Genesis 11 - Labrador Inuttitut Heritage Bible

Nuvuguseᴋsoaᴋ Babeleme. Oᴋautsit adsigêngititauningat. Semib kinguvângit.

¹ Nunamiullo ilûnamatsiatik ingmigolingajunik oᴋauseᴋaratik oᴋauseᴋarput adsigêktunik.

² Paungale aularamik, naternaᴋ tikipât nuname Sineareme; tamanna nunagilerpât.

³ Oᴋaᴋatigêkpullo: Attê, ivitânik sanalauᴋta ikkomamut sittijorortilugit. Tagva ivitât ujararivait, kutsorlo macharivlugo.

⁴ Oᴋarpullo: Attê, iglugasaksoarnik sanalauᴋta nuvuguseᴋsoarmiglo, nuvua aktuatilugo ᴋilangmut, erᴋanartiluta, siamartitautailivlutalo nunanut tamainut.

⁵ Tagva Nâlegaᴋ aᴋᴋarpoᴋ, iglugasaksuit nuvuguseᴋsoarlo takojartorlugit, inuit ᴋitorngangita senajangit.

⁶ Nâlegarlo oᴋarpoᴋ: Tagga, inugasaksuit atausiovut adsigêktuniglo oᴋauseᴋarlutik; tamannauvoᴋ piniarningita pigiarningat, mânamillo pinasuarningit agviarlugit ajornarniarpoᴋ.

⁷ Attê, aᴋᴋalauᴋta kanunga, oᴋausingit adsigêgungnairtilugit, aipâ aipame oᴋausinginik tukkisijungnairᴋovlugo.

⁸ Nâlekablo inuit tagvangat siamartipait nunanut tamainut, igloliorungnairpullo iglugasaksoarnik.

⁹ Tamanna pivlugo Bâbelemik atteᴋarput, Nâlekab tagvane inuit ilûnatik oᴋausingit adsigêgungnairtingmagit, tagvangallo Nâlekab siamartingmagit nunanut tamainut.

¹⁰ Tamadja Semib kinguvângit: Jâreᴋarlune 100nik Semib Arpagsad ernertârivâ, jârik magguk ullitornivaksûb kingorngane,

¹¹ Kingorngagullo sulle jârinik 500nik inôvoᴋ, ernertârlune panniktârlarmelo.

¹² Jâreᴋarlune 35nik Arpagsadib Sala ernertârivâ,

¹³ Kingorngagullo sulle jârinik 403nik inôvoᴋ, ernertârlune panniktârlarmelo.

¹⁴ Jâreᴋarlune 30nik Salab Eber ernertârivâ,

¹⁵ Kingorngagullo sulle jârinik 403nik inôvoᴋ, ernertârlune panniktârlarmelo.

¹⁶ Jâreᴋarlune 34nik Eberib Peleg ernertârivâ,

¹⁷ Kingorngagullo sulle jârinik 430nik inôvoᴋ, ernertârlune panniktârlarmelo.

¹⁸ Jâreᴋarlune 30nik Pelegib Regu ernertârivâ,

¹⁹ Kingorngagullo sulle jârinik 209nik inôvoᴋ, ernertârlune panniktârlarmelo.

²⁰ Jâreᴋarlune 32nik Regub Serug ernertârivâ,

²¹ Kingorngagullo sulle jârinik 207nik inôvoᴋ, ernertârlune panniktârlarmelo.

²² Jâreᴋarlune 30nik Serugib Nahor ernertârivâ,

²³ Kingorngagullo sulle jârinik 200nik inôvoᴋ, ernertârlune panniktârlarmelo.

²⁴ Jâreᴋarlune 29nik Nahorib Tara ernertârivâ,

²⁵ Kingorngagullo sulle jârinik 119nik inôvoᴋ, ernertârlune panniktârlarmelo.

²⁶ Jâreᴋarlune 70nik Tarab ernertârivait Abralo Nahorelo Haranelo.

²⁷ Tamadja Tarab kinguvângit: Tarab ernertârivait Abralo Nahorelo Haranelo. Haranible Lot ernertârivâ.

²⁸ Haranele toᴋovoᴋ atâtame Tarab takoane, inûlervingmine Ureme, Kaldearit nunangane.

²⁹ Abralo Nahorelo nulianikpuk. Abrab nulianga Saraimik atteᴋarpoᴋ, Nahorible nulianga Milkamik atteᴋarpoᴋ, Haranib panninga; tâpsomale Milkalo Jiskalo pannigivak.

³⁰ Saraile ᴋitorngisuiname, ᴋitorngaᴋangilaᴋ.

³¹ Tarablo ernine Abra, ernimelo Haranib erninga Lot, ukkoanelo Sarai, ernime Abrab nulianga, illagivlugit aulaᴋatigivait Uremit, Kaldearit nunanganit, ingergajomavlune Kânaanib nunanganut; Haranelo tikkinamitsuk, tagvane nunaᴋalerput.

³² Taralo jâreᴋarpoᴋ 205nik, toᴋovorlo Haraneme.