Galâtsiamiunut 6 - Labrador Inuttitut Heritage Bible

Kaiblainernik ᴋenuersârᴋojijunik ajungitulerᴋojijuniglo.

¹ Katangutikka, tammarnermut opaluijaujoᴋarajarpat, taimaitoᴋ âᴋiksorasuarsiuk anernermut ᴋenuêtomut, ilipse Anerneliojose. Udjertorillo nangminernik, igvittauᴋ ôktortaulungnermut pijauᴋonak.

² Ikajortigêngniaritse oᴋumaitoᴋarangapse, taimaidluse Kristusib perᴋojanga nâmaksitiniarpase.

³ Piojorijoᴋarpalle ingminik, suksaungitôgalloardlune, tâmna uivêrivoᴋ nangminerminik.

⁴ Ilûnatigle atunit nangmineliornermingnik kiglisiniarlit; tagva ingmingne kissiane nertornauteᴋarniarput, assimingnelo pinatik.

⁵ Ilûnatik atunit nangmagaksatik nangmineᴋ nangmarniarmatsuk.

⁶ Oᴋautsinigle ajoᴋertortaujub ajoᴋertortine aitortorliuk ajungitunik sunatuinarnik.

⁷ Tammarniarase Gûde mitautigijaujomangilaᴋ; inuk karngasortaminik katersoijomârmat.

⁸ Uviningminut karngasiojoᴋ, asserornartomik katersoijomârpoᴋ uviningmit. Anernermulle karngasiojoᴋ inôtsemik nâksaungitomik katersoijomârpoᴋ Anernermit.

⁹ Ajungitulilertale merngortorniaratalo; katersoijomâraptatauᴋ neliuningane, soraingikupta.

¹⁰ Taimaitomik piviksaᴋarapta, ajungitulilerta tamainut, okperneᴋaᴋativulle piluardlugit.

¹¹ Ahâk, ukkua aglait ununârtakka ilipsingnut, aggamnut nangmineᴋ aglaklugit.

¹² Ilûnatik ᴋuviagijaujomajut uvinik pivlugo, taipkoa inaksorpâse kipijaulerᴋovluse; kissiane unangmijaujomanatik Kristusib kikiaktortauvia pivlugo.

¹³ Kipijaugalloaramik nangmineᴋ aglât, perᴋojat nâlengilait; ilipsele kipijauᴋovâse nertôtigijomavlugo uvinise.

¹⁴ Uvamnille ungasigle nertôtiniarlunga assianik, Nâlegapta Jêsusib Kristusib kikiaktortauvianik kissianik; tâpsomûna silaᴋsoaᴋ kikiaktorsimajotun-ipoᴋ uvamnut, uvangalo silaᴋsoarmut.

¹⁵ Kristuse Jêsuseme kipimanerlônêt kipimanginerlônêt atungimanik, nutângortitaunerle.

¹⁶ Ilûnatigle oᴋautsinik makkoninga nâletsiartut, tâpkoa ullapirsauteᴋarlit nâpkigijauneᴋarlutiglo, Gûdiblo Israêlinga.

¹⁷ Mattoma kingorngane neliata oᴋumaitiniaraninga; Nâlekab Jêsusib nelunaikutanga timimiutarigapko.

¹⁸ Nalegapta Jêsusib Kristusib saimarsautingata anernise illagiligit, ᴋatangutikka. Amen. Galâtsiamiunut aglaktaumavut Rômamit.