Galâtsiamiunut 4 - Labrador Inuttitut Heritage Bible

Gudib ᴋitorngangita kivgaungininganik piloringnartomik okpernerme Gudib angersimaninginik.

¹ Oᴋarpungale kingormgujijuksaᴋ sorusiotilugo, tâmnalo kivgarlo adsigêngitôngilak, tâmna angajoᴋaugalloarlune perᴋutinut tamainut.

² Ajoᴋertuijulle pairsijullo atanerivait neliutsiarivlugo atâtame perᴋojanga.

³ Taimaktauᴋ uvagut sorusiotiluta kivgatitut ilingatitauvogut silatânêtunik ajoᴋertûtsinut.

⁴ Neliuningale neliusimangmat, Gûdib ernine tilivâ, arnamit erniangojoᴋ, perᴋojanik nâleklune;

⁵ Perᴋojanut kivgaujunik piuliklerᴋovlugo, ᴋitorngaunermik pititauᴋovluta.

⁶ Kitorngaugapsele, Gûdib Ernerme Anerninga ômatipsingnut pitipâ, tâmna nipliajoᴋ: Abba Atâtak!

⁷ Taimaimat kivgaujungnairpotit, ᴋitorngauvotille; ᴋitorngauguville, Gûdemittauᴋ kingormgujijuksaugivotit Kristusikut.

⁸ Ilipsele taipsomane Gûde ᴋaujimanginapsiuk, ingergarmik Gûdeungitut kivgartulauᴋpase.

⁹ Mânale Gûde illitarigapsiuk, piluartomigle Gûdemut illitarijaugapse, sôᴋ sanguvigilerᴋisigîk ilusit ipkoa sangêtut ajulertullo, nutâmik kivgartoromavlugît?

¹⁰ Uvlut, taᴋᴋillo, neliutullo, jârillo uvloᴋsiorutigivase (Jûdititut).

¹¹ Sivôratigivapse sulinanga senavigilaurasugiluse?

¹² Katangutikka, ᴋenuvigivapse: Uvaptun-iniaritse, ilipsituninama. Idluitulivigilaungilapsinga.

¹³ Kaujimavapsingale, oᴋautsinik tussarnertunik oᴋâlatainalaurama ilipsingnut uvinipkut sangêtunga.

¹⁴ Ajaktornangalo nachogilaungilapsinga, uvinipkut ôktortaugama, Gûdible Engelingatut illaliulauᴋpapsinga Kristuse Jêsusetut aglât.

¹⁵ Taipsomane angijomik piloridlalauᴋpose! oᴋautigijungnarpapse imâk: ajornalaungipat ijise aglât pêjarlugit, uvamnut tunitiginajalauᴋpase.

¹⁶ Tagva tamanna pivlugo ômigilerpisingâ, okpernartomik oᴋarvigigapsê?

¹⁷ Ipkoa ilungertûtigivâse idluangitomigle; tunutserᴋojomavluse uvamnik, ilungertorᴋojomavluselo taipkoa ungagilerlugit.

¹⁸ Ilungertorneᴋ idluarpoᴋ, ajungitoᴋ pivlugo pitsainarpat, najortigigupsinga kissiane pingipat.

¹⁹ Kitorngârsukka, ama kappiaktoadlarlunga erniliarijakka, Kristusib adsinganik ilumertautsiarivluse.

²⁰ Tussudlarpungale najoromavluse mâna, assianiglo oᴋauseᴋarungnarlunga; nakimarnijutigigapse.

²¹ Oᴋautisinga, perᴋojanik kivgartoromajose, perᴋojat oᴋausertanginik tussalaungilasê?

²² Aglaksimangmat, Abrahâ maggungnik erneᴋalaungmat; aipanga arnamit kivgaujomit, aipâle arnamit kivgaungitomit.

²³ Arnable kivgaujub erninga uviningmit erniangovoᴋ; kivgaungituble erninga angersimanermut erniangovoᴋ.

²⁴ Tamakkoa oᴋautsit adsigêgutiksauvut. Tâpkonunga (taijaungmanik) Testamentik magguk; aipâ ᴋaᴋᴋamit Sinaimit pijoᴋ, kivgartortuksanik ernilijoᴋ; tagva Hagar.

²⁵ Kaᴋᴋaᴋ Sinai Arabiamêngmat; tâpsomale (Hagarib) Jerusalem neliunerme tamattomanêtoᴋ adsigigivâ, kivgaujoᴋ ᴋitorngane illagivlugit.

²⁶ Jerusalemele pânêtoᴋ, tâmna kivgaungitoᴋ; tamapta tâmna anânagivavut.

²⁷ Aglaksimangmat: Kitorngisuitotit, ernisuitotit opigosugit, singaingitotit erᴋiertorlutit iggiaᴋomijârit! Aipaᴋarungnairtoᴋ ᴋitorngaᴋarnersaungmat aipaᴋartomit.

²⁸ Uvagulle, ᴋatangutikka, angersimanerub ᴋitorngarivâtigut, sorlo Isaaᴋ.

²⁹ Sorlole taipsomane uviningmit erniojub unangmidlarmago Anernermit erniangojoᴋ, mânatauᴋ taimainivoᴋ.

³⁰ Aglaille ᴋanoᴋ pivât? (Imâk:) Kivgaᴋ taimna erningalo ᴋenugikik, kivgab taipsoma erningata kingormgujiᴋatigijaksaringimago ernera Isaaᴋ.

³¹ Tagva ᴋatangutikka, arnab kivgaujub ᴋitorngaringilâtigut, kivgaungituble.