Genesis 15 - Labrador Inuttitut Heritage Bible

Abra okpernerminik idluarsijuteᴋartitauvoᴋ. Nâlekab angervigivâ.

¹ Pijoᴋartut tamakkoa kingorngatigut Nâlekab oᴋausinga Abramut pivoᴋ takotitjutikut, oᴋarlune: Sivôraniarnak, Abra, uvanga tagva sapputjauvît, amigangitomiglo akkilertauvît.

² Abrale oᴋarpoᴋ: Nâlegaᴋ, Nâlegaᴋ, sumik tunitjivigijomavingâ? ᴋitorngaᴋarnanga arvertarpunga, iglumniglo kingormgujijuksaᴋ tagva Eliêsere Damaskusemioᴋ.

³ Abralo amma oᴋarivoᴋ: Takuit, kinguvâksaᴋartingilarma, kivgarlo iglumne erniangomajoᴋ kingormgujijuksauvoᴋ uvamnik.

⁴ Sunaubvale, Nâlekab oᴋausinga tâpsomunga (pivoᴋ) oᴋartoᴋ: Tâmna kingormgujijuksaungilaᴋ illingnik, timingnille pijuksaᴋ kingormgujiniarpoᴋ illingnik.

⁵ Anerᴋovâlo sillamut oᴋautivlugolo: Attê, ᴋilak ârlorvigiuk uvloritjallo kittikit, kittilugit sappingikungne. Imâglo oᴋautivâ: Taimaituksauvut kinguvâksatit.

⁶ Okperingmago, Nâlekab tamattominga idluarsijuteᴋartipâ.

⁷ Oᴋautivâlo: Uvanga Nâlegauvunga aularᴋojijoᴋ illingnik Uremit Kaldeamêtomit, nuna tamanna tunijomagapko illingnut, perᴋutaurᴋovlugo illingnut.

⁸ Oᴋarporlo: Nâlegaᴋ, Nâlegaᴋ, suna nallunaikutaksarivigô, pigijomârapko?

⁹ Oᴋautivâlo: Kaikit uvamnut tuktuvak pingasunik jârelik, tuktungajorlo pingasunik jârelik, saugarlo pingasunik jârelik, taubearsuglo taubeararlo,

¹⁰ Tagva tamakkoa tamaita ᴋaipait, ᴋoppilugillo avgorpait, ᴋoppallo attunit akkilerêktilugit illivait; tingmiâgle ᴋoppingilak.

¹¹ Tingmiaᴋsuillo ômajovinit mivigivait, Abrable aijalikpait.

¹² Siᴋinerle nippilermat, Abra sinnisilerpoᴋ ittijomik; ahâglo, tâᴋsûb ᴋoaᴋsârnartub nallaupâ.

¹³ Tagva Abramut oᴋarpoᴋ: Kaujimavilerit, kinguvâksatit tujormiangojomârmatta nuname perᴋutigingitamingne, taikanelo kippalôtitaujomârmatta kappiasuktitauvlutiglo jârit 400 nâvlugit.

¹⁴ Uvangale nunaᴋatigêt taipkoa kivgartorvigijangit erᴋartoromârpakka, kingornganelo aularomârput perᴋuteᴋadlarlutik.

¹⁵ Igville ullapirsauteᴋarlutit sivorlerijarnut aijomârpotit, jârerᴋortoleruvillo illuvertaujomârpotit.

¹⁶ Ernerêlle kingorlerêt sittamaingit tamaunga utteromârivut, Amoriterit idluituliningat sulle nâmaksingimat.

¹⁷ Seᴋinerle nippilermat tâdlarmallo, sunaubva, igavik issilik, ikomalo ᴋoppakkut taipkoa akorngatigut ingergajoᴋ.

¹⁸ Uvlorme tamattomane Nâlekab Abra angervigivâ, oᴋarlune: Nuna tamanna tunijomârpara kinguvâksarnut Egiptenib kôksoanganit kôksoarmut Faratemut,

¹⁹ Keniterillo, Kenisiterillo, Kadmoniterillo,

²⁰ Hêtiterillo, Fêresiterillo, Refaillo,

²¹ Amoriterillo, Kânaaniterillo, Gergesiterillo, Jebusiterillo.