Galâtsiamiunut 3 - Labrador Inuttitut Heritage Bible

Okpernermut idluartitauneᴋ oᴋautaugannerpoᴋ.

¹ Silaitoksôjose ilipse Galâtsiamiojose! kia angakovigilauᴋpâse mikseᴋârnermik nâlegungnaitilusê? Ilipse sâpsingne Kristuse Jêsuse oᴋâlanikut adsiliorsimavoᴋ akunapsingne kikiaktortauvlune sorlo.

² Mattomingainaᴋ illiniaromavunga ilipsingnit: Perᴋojat piniarᴋojanginut, ubvalo okpernermik oᴋâlanermut Anernermik pivisê?

³ Taimak angitigijomik silaitoᴋsôvisê? Anernerme pigialertose, uviningme mâna nâjiniaromavisê?

⁴ Taimaitoᴋsoarnik sulinase siorniulauᴋisê? Sulinase pilaurupse.

⁵ Anernermik tagva ilipsingnut pititsijoᴋ, akunapsingnelo taimaitunik tatamnartitsijoᴋ, perᴋojat piniarᴋojanginut ubvalo okpernermik oᴋâlanermut taimak pivâ?

⁶ Sorlo Abrahab Gûde okperingmago tamannalo idluarnerartaujutigilaungmago.

⁷ Tamattomangat tagva ᴋaujijungnarpose, okpernermit pijut, tâpkoa Abrahâb ᴋitorngarivait.

⁸ Aglaille sivorngagut nelonaititsilauramik, Gûdib nelojut okpernermut idluarsitingmagit, Abrahâ ᴋaujitipât, ilikut kinguvârêt ilûnamatsiatik saimausertaujomârput.

⁹ Taimaimat okperneᴋartut Abrahâ okpertoᴋ saimausertau ᴋatigijomârpât.

¹⁰ Perᴋojat piniarᴋojanginik tatteᴋartut ilûnatik ôminarnermêngmatta. Aglaksimangmat: Ominarsile neliat nâlengitoᴋ tamainik aglaksimâjunik aglangne perᴋojane, malingnagillo.

¹¹ Gûdemele idluarsititaujoᴋarniangimat perᴋojat piniarᴋojanginut, nelonairsimavoᴋ; idluartoᴋ okpernerminut inôniarmat.

¹² Perᴋojalle okpernermit pingilat; inûble tamakkoa malitsiarunigit, inôtigijomârpait.

¹³ Kristusible piulilauᴋpâtigut perᴋojat ômigijautitsininganit, nangmineᴋ ôminartitaulaungmat pivluta, aglaksimangmat: Ominarsile neliat ᴋejungme nivingajoᴋ.

¹⁴ Abrahâb saimautjauninga perᴋovlugo nelojunut Kristuse Jêsusikut, Anernermik angerutaumajomik peᴋarᴋovluta okpernermut.

¹⁵ Katangutikka! Inuktut oᴋaromavunga: Inûb testamentinga nachogijauvangikalloarpoᴋ kimullônêt, naᴋitjusersimakpat, illajauvangilarlo.

¹⁶ Abrahâle kinguvâksangalo angersimaviovuk. (Gûdible) oᴋausingit imaingilat: “kinguvâksanut,” unuktôtidlugit, kissiane atausiotidlugo imâk: “kinguvâksarnut;” tâmna Kristuseovoᴋ.

¹⁷ Imâgle oᴋarpunga: Testamente imna Gûdib sivorngagut naᴋitjusilauᴋtanga Kristusemut (ilingatilugo), soᴋosertitaujungnangilaᴋ perᴋojanut, jârit 430 tamattoma kingorngagut tunimajunut; angersimaneᴋ taimak pijungnaititauniangilaᴋ.

¹⁸ Kingormgutijaksaᴋ perᴋojanut piksangortitaukpat, tagva angersimanermut tunijaunajangilaᴋ. Gûdible Abrahâmut tunilauᴋpâ angernikut.

¹⁹ Perᴋojat tagva suksauvât? Tunijaumavut ajorneᴋ pivlugo, kinguvâksaᴋ imna angersimanermik pititaulauᴋtoᴋ tikitsiarivlugo; tâpkoa tunimavut Engelit kivgartortigilugit, pijitsertub aggangitigut.

²⁰ Pijitsertorle atausênarmut pijitsertôlungilaᴋ; Gûdele atausênauvoᴋ.

²¹ Kanôᴋ? Perᴋojat tagva akkerartorᴋât Gûdib angersimaninganût? Taimaitsangilaᴋ. Omartitsijomigle perᴋojaᴋarpat, idluarsititauneᴋ tagva nelâgut perᴋojanit pinajarpoᴋ.

²² Aglaille ajortolingortilauᴋpait tamaita, okpernermut Jêsuse Kristusemut angerutaumajomik tunitsivioᴋovlugit okpertut.

²³ Okperviksarle tikerᴋârtinago, perᴋojanut saputijaulauᴋpogut palangairtauvluta, okperviksaᴋ saᴋᴋijârtuksaujoᴋ neliutsiarivlugo.

²⁴ Perᴋojat tagva sugiartautiksarilauᴋpavut Kristusemut (torârtitauvluta), idluartitauᴋovluta okpernermut.

²⁵ Mânale okperviksaᴋ tikingmat, sugiarte atanerijungnairpavut.

²⁶ Ilûnase Gûdib ᴋitorngaringmase, okpernermut Jêsuse Kristusemut.

²⁷ Ilûnase Kristusemut baptisimajose Kristuse atimagapsiuk.

²⁸ Tagvane Jûdillônêt Grîᴋillônêt, tagvane kivgallônêt kivgaungitullônêt, tagvane angutillônêt arnallônêt adsigêngitoᴋangilat; ilûnase atausiogapse Kristuse Jêsuseme.

²⁹ Kristusible pigikpase, Abrahâb tagva kinguvârivâse, kingormgujijuksaugivose angersimaneᴋ pivlugo.