Genesis 14 - Labrador Inuttitut Heritage Bible

Lotib piulijauninga Abramut. Melkisêdeke.

¹ Pijokarporlo, Amrâfele attaniotilugo Sineareme, Arioggelo attaniotilugo Elâsareme, Kedarlaomerelo attaniotilugo Elame, Tidealelo attaniotilugo Gojime,

² Tâpkoa unatadlarmatta Bêramut Sodomab attaninganut, Birsamullo Gomorrab attaninganut, Sineamullo Adamab attaninganut, Semeberemullo Zeboib attaninganut, Bêlablo attaninganut. Bêla tagva Zoare.

³ Tâpkoa ilûnatik illigêklutik naᴋsarmut Siddimut pivut, (kingorngane) tasseᴋsoangojomut tarriomut.

⁴ Jârit 12 Kedarlaomeremut kivgaugamik, jârit 13ingane nâlegomairpât.

⁵ Jârillo 14ingane Kedarlaomere tikkipoᴋ attanillo illagijangit, sâlagivaillo Rêfait Astarot-Karname, Sûsillo Hameme, Emimillo Kiriatab naternangane,

⁶ Horiterillo Seireme, ᴋaᴋᴋangine, El-Pâran tikkidlugo inuᴋangitub kiglinganêtoᴋ.

⁷ Uttermivlutiglo En-Mispat tikkipât, tagva Kâdes; Amalekiterillo nunangat ilûnât, taimaktauᴋ Amoriterit, Hâzazôn-Tâmame nunaᴋartut, sâlagivait.

⁸ Tagva aularput Sodomab attaninga, Gomorrablo attaninga, Adamablo attaninga, Zeboiblo attaninga, Bêlablo attaninga, imaitoᴋ, Zoarib, sorsugiartorlutik naᴋsarme Siddime

⁹ Kedarlaomeremut Elab attaninganut, Tidealemullo Gojib attaninganut, Amrâfelemullo Sinearib attaninganut, Arioggemullo Elâsarib attaninganut; attanit sittamat unatarput tallimanut.

¹⁰ Naᴋsarlo Siddim kutsolingnik ittersaᴋadlarpoᴋ. Kemâgamiglo Sodomab Gomorrablo attanîgik (illangillo) takanunga kattakput; amiakungillo ᴋemâlerput ᴋaᴋᴋanut.

¹¹ Tagva perᴋutit tamaita Sodomamêtut Gomorramêtullo tiguvait nerᴋiksallo tamaita, aularlutiglo.

¹² Lotelo Abrab ᴋangianga perᴋutingillo naksarpait, aularamik, Sodomame nunaᴋarmat.

¹³ Tikkiporlo ᴋemâsimajut illangat oᴋautigijartorlugo Abramut Ebrêerimut, nunaᴋarmat Mamrib Amoriterib napârtungine, Eskolib Aneriblo ᴋattangutingata. Tâpkoalo Abralo angerᴋatigêkput.

¹⁴ Abrable ᴋattangutine aularutjaujoᴋ tussaramiuk, sûtjaᴋotine 318, iglomine inôlilauᴋtut, sorsugiarᴋovait, ipkoalo udlapait Dane tikkidlugo.

¹⁵ Unnuakkullo nangmineᴋ kivgangitalo maggoilivlutik opingarpait sâlagivlugillo maliklugillo Hôba tikkidlugo Damaskusib tachardlinga.

¹⁶ Perᴋutillo tamaita uttertipait, Lotelo ᴋattangutine perᴋutingillo, taimaktauᴋ arnat inuillo.

¹⁷ Uttilermat, Kedarlaomere attanillo illagijangit sâlagerᴋârlugit, Sodomab attaninga aularpoᴋ pagrearlugo naᴋsarmut Sâvemut, tagva attanerub naᴋsanganut.

¹⁸ Melkisêdekele, Sâlemib attaninga, ᴋaᴋᴋôjanik vainemiglo ᴋaitsivoᴋ; Gûdib ᴋotsingnerôjub ajoᴋertuijoᴋutinga tâmna.

¹⁹ Saimauserpâlo oᴋarlune: Saimausertaule Abra Gûdemut ᴋotsingnerôjomut, ᴋilangmiglo nunamiglo perᴋutetalingmut.

²⁰ Gûdelo ᴋotsingnerôjoᴋ nakorijaule, sorsugvigijarnik tunitjijoᴋ aggangnut. Abrablo tâmna tunitjivigivâ tigujame ilûnatik tallimaujoanik.

²¹ Tagva Sodomab attaninga Abramut oᴋarpoᴋ: Inuit uvamnut tunikit, perᴋutit igvit tigukit.

²² Abrable Sodomab attaninga oᴋautivâ: Aggakka issakpakka ᴋongmut Nâlekamut Gûdemut ᴋotsingnerôjomut, ᴋilangmiglo nunamiglo perᴋutetalingmut,

²³ Tamainit igvit perᴋutigijarnit tigusinianginama ivaluksakullungmiglônêt ungerutiksamiglônêt, oᴋarᴋonak: Uvanga Abra akluitipara.

²⁴ Inôsuktut nerrijangit kissêta pivakka, angutillo illagijama piksangit; Aneriblo Eskoliblo Mamriblo piksatik tigungmiligit.