⁸ Lotiblo oᴋautivâ: Taimainiarnangatôᴋ, Nâlegaᴋ.

¹⁹ Takuit, kivgat saimaneᴋsivoᴋ illingnut, mikkijôngitomiglo nâpkigivarma, inôsera piuligangne. Kaᴋᴋamulle ᴋemâjungnangilanga toᴋolidlaroarama, ᴋanoetomut tikkitauvlunga.

²⁰ Takuille, iglugasait ukkoa ᴋanitomêtut ᴋemâvigijomajakka, mikijôvullo. Tagvane piulijauviksarsilanga-ai? mikijôgalloarmatta, tarniga inôrᴋovlugo.

²¹ Oᴋautivâ tagva: Ahâk, tamattomanetauᴋ ᴋippilungilagit, pivlutit iglugasait oᴋautigijatit mumigomanginapkit.

²² Tuavigit piulijauviksarsilerillo tagvane, piniarungnanginama sumik, tikkerᴋârtinak tagvunga. Tamanna pivlugo iglugasait taipkoa Zoaremik taijauvut.

²³ Lotelo Zoaremut tikkisimangmat, seᴋineᴋ nuilerpoᴋ.

²⁴ Tagva Nâlegaᴋ orᴋsorumik ikomamiglo sillalurᴋojivoᴋ Sodomamut Gomorramullo ᴋilangmit Nâlekamit.

²⁵ Iglugasaksuillo tamakkoa erᴋâlo ilûnât mumikpait, iglugasaksuillo inungit tamaita, perorsiallo nunamêtut.

²⁶ (Lotible) nulianga ᴋeviarame, nappajungorpoᴋ tarrioᴋ.

²⁷ Abrahale uvlârarsôtilugo makipok, sângavigilauᴋtaminut Nâlekamut aivlune.

²⁸ Sodomab Gomorrablo nunangak takosarpâ, nunablo tamattoma erᴋâ ilûnât. Takosarmallo, sunaubva, isserluksoaᴋ nunamit ᴋangatarpoᴋ, sorlo kiaksautiâlub isserluksoanga.

²⁹ Gûdible iglugasaksuit nunab tamattoma erᴋânêtut asseroramigit, Abraha erᴋaumavâ, Lotelo aulartipâ iglugasaksoarnit mumiktaminit, Lotib nunagilauᴋtanginit.

³⁰ Lotelo Zoaremit majorarpoᴋ ᴋaᴋᴋarlo nunagilerpâ pannîngne illagivlugik, nunaᴋariaᴋ Zoareme sivôragigamiuk; ᴋairosungmelo inneᴋarput tâmnalo pannîgiglo tamarmik.

³¹ Angajukleᴋ tagva nukaminut oᴋarpoᴋ: Atâtavuk inutoᴋaulerpoᴋ, anguteᴋangilarlo nuname uvaptîngnut pijuksamik nunamiut illusingatut.

³² Attê, atâtavuk vainemik imertilaulavuk tutiklugolo, kinguvâksarserᴋovlunuk atâtaptingnit.

³³ Tagva atâtatik vainemik imertipâk unnuaᴋ tâmna. Angajukliublo atâtane aivigivâ tutiklugolo; tâmnalo inarninganiglônêt makininganiglônêt missigilungilaᴋ.

³⁴ Uvlângolermat, angajukleᴋ nukaminut oᴋarpoᴋ: Takuit, ikpaksaᴋ atâtaga tutilauᴋpara. Unnuaᴋ amma vainemik imertilaulavuk, igvit tagva aiviginiarpat tutiklugolo, kinguvâksarserᴋovlunuk atâtaptingnit.

³⁵ Tagva unnuaᴋ amma atâtatik vainemik imertipâk, nukardliublo tutigijartorpâ; tâmnalo inarninganiglônêt makininganiglônêt missigilungilaᴋ.

³⁶ Taimak Lotib pannîgik tamarmik singaititaulerpuk atâtamingnut.

³⁷ Angajuklerlo ernermik ernivoᴋ, tâmna atserarpâ Moabemik. Tâmna atâtagivât Moabiterit mânaulertut.

³⁸ Nukardlerlo amma ernermik ernivoᴋ, tâmna atserarpâ Ben-Amimik. Tâmna atâtagivât Amonib kinguvângita mânaulertut.