Genesis 13 - Labrador Inuttitut Heritage Bible

Abralo Lotelo aviutivuk.

¹ Abralo majorarpoᴋ Egiptenemit, nangmineᴋ nuliangalo pigijangillo ilûnatik, Lotelo illagivlugo, (Kânaanemut) seᴋinerdlermut.

² Abralo akluidlarpoᴋ nergjutinik silberemiglo goldemiglo.

³ Ingergarnermine seᴋernganit tikkipoᴋ Bêtelemut, sivorngane tuppeᴋarvigijaminut, Bêteliblo Aiblo akorngangnut,

⁴ Nunamut tunerguserviliorvigijaminut sivorngane. Tagvanelo Nâlekab attinga tuksiarvigivâ.

⁵ Lotele, Abrab ingergaᴋatinga, amma saugaᴋoteᴋarivoᴋ nergjutiniglo tupperniglo.

⁶ Nunablo nunaᴋatigêktilugit ajorpait; perᴋutingit unudlarmatta, nunaᴋatigêklutik sapperput.

⁷ Akkerartûtivullo Abrab nergjuteᴋotinginik mianersijut Lotiblo nergjuteᴋotinginik mianersijut. Kânaanikullo Feresiterillo taipsomane tagvane nunaᴋarput.

⁸ Tagva Abrab Lote oᴋautivâ: Omât, akkerartûtijuksaungigalloarpogut uvangalo igvillo, mianersijoᴋotikkalo mianersijoᴋotitillo, ᴋatangutigêkapta.

⁹ Nuna ilûnane sângnêngilâᴋ? Aviutilaulung-ai? Saumingmut pijomaguvit, tallerpingmut piniarpunga; tallerpingmullônêt pijomaguvit, saumingmut piniarpunga.

¹⁰ Lotiblo ârlorlune Jordanib erᴋâ ilûnât ullernaigivâ, ilûnâne imilik (Sodomalo Gomorralo asserortaulerᴋârtinagik Nâlekamut) sorlo Nâlekab perorsêvinga, sorlo Egiptene, Zoare tikkidlugo.

¹¹ Tagva Lotib annerivâ Jordanib erᴋâ ilûnât, kangimut ingergavlune. Taimaglo aviutivuk.

¹² Abra nunaᴋarpoᴋ nuname Kânaaneme, Lotelo nunaᴋarpoᴋ iglugasangne (Jordanib) erᴋâne, tuppertiᴋattarlune Sodoma tikkidlugo.

¹³ Kissianele Sodomamiut uivêtoᴋsôvut idluitulijoᴋsôvlutiglo Nâlekab sângane.

¹⁴ Lotelo Abramit avingmat, kingorngane Nâlegaᴋ oᴋarpoᴋ Abramut: Attê, ârlorit takoniarlutillo innigijarnit avunga aungalo paungalo taunungalo.

¹⁵ Nuna takojat ilûnât tunijomavara perᴋutautsainartilugo illingnut kinguvâksarnullo.

¹⁶ Kinguvâksatillo unuksivalliatitsomavakka sanniktitut nuname. Sanningnik nunamêtunik kittitsijungnartoᴋarpat, tâpsoma kinguvâksatittauᴋ kittinajarivait.

¹⁷ Parngnailerit, nuna ingergavigiuk tukkimullo sennimullo, illingnut tunijomagapko.

¹⁸ Tagva Abrab tuppine nûtipait, tikkiutivlunelo nunaᴋalerpoᴋ Mamrib napârtungine Hebronemêtune, tagvanelo Nâlekamut tunerguserviliorpoᴋ.