Galâtsiamiunut 2 - Labrador Inuttitut Heritage Bible

Paulusib ilinganinganik Apostelinut assiminut, Pêtrusemullo. Okpernermut idluartitaunermik.

¹ Mattoma kingorngagut jârit 14 nait nângmatta, ama Jerusalemut ailaurivunga, Barnabase aiparilugo; Tituselo neksalauᴋparatauᴋ.

² Takotitjutikulle perᴋojauvlunga takpaungalauᴋpunga oᴋaᴋatigivlugit oᴋautsit tussarnertut pitjutigilugit, oᴋautigijakka nelojunut; angajoᴋaunersaᴋutaujulle piluarlugit, sulinanga aᴋpangeromananga aᴋpangeromalaungnangalônêt.

³ Titusele aipara kipijauᴋojaungilarlônêt Grîᴋeogalloartilugo.

⁴ Katangutille nelangaitut terliarsivlutik akornganut pingmatta, pingitsertorlutik kiglisiniaromavlugo kivgaunginivut Jêsuse Kristusikut pijavut, kivgaulertitsomavluta,

⁵ Anikitoarsungmiglônêt taipkununga sâlagijaujomanata nâlelaungilavut, oᴋautsit tussarnertut mikseᴋârningit ilipsingnêtsainarᴋovlugit.

⁶ Ipkoale angajoᴋaunersaᴋutaujut ᴋanoᴋ ilingalaungmangâta sivorngagut, uvanga kamangilanga; Gûde inub tautuanik kamangimat. Angajoᴋaunersaᴋutaujut taipkoa ajoᴋertuinera illalaungilât.

⁷ Kissianele tukkisileraminga oᴋâlaᴋojaujunga oᴋautsinik tussarnertunik kipimangitunut, sorlo Pêtruse (oᴋâlaᴋojaungmat) oᴋautsinik tussarnertunik kipimajunut,

⁸ (Pêtrusib illagilauᴋtangata pitsartudlarlune Aposteliotilugo kipimajunut, tâpsoma uvangatauᴋ pitsartudlarlune illagilaurivânga nelojune,)

⁹ Taipkoalo Jakobusib Kêfasiblo Johannesiblo aulatsijungortitaujut tunitsivionera saimanartomik tukkisilauramitsuk, tagva aggamnik Barnabasiblo agganginik talerpingminut tigusivut, adsigêktomiglo issumaᴋaᴋatigivâtigut uvagut nelojunut oᴋâlajuksaugapta, taipkoale kipimajunut.

¹⁰ Kissiane aklujut issumagijauᴋovlugit uvaptingnut; tamattomingalo ataruililunga pinialauᴋpunga.

¹¹ Pêtrusele Antiochiamut pingmat, akkerartulauᴋpara takoane; passijaungmat.

¹² Jakôbusemit illangit tikerᴋârtinagit, (Pêtrusib) nelojôlauᴋtut nerreᴋatigingmagit; tikingmattale pijomairlune ᴋemakpait; kipimajut illeragigamigit.

¹³ Jûdillo assingita (Pêtruse) maliklugo takkormôᴋatigivât; Barnabase aglât uivêrijaulauᴋpoᴋ takkormôᴋatigivlugit.

¹⁴ Takogapkille, oᴋautsit tussarnertut mikseᴋârningat maliklugo idluartomik arvertangimatta, Pêtruse oᴋarvigivara, ilûnatik tussâtilugit: Igvit Jûdeojotit nelojôlauᴋtutitut inôniaravit Jûdetullo iluseᴋanginavit; sôᴋ nelojôlauᴋtut inerterlugit inôniarᴋovigît Jûdit ilusingititût?

¹⁵ Uvagut Jûdeogalloarapta inûlerniptingnit idluitulijionata nelojunit.

¹⁶ Kaujimagaptale, inuk idluartitaujungnangimat perᴋojat piniarᴋojanginut, okpernermulle Jêsuse Kristusemut; uvaguttauᴋ Jêsuse Kristuse okpervigivavut, idluartitaulerᴋovluta okpernermut Kristusemut, perᴋojallo piniarᴋojanginu-ungitoᴋ; uvinilik idluarsijungnangimat perᴋojat piniarᴋojanginut.

¹⁷ Uvagulle idluartitaunasuartogut Kristusemut, nangmineᴋ sulle idluitulijutitut naipitaunajarupta, tagva Kristuse ajortomut kivgaunajarpoᴋ. Taimaitsangilaᴋ.

¹⁸ Nangmineᴋ asserortakka ama âᴋiksorupkit tapatotipunga uvamnik.

¹⁹ Perᴋojanulle toᴋungavunga perᴋojanit, Gûdemut inôjomavlunga; Kristuse kikiaktortauᴋatigivara.

²⁰ Inôvunga, uvangaungitorle, Kristusele ilumne inôvoᴋ. Mânale uviningme inôsera inôserivara okpernerme Gûdib erninganut, nagliktimnut, ingminiglo tunijomut pivlunga.

²¹ Gûdib saimarsautâ pijungnaitiniangilara; perᴋojanulle idluarsititauneᴋ pikpat, Kristuse sulinane toᴋonajalauᴋpoᴋ.