Galâtsiamiunut 1 - Labrador Inuttitut Heritage Bible

Galâtsiamiut sangusaraininginik. Paulusib Nâlekamut nangmineᴋ Apostelingorititauninganik.

¹ Pauluse Aposteliotitaujoᴋ (inungni-ungitoᴋ, inungnu-ungitorlônêt, Jêsuse Kristusemulle Gûdemullo Atâtamut, tâpsominga tupaktitsijomut toᴋungajunit;)

² Katangutillo ilûnatik uvamnêtut illagêktunut Galâtsiamêtunut.

³ Gûdib Atâtab, Nâlegaptalo Jêsusib Kristusib saimarsautingata ulapirsautingatalo illagilisetôᴋ!

⁴ Tâmna ingminik tunilauᴋpoᴋ ajornivut pivlugit, piulijomavluta silamit mattomangat ajortomit, Gûdib Atâtapta pijomajanga maliklugo.

⁵ Tâmna nakoridlartaule issoᴋangitomit issoᴋangitomut. Amen.

⁶ Tataminiarpunga, mânakut oᴋautsit tussarnertut assinginut sâsimalerêrapse, Kristusib saimarsautânut ᴋaiᴋojigimajase tunudlugo.

⁷ Asseᴋangigalloartilugo. Illangille ilaᴋematitsivut ilipsingnik, Kristusiblo oᴋausingit tussarnertut mumiktitsomavlugit.

⁸ Nangminerlônêlle uvagut, Engeliblônêt ᴋilangmit oᴋautsinik tussarnertunik oᴋâlavigikpase, oᴋâlatigilauᴋtapta ilipsingnut assinginik, taimaitoᴋ ôminarsile.

⁹ Oᴋauserilauᴋtaptitut, mâna ama oᴋarivunga: Neliatalônêt oᴋautsinik tussarnertunik oᴋâlavigikpase tunergusiapse assinginik, taimaitoᴋ ôminarsile.

¹⁰ Tagva inuillônêt Gûdiblônêt ᴋuviagijanganut mâna oᴋâlavîk? Inungnullônêt ᴋuviagijaujomavlungâ? Inungnut sulle ᴋuviagijaujomaguma, Kristusib kivgarinajatsangilânga.

¹¹ Nelojungnaitipapsele, ᴋatangutikka, oᴋautsit tussarnertut oᴋâlatigijaujut uvamnut, inungnit pingimatta.

¹² Inungmut makkoninga tunitsiviolaunginama ajoᴋertortaunangalônêt, Jêsusible Kristusib saᴋᴋertitsininganut.

¹³ Tussaumalaurapse iliornerilauᴋtamnik, taipsomane Jûdit ilusingit iluserilaurapkit, Gûdib illagêktoᴋotingit angnerpângojomik unangmidlalaurapkit, nungunasuarlugillo.

¹⁴ Jûdit ilusinginit pilualauᴋpunga, anginersamik unuktunit illamnit jâreᴋatimnit, ilungertulualaurama sivorlima ilusingit serngnigivlugit.

¹⁵ Gûdible uvamnik ingmigôlingatitsilauᴋtub anânama timingata iluanênimnit, saimanermigullo ᴋaiᴋojigilauᴋtama, idluaringmago.

¹⁶ Ernine saᴋᴋertitsomavlugo ilumne, oᴋautsinut tussarnertunut oᴋâlajuksauᴋovlunga tâpsominga nelojut akorngane; erinesuklunga tagva pivunga, uvinik auglo issumaksarsioᴋatiginagik.

¹⁷ Jerusalemullônêt tikilaungitunga sivunipkut Aposteliojunut, Arâbiamulle ailauᴋpunga, Damaskusemullo ama uterdlunga.

¹⁸ Kingorngagut, jârit pingasut nângmatta, Jerusalemut tikipunga, Pêtruse takojomavlugo, uvluniglo 15 inik uvlilauᴋpunga tâpsomane.

¹⁹ Apostelille assingit takolaungilakka, Jakôbuse kissiat, Nâlekab ᴋatangutâ.

²⁰ Tamattomingale aglagvigiluse saglungitunga, ila Gûdib ᴋaujimavânga.

²¹ Kingorngagut Sîriablo Ziliziablo nunanginut pivunga.

²² Kristusible illagêktoᴋotinginut Jûdêame takojaunanga illitarijaulaungitunga.

²³ Imâgle tussaumatuinalauᴋput, imna uvaptingnik unangmiklilauᴋtoᴋ sivorngane mâna nangminek okperijauᴋolaungitaminik okperijauᴋojilerpoᴋ oᴋâlavlune.

²⁴ Gûdelo nertorpât pivlunga.