Genesis 16 - Labrador Inuttitut Heritage Bible

Ismaêle inôlertoᴋ.

¹ Sarai Abrab nulianga ernilungilaᴋ tâpsomunga; arnarle Egiptenemioᴋ kivgarivâ, Hâgaremik attelik.

² Saraiblo Abra oᴋautivâ; Takuit, Nâlekab parngnanairpânga ernitailivlunga: kivgara uviniᴋatigiung-ai? imaᴋâ tâpsomûna ᴋitorngaᴋartitaujomârpunga. Abrablo Saraib nippinga nâlakpâ.

³ Tagva Saraib, Abrab nuliangata, tiguvâ Hâgare Egiptenemioᴋ taimna kivgarne, tunivâlo Abramut uiminut, nuliarijaurᴋovlugo tâpsomunga; jârit tallimaujortut nâvlugit nunaᴋaramik nuname Kânaaneme.

⁴ Hâgarelo uviniᴋatigingmago singailerpoᴋ. Tâpsomale, singaidlune nalojungnairame, angajoᴋâne nachogilerpâ.

⁵ Tagva Sarai Abramut oᴋarpoᴋ: Idluitulivionera illingnut pile. Kivgara tunilauᴋpara illingnut; singaidlunelo nalojungnairame, nachogilerpânga. Nâlegaᴋ erᴋartuijôle uvamnullo illingnullo!

⁶ Abrale oᴋarpoᴋ Saraimut: Takuit, kivgat pigivat, idluarijarnik piniarvigiuk. Saraible taimna pidlarmago ᴋemâvâ.

⁷ Nâlekable engelingata naipipâ puilavingme inuᴋangitome, puilavingme apᴋosinerub Suremut ilingajub sannianêtome.

⁸ Oᴋautivâlo: Hâgare, Saraib kivganga, nakit pivêt, namungarniarᴋêllo? Tâmna kiovoᴋ: Angajoᴋâmnit Saraimit ᴋemâvunga.

⁹ Nâlekable engelingata oᴋautivâ: Uttilerit angajoᴋârnut, illingniglo nikanasârit tâpsoma agganginut.

¹⁰ Nâlekablo engelingata oᴋautivâ: Kinguvâksatit unuksivalliatitsomavakka, kittitaugiangat ajornarsitilugo unumut.

¹¹ Amma Nâlekab engelingata oᴋautivâ: Ahâk, singailerêrpotit, ernermiglo ernijomârpotit, taimna Ismaêlemik atseraraksarivat, Nâlekab pidlartaujotit tussarmatit.

¹² Taimna inungoromârpoᴋ nujoartoᴋ sorlo, ilûnaita sorsugvigijomârpait, ilûnatiglo sorsugvigijomârpât; ᴋatangutimelo kangiane nunaᴋaromârpoᴋ.

¹³ Tagva Nâlekab oᴋautjime attinga taivâ: Igvit Gûdeovotit takojoᴋ (tamainik); oᴋarame: Tamâne takungipigô uvamnik takojoᴋ?

¹⁴ Taimaimat puilavik tâmna taivât: “Omajub Takojub uvamnik puilavinganik.” Tâmnale Kâdesiblo Bârediblo akorngangnêpoᴋ.

¹⁵ Hâgarelo ernermik ernivoᴋ Abramut, Abrablo ernine, Hâgarib erniarijanga, Ismaêlemik atserarpâ.

¹⁶ Abralo jâreᴋarpoᴋ 86nik, Hâgare Ismaêlemik erningmat tâpsomunga.