Genesis 18 - Labrador Inuttitut Heritage Bible

Nâkelab Abraha tikkipâ. Sodomab asseroraksauninga. Abrahab tuksiudjininga.

¹ Nalekablo saᴋᴋervigivâ Mamrib napârtungine, tupperme pângane iksivatilugo uvlub kiaᴋadlarningane.

² Arloramele takosarlunelo, sunaubva, angutit pingasut takolerpait timiminêtut. Takogamigille, aᴋpangerlune pagreartorpait tupperme pânganit, okkolerlunelo nunamut.

³ Oᴋarlunelo: Nâlegaᴋ, ijîngnut saimaneᴋsiguma, kivgat ᴋângerniarnago pît.

⁴ Imermik ᴋaitsijoᴋarniarpoᴋ, ittikaselo ubvarsigik, napârtublo attâne ᴋikkalauritsetôᴋ,

⁵ Niaᴋôjagalâmiglo ᴋaitsijomavunga nakoᴋsijutiksapsingnik, kingorngane ingergalaurniarpose, kivgase apᴋusaralloarapsiuk, Oᴋarput: Taimailiorit, sorlo oᴋaravit.

⁶ Abrahalo tuavidlune tuppermut iterpoᴋ Saramut, oᴋarlunelo: Tuavitit, sanaugaᴋ ôktûtitut pingasutut angitigijoᴋ imermut akkulugo, niaᴋôjaliorit.

⁷ Tuktuvangnullo Abraha aᴋpangerpoᴋ, nochatsiaᴋ piojoᴋ tiguvlugo kivgaminullo tunivlugo; tâpsomalo tuavidlune âᴋiksorpâ.

⁸ Imublo orᴋsuanik imutuinarmiglo nochavinermiglo âᴋiksortaminik ᴋaitsivlune manijivigivait, nerrilermattalo, sanniane nangerpoᴋ napârtub atâne.

⁹ Tagva oᴋautivât: Naûk nuliat Sara? Kiovait: Tamâne tuperme.

¹⁰ Oᴋarporlo (illangat): Achâgo amma tikkitsomârivunga illingnut nelliutikpat, tagva nuliat Sara erneᴋaromârpoᴋ. Tamanna Sarab tussarpâ tupiub tunuanêtub pânganêdlune.

¹¹ Tamarmiglo Abraha Saralo inutoᴋaulerpuk jâreᴋadlarlutik, Saralo arnat ilusinganik atorungnairpoᴋ.

¹² Taimaimat Sara ingminik ijorivoᴋ oᴋarlune: Ningiongogama, uviniᴋatigêmut ilingajuksaugalloarᴋêk, uigalo îtôngmat?

¹³ Tagva Nâlegaᴋ Abrahamut oᴋarpoᴋ: Sôᴋ Sarab tamanna ijûtigivaûk oᴋarlune: Ernijuksaugalloarᴋingâ ningiongojungâ?

¹⁴ Nâlekamut sumiglônêt ajornartoᴋarᴋâ? Achâgo nalliutikpat tikkitsomârivunga illingnut, tagva Sara erneᴋaromârpoᴋ.

¹⁵ Sarale misiarpoᴋ oᴋarlune: Ijolaungilanga! sivôragame. Oᴋarporle: Taimaingilaᴋ, ijorpotit.

¹⁶ Angutit tagva nikkoviput tagvangat, sângalerlutiglo Sodomamut; Abrahablo illagivait ᴋannijâromavlugit.

¹⁷ Tagva Nâlegaᴋ oᴋarpoᴋ: Abrahamut piniaromârtamnik angigutjijuksaugalloarᴋêk;

¹⁸ Abrahamit nunaᴋatigêksuit pitsartudlartut pijomârmatta, nunaᴋatigêksuillo nunamêtut ilûnamatsiatik tâpsomûna saimausertaujomârmatta?

¹⁹ Kaujimavara pitjutigilâllo, perᴋojerᴋovlugo ᴋitorngaminik inuᴋotiminiglo kinguvâksaminik, Nâlekab apᴋutiksaurᴋojanginik malerᴋovlugit, idluartulivlutik ajungitulivlutiglo, Nâlegaᴋ nâmaksititserᴋovlugo Abrahamut oᴋautigijaminik.

²⁰ Nâlegarlo oᴋarpoᴋ; Sodomamiut Gomorramiullo pivlugit niplianeᴋ angijôngmat, ajortuliningillo sugaluluadlarmatta,

²¹ Tamanna pivlugo aᴋᴋaromavunga takosarlugit, taimailiormaringmangâta, sorlo nipliaviogama, taimailiungimangâtalônêt; ᴋaujijomavara.

²² Angutîglo taipkoa sangulerpuk Sodomamut ailerlutik; Abrahalo noᴋangalerpoᴋ Nâlekab sângane.

²³ Abrahablo sâgiarpâ oᴋautivlugolo: Idluartut asserorᴋassiutijomavigît idluitut asserorlugit?

²⁴ Iglugasaksoarne tamakkonane idluartoᴋangikune 50nik! Tâpkoatauᴋ asseroromavigît iglugasaksuillo issumagijungnairomanagit idluartut 50 tagvanêtut pivlugit?

²⁵ Taimailiorneᴋ ajornarpoᴋ illingnut, idluartut toᴋoᴋassiutivlugit, idluitut (toᴋogungne), idluartut idluitutitut ilingatilugit. Ajornarpoᴋ taimak illingnut. Sillaᴋsoarmiunik erᴋartuijoᴋ idluangitomik illiortuksauvâ?

²⁶ Nâlegaᴋ oᴋarpoᴋ: Idluartut 50 nagvârupkit iglugasaksoarne Sodomame, tagva iglugasaksuit tamaita issumagijungnairomavakka tâpkoa pivlugit.

²⁷ Abrahab kiovlune oᴋautivâ: Takuit, oᴋarasuarpunga Nâlekamut, ivjotuinaugalloartunga argjatuinaugalloarlungalo:

²⁸ Idluartut tallimanik ikkinersaungikunik 50nit, tâpkoa tallimat pivlugit iglugasaksuit ilûnaita asseroromavigît? Oᴋautivâ: Tagvane 45 nagvârupkit, asseroromangilakka.

²⁹ Ammalo oᴋarvigivâ oᴋarlune: Tagvane 40 nagvârtaungikunik? Oᴋarporlo: 40 pivlugit taimailiorvigijomangilakka.

³⁰ Oᴋarporlo: Ningarniarnaktôk, Nâlegaᴋ, amma oᴋarmigama sulle: Tagvane 30 nagvârtaungikunik? Oᴋarporle: Tagvane 30 nagvârupkit taimailiorvigijomangilakka.

³¹ Oᴋarporlo: Takuit, illerasungnanga oᴋarasuarpunga Nâlekamut. Tagvane 20 nagvârtaungikunik? Kiovorle: 20 pivlugit asseroromangilakka.

³² Oᴋarporlo: Ningarniarnaktôᴋ, Nâlegaᴋ, tamattomanênaᴋ oᴋarniarama sulle: Tagvane tellimaujortut nagvârtaungikunik? Oᴋarporle: Tallimaujortut pivlugit asseroromangilakka.

³³ Tagva Nâlegaᴋ aularpoᴋ, Abrahamut oᴋarêrame, Abrahalo utterpoᴋ nunagijaminut.