Galâtsiamiunut 5 - Labrador Inuttitut Heritage Bible

Galâtsiamiut kaiblartauvut, okpertut kipalôjungnaininginik iperaiᴋonagit, arvertarᴋovlugille Anernerme naglingnermelo.

¹ Taimaimat Kristusib kivgaujungnaitingmatigut, kivgaunginise oᴋosertailiniarsiuk, kingornganelo ama kipalungortailitiniaritse.

² Ahâk, uvanga Pauluse oᴋaupapse: kipijauᴋojilerupse ilipsingnik, Kristuse ilipsingnut atungilaᴋ.

³ Ama kigligiudsivigivakka kipijaulertut ilûnaita, perᴋojat ilûnaita nâmaksititaksaringmagit sulle.

⁴ Kristusemik assiojivose, perᴋojanut idluartitaujomajose, saimaneᴋ atorungnairpase.

⁵ Uvagulle Anernerme utaᴋivogut idluarsititauniarnermik okpernermut nerriugijaksaᴋarluta.

⁶ Kristuse Jêsuseme kipimanerlônêt kipimanginerlônêt atungimanik; okpernerle naglingnikut piniarnernik saᴋᴋertitsijoᴋ.

⁷ Aᴋpangitsialauᴋtose, kia noᴋᴋartipâsê mikseᴋârneᴋ nâlegungnairlugô?

⁸ Ilipsingnik ᴋaiᴋojijomit noᴋᴋangatitauneᴋ taimaitoᴋ pingilaᴋ.

⁹ Pudjusautiarsûb senaugaᴋ ilûnât pudjutipâ.

¹⁰ Sungertûtigivapse Nâlekame, assianik issumaᴋarnianginapse. Ilipsingnigle asseroijoᴋ pidlartaujomârpoᴋ, kinaungmangâllônêt.

¹¹ Uvangale ᴋatangutikka, sulle kipinermik oᴋâlaguma, sôᴋ sulle unangmijauvîk? Seningajolik tagva sinaungasautigijaujungnairajarpoᴋ.

¹² Kanoᴋtôᴋ avisârtaulittauᴋ ilipsingnik asseroijut!

¹³ Ilipsele ᴋatangutikka, kivgaujungnairᴋovluse ᴋaiᴋojaumavose. Udsertoritsele, kivgaungineᴋ atornerluktailivlugo, uviningmut akkuliuterᴋonago; kivgartortigêklusele pititse naglingnermut.

¹⁴ Perᴋojat ilûnatik nâmaksititaungmatta oᴋautsemut atautsimut, mattomunga: Inuᴋatit iliktut nagligiuk.

¹⁵ Kêjigêdlarupsele nerrijigêdluselo, kamaleritse, ilipsingnut nungutigêᴋonase.

¹⁶ Oᴋaupapsele: Anernerme arvertaritse, uvingûb ikliguningit tagva nâmaksitiniangilase.

¹⁷ Uvingûb ikliguningata Anerneᴋ akkerartormago, Anernerûblo kajungersainingata uvinik akkerartorivâ. Tâpkoa taimak akkerartortigêngmanik, pijomajapsingnik aglât piniarungnangilase.

¹⁸ Anernermulle tessiortaugupse, perᴋojat ataniongilat ilipsingnut.

¹⁹ Uvingûble pingit nelonangilat, imaitut: Nuliarêngnermik asseroineᴋ, assiniarnek, maᴋojungnartulineᴋ, illoᴋeudlarnerlo,

²⁰ Gûdeungitunik kivgartorneᴋ, angakoniarneᴋ, ᴋenugosungneᴋ, ômisungneᴋ, anerutjineᴋ, ningarneᴋ, aivaneᴋ, akkerartorneᴋ, ileratsârneᴋ, ᴋaningaumajarneᴋ, inuarneᴋ,

²¹ Tallaneᴋ, nerrituneᴋ, assingillo taimaitut; tamakkoninga sivorngagut oᴋautilauᴋpapse, ama sulle sivorngagut oᴋautivapse: taimailiortut Gûdib nâlegauvinganik kingormgujiniangilat.

²² Anernerub perortisangangit tamadja: Naglingneᴋ, ᴋuviasungneᴋ, ullapirsaineᴋ, ᴋenuersârneᴋ, inôtsiarneᴋ, pitsiarneᴋ, okperneᴋ, piojoringineᴋ, ikliguktailineᴋ.

²³ Perᴋojat taimailiortut akkerartungilait.

²⁴ Kristusible inuᴋotingita uvinitik ikligunerit kajungilârnerillo illaliudlugit pitipait seningajolingmut.

²⁵ Inôniarupta Anernerme, arvertalaungmitatauᴋ Anernerme.

²⁶ Suksaungitomik nertortauniksarsiorata, annuliutigêgatalo ômisuktigêgatalo!