Genesis 17 - Labrador Inuttitut Heritage Bible

Abralo Sarailo attertârpuk. Anguteojut kippijauvut. Isaaᴋ oᴋautigijauvoᴋ.

¹ Abrale jâreᴋarmat 99nik, Nâlekab saᴋᴋervigivâ oᴋautilâlo: Uvanga Gûdeovunga ajugaᴋangitoᴋ, saᴋᴋamne arvertarit pidlaraksausuerlutillo.

² Angernera pivlungalo pivlutillo nalautsititsomavara unuksivalliadlartitsomavlutillo.

³ Tagva Abra pâmakterpok. Gûdiblo sulle oᴋarvigivâ oᴋarlune:

⁴ Uvangaugama, angernera pivat, nunaᴋatigêksuillo unuktut atâtagijomârpâtit.

⁵ Kingorngane Abramik atteᴋarungnairtuksauvotit, attiksalle tagva Abraha, nunaᴋatigêksoarnut unuktunut atâtaurᴋogapkit.

⁶ Uvangalo unuksivalliadlartitsomavagit inugasaksoangortitsomavlutillo, illingnillo attanersuit pijomârput.

⁷ Angerneralo pivlunga pivlutillo kinguvâksatillo pivlugit, kingunikkut kingorlerêktut, nalautsititsomavara, angerneᴋ nâksaungitomut ilingajuksaᴋ, illingnut Gûdeojomavlunga kinguvâksarnullo kingunikkut.

⁸ Nunalo tujormiangovigijat, nuna Kânaane ilûnât, illingnut tunijomârpara kinguvâksarnullo kingunikkut, perᴋutautsainarᴋovlugo (tâpkonunga), Gûdigijomârpângalo.

⁹ Gûdelo Abrahamut oᴋarpoᴋ: Igville perᴋojara nâlegaksarivat, igvillo kinguvâksavillo kingunikkut kingorlerêktut.

¹⁰ Perᴋojarale nâlagaksarijase pivlunga pivluselo, kingunikkullo kinguvâksatit pivlugit, imaipoᴋ: Anguteojut ilûnatik akunapsingne kippijaksauvut.

¹¹ Uvinipse amingata nuvua kippijaksarivase. Tamadja nallunaikutaksaᴋ, illipsingnut angerama.

¹² Angutearsuit nalliat uvloᴋarpat sittamaujortunik, kippijaksarivase illipsingne kingorlerêngnipsingne; taimaktauᴋ kivgat iglungne inôlersimajut kênaujanullo takorngartanit sunatuinarnit pissiarijaumajut, illapsingnit pingitut (kippijaujariaᴋarput).

¹³ Ilûnatik kippijaksauvut iglungne inôlersimajut kênaujanullo pissiarijaumajut; uvinipsingne angernera saᴋᴋertuksauvoᴋ, angerneᴋ nâksaungitomut ilingajuksaᴋ.

¹⁴ Angullo kippimaneᴋangitoᴋ kippijaungipat uviningme amingata nuvuagut tâpsoma tarninga pêjartaujomârpoᴋ inôᴋatiminit, angernera tappagingmago.

¹⁵ Gudelo Abrahamut amma oᴋarivoᴋ: Sarai nuliat Saraimik taijaksarijungnairpat, Sarale tagva attiksanga.

¹⁶ Pitsartutitsomagapko, tâpsomangat ernermik tunitjivigijomârpagit; pitsartutitsomagapko, inugasaksoangoromârpoᴋ, nunaᴋatigêksuillo attaningit tâpsomangat pijomârput.

¹⁷ Tagva Abraha pâmakterpoᴋ ᴋungalerlunelo, ômamigullo oᴋarpoᴋ: Angut 100nik jâreᴋartoᴋ ernertârtuksaugalloarᴋâ? Saralo 90nik jâreᴋartoᴋ ernijuksaugalloarᴋâ?

¹⁸ Abrahalo Gûdemut oᴋarpoᴋ: Kanoᴋtôᴋ Ismaêle inôle sângne!

¹⁹ Tagva Gûde oᴋarpoᴋ: Ahammarik, Sara nuliat ernermik ernijuksauvoᴋ illingnut, taimna Isaamik atseraraksarivat, angerneralo tâpsomunga nalautsititsomavara, angerneᴋ nâksaungitomut ilingajuksaᴋ, kinguvâksanginullo kingorngagut pijuksanut.

²⁰ Ismaêlelo pivlugo tussarivagittauᴋ: Ahâk, pitsartutipara kinguvâksatâᴋattartitsomavaralo unuksivalliadlartitsomavlugolo. Attanernik 12nik ernertâromârpoᴋ inugasaksoangortitsomavaralo.

²¹ Angernerale nalautsititsomavara Isaamut, Sârab erniarijomârtanganut illingunt achâgo nalliutome piviksaujome.

²² Oᴋarvigijungnairamiuk, Gûde Abrahamit ᴋongmuarpoᴋ.

²³ Tagva Abrahab tiguvâ ernine Ismaêle kivganelo tamaita inôlersimajut iglumine, tamaitalo kênaujaminut pissiarijane, Abrahab inuᴋotingit angutiojut tamaita, uviningitalo amingata nuvuatigut kippivait uvlorme taipsomane, sorlo Gûdib oᴋautingmago.

²⁴ Abrahalo jâreᴋarpoᴋ 99nik, uviningata amingata nuvua kippijaungmat.

²⁵ Ismaêlelo erninga jâreᴋarpoᴋ 13nanik, uviningata amingata nuvua kippijaungmat.

²⁶ Uvlorme atausênarme kippijauvuk Abrahalo erningalo Ismaêle.

²⁷ Inuᴋotingillo anguteojut ilûnatik iglungane inôlersimajut pissiarijaumajullo takorngartanit kênaujanut kippijaugivut illagivlugo.