Genesis 1 - Labrador Inuttitut Heritage Bible

Sillaᴋsûb pingortitauninganik.

¹ Pigiarnerme Gûdib ᴋilaglo nunalo pingortipak.

² Nunalo illênarsimavoᴋ sunataᴋaranelo, itinerublo ᴋollâ tâᴋpoᴋ, Gûdiblo anerningata imaᴋsuit ᴋollangiarpait.

³ Gûdelo oᴋarpoᴋ: Kaumalerle. Kaumalerpoᴋ tagva.

⁴ Gûdelo takovoᴋ ᴋaumajoᴋ nâmangmat. Tagva Gûdib ᴋaumajoᴋ avikpâ tâᴋtomit.

⁵ Kaumajorlo Gûdib uvlormik taivâ, tâᴋtorlo unnuarmik taivlugo. Tagva unnungorpoᴋ uvlângorlunelo, uvloᴋ sivorleᴋ.

⁶ Gudelo oᴋarpoᴋ: Aulangitoᴋarle imaᴋsuit akorngane, aviktaujutiksaujomik imaᴋsuit akorngane.

⁷ Tagva Gûdib aulangitoᴋ sanavâ, imaᴋsuillo aulangitub atânêtut avikpait imaᴋsoarnit aulangitub ᴋollânêtunit. Taimailerporlo.

⁸ Aulangitorlo Gûdib ᴋilangmik taivâ. Tagva unnungorpok uvlângorlunelo, uvlub aipanga.

⁹ Gudelo oᴋarpoᴋ: Imaᴋsuit ᴋilaub atânêtut atautsemut katersorlit, ipterilingajoᴋ takuksaurᴋovlugo. Taimailerporlo.

¹⁰ Ipterilingajorlo Gûdib nunamik taivâ, imaᴋsuit atautsemut katersortut imarbiksoarmik taivlugit. Gûdelo takovoᴋ nâmangmat.

¹¹ Gûdelo oᴋarpoᴋ: Nunamit nuilerlit iviksukkat, perortullo kingorliksatalît, napârtullo, paungalît, paungalivaktut ingmingne kingorliksataᴋartunik nuname, ilûnatik ingmikut pitjutilît. Taimaiporlo.

¹² Nunamillo nuilerput iviksukkat perortullo kingorliksatalît, ilûnatik ingmikut pitjutilît, napârtullo paungalivaktut ingmingne kingorliksataᴋartunik, ilûnatik ingmiknt pitjutilît. Gûdelo takovoᴋ nâmangmat.

¹³ Tagva unnungorpoᴋ uvlângorlunelo, uvluk pingajuak.

¹⁴ Gudelo oᴋarpoᴋ: Kilangme aulangitome ᴋaumaᴋuteᴋarle, uvlormiglo unnuarmiglo aviktitsijuksanik nilliuninullo uvlunullo, jârinullo nellunaikutaksaujunik.

¹⁵ Kaumaᴋutiksauvut ᴋilangme aulangitome, nunamik ᴋaumairᴋovlugit. Taimailerporlo.

¹⁶ Gûdiblo ᴋaumaᴋutsoâk magguk senavak, ᴋaumaᴋut anginersaᴋ attaniotijuksaᴋ uvlormut, ᴋaumaᴋullo mikkinersaᴋ attaniotijuksaᴋ unnuarmut, uvloritjallo (sanavait).

¹⁷ Gûdiblo ᴋilangmut aulangitomut illivait, ᴋaumairᴋovlugit nunamik.

¹⁸ Attanioterᴋovlugillo uvlormut unnuarmullo, aviktitserᴋovlugillo ᴋaumajomiglo tâᴋtomiglo. Gûdelo takovoᴋ nâmangmat.

¹⁹ Tagva unnungorpoᴋ uvlângorlunelo, uvlut sittamangat.

²⁰ Gudelo oᴋarpoᴋ: Imaᴋ aulaviole ômajunut tarnelingnut aulajunut, tingmitjallo tingilit nuname ᴋilaub aulangitub atâne.

²¹ Gûdiblo pingortipait imaᴋsiutit angijut, ômajullo tarnilît tamaita aulajut, imab aulavigijingit, tamaita ingmikut pitjutilît, tingmitjallo esarolît tamaita, tamaita ingmikut pitjutilît. Gûdelo takovoᴋ nâmangmat.

²² Gûdiblo saimauserpait oᴋarlunelo: Kinguvâktâᴋattarluse unuksivalliatitse, imarbiksûb imanga nâmavlugo, tingmitjallo unuksivallialit nuname.

²³ Tagva unnungorpoᴋ uvlângorlunelo, uvlut tallimangat.

²⁴ Gûdelo oᴋarpoᴋ: Nunamit pingorlit ômajut tarnilît, ilûnatik ingmikut pitjutilît: nergjutit pâmgortullo ômajullo nunaᴋsiutit, ilûnatik ingmikut pitjutilît. Taimailerporlo.

²⁵ Gûdiblo pingortipait ômajut nunaᴋsiutit, tamaita ingmikut pitjutilît, nergjutillo ingmikut pitjutilît, tamaitalo pâmgortut ivjome ingmikut pitjutilît. Gûdelo takovoᴋ nâmangmat.

²⁶ Gûdelo oᴋarpoᴋ: Inuliorta adsilivluta, uvaptitutituksanik, attaniojuksanik mingeritjanut imarbingmêtunut, tingmitjanullo ᴋilaub attânêtunut, nergjutinullo, nunamullo ilûnânut, pâmgortunullo tamainut, aulajunut nuname.

²⁷ Gûdiblo inuk pingortipâ, ingminik adsilivlune, Gûde adsilivlugo pingortipâ, angullo arnarlo pingortipak.

²⁸ Gûdiblo saimauserpak oᴋautivlugiglo: Kinguvâktâᴋattarlutik unuksivallialeritik, nuna nâmavlugo attaniotivigivlugolo: nâlegauleritiglo mingeritjanut imânêtunut, tingmitjanullo ᴋilaub atânêtunut, ômajunullo tamainut aulajunut nuname.

²⁹ Gudelo oᴋarpoᴋ: Ahâk, illiptingnut tunivakka perortut kingorliksatalît tamaita nunaᴋsoarme ilûnâne, napârtullo tamaita paungalivaktut kingorliksataᴋartunik, tamakkoa nerᴋiksariniarpatik.

³⁰ Omajunullo nunaᴋsiutinut tamainut, tingmitjanullo tamainut ᴋilaub atânêtunut, ômajunullo tamainut nuname aulajunut tarnelingnut, perortut tungujoᴋtat tunivakka, nerᴋiksarijaurᴋovlugit taipkonunga. Taimailerporlo.

³¹ Gûdiblo pingortitane tamaita ullernaigigamigit, takovoᴋ nâmadlarmatta. Tagva unnungorpoᴋ uvlângorlunelo, uvlut satsingat.