Genesis 12 - Labrador Inuttitut Heritage Bible

Abra annerijauvoᴋ. Ingergavoᴋ Kânaanemut Egiptenemullo.

¹ Nalekablo Abra oᴋautivâ: Aularit nunangnit illangnillo atâtavillo iglunganit nunamut unertûtigijaksamnut illingnut.

² Inugasaksoangortitsomavagit saimauserlutillo, attillo nertornartitsomavara saimanartitsomavlutillo.

³ Illingnik saimausêjut saimauseromavakka, illingniglo oᴋarnerlûtjijut oᴋarnerlûtijomavakka, illikullo kinguvârêt ilûnamatsiatik nuname saimausertaujomârput.

⁴ Tagva Abra aularpoᴋ, sôrlo Nâlekab oᴋautingmago, Lotiblo aulaᴋatigivâ. 75nik Abra jâreᴋarpoᴋ, Haranemit aularame.

⁵ Tagva Abrab illagivait nuliane Sarai Lotelo ᴋangiane, perᴋutitiglo tamaita kattersortatik, tarnelîllo tamaita pigijatik Haraneme, aularpullo ingergavlutiglo nunamut Kânaanemut, tikkipâlo nuna Kânaane.

⁶ Abralo ingergalerpoᴋ nunakut Sikkememut Moriblo napârtunginut. Taipsomane Kânaanikut tagvane nunaᴋarput.

⁷ Nâlekablo Abra saᴋᴋervigivâ oᴋautilâlo: Kinguvâksarnut nuna manna tunijomârpara. Tagva tunerguserviliorpoᴋ tagvane Nâlekamut saᴋᴋervigijiminut.

⁸ Tagvangallo aularivoᴋ ᴋaᴋᴋamut Bêtelib kangianut, tagvanelo tupertilerpoᴋ Bêtele killerivlugo Ailo kangilerivlugo. Tagvanelo Nâlekamut tunerguserviliorpoᴋ, Nâlekablo attinga tuksiarvigivâ.

⁹ Abra tagvangat amma aularivoᴋ ingergarlunelo seᴋᴋernganut.

¹⁰ Tagvanele kângnartoᴋsoaᴋalermat, Abra attersarpoᴋ Egiptenemut, taikane tujormiangojartorlune, kângnartoᴋsoaᴋ angidlarmat nuname.

¹¹ Pijoᴋarporlo, Egiptene ᴋanileramiuk, nuliane Sarai oᴋautivâ: Takuit, ᴋaujimavagit arnaujotit kênatsiariktoᴋ.

¹² Imaᴋâ, Egiptenemiut takogunitit, oᴋarniarput: Tagga nulianga; uvamniglo toᴋotsiniarput igvillo inôtilutit.

¹³ Oᴋalauniarpotit taimaimat najagigapkit, ᴋanoerᴋonanga pivlutit, tarnigalo inôrᴋovlugo illikut.

¹⁴ Abrale Egiptenemut tikkingmat, Egiptenemiut arnaᴋ takovât, ânanaugidlarlugo.

¹⁵ Angajoᴋâᴋsuillo Fâraomêtut takovât nertorlugolo Fâraomut. Arnarlo tigujauvoᴋ Fâraub iglunganut.

¹⁶ Abralo ajungitulivigivâ, taimna pivlugo perᴋuteᴋalertilugo saukanik, tuktuvangniglo, siuterᴋortojuniglo angutinik, kivganiglo angutinik, kivganiglo arnanik, siuterᴋortojuniglo arnanik, kamêleniglo.

¹⁷ Kissianele Nâlekab Fârao sugiarpâ sugiarnermik angijomik inuᴋotingillo Sarai Abrab nulianga pitjutigalugo.

¹⁸ Tagva Fâraub Abra ᴋairᴋovâ oᴋautilâlo: Sôᴋ taimailiorvigivingâ? Sôᴋ oᴋautingilarma nuliarigangne?

¹⁹ Sôᴋ najagivlugo oᴋautigiviûk? Tiguvaralo nuliarijomavlugo. Taggale nuliat, tiguguk aularlutillo.

²⁰ Fâraublo anguteᴋotine perᴋovait ᴋanilârlugo nuliangalo perᴋutigijangillo tamaita.