Filippimiunut 4 - Labrador Inuttitut Heritage Bible

Paulusib sunatuinarnik kaiblaininganik. Kujalininganik tujûlauᴋtut pivlugit. Salutitsininganik.

¹ Tagva, nagliktakka ungagijakka ᴋatangutikka, ᴋuviasûtiga niaᴋôtiksaralo, taimâk sôngotsainaritse Nâlekame, naglingnartose ilipse.

² Evôdia kaiblarpara Sintiᴋelo kaiblarpara, adsigêktomik issumaᴋarᴋovlugik Nâlekame.

³ Igvittauᴋ nertornartoᴋ ikajoᴋatiga, ᴋenuvigivagit, (arnâk) tâpkoa ikajorniakik, sorsugiaᴋatigilauᴋtâkka oᴋautsit tussarnertut pivlugit, Klemense assingillo piniaᴋatikka illagilugit, atteᴋartut aglaksimajunik aglangne ômanartune.

⁴ Kuviasutsainaritse Nâlekame, amalo oᴋarpunga: ᴋuviasugitse.

⁵ Inôtsiarnise nalonairle inungnut tamainut. Nâlegaᴋ ᴋanipoᴋ.

⁶ Issumajârase sumiglônêt; ilûnainigle pijomajapsingnik Gûdemut nalonaijaileritse, tuksiarluselo ᴋenuvluselo ᴋujalivluselo.

⁷ Ullapirsautiblo Gûdemit pijub, issumasiniarutiksanit tamainit anginerpângojub ômatiselo erᴋarsautiselo pairiligit Kristuse Jêsuseme.

⁸ Tagvale ᴋatangutikka, mikseᴋârnerillo ilusitsiaringnerillo, idluarnerillo, ivjornainerillo, naglingnarnerillo, illanârêngnerillo, ilûnaita inutsiaᴋutaunerit, ᴋujanartoᴋarpallônêt, nertornartoᴋatamakkoa issumaksarsiorutigisigik.

⁹ Illinialauᴋtase, illaliulauᴋtaselo, tussalauᴋtaselo, takolauᴋtaselo uvamnit, tamakkoa piniarsigik; tagva Gûdib ullapirsaijub illaginiarpâse.

¹⁰ Angijomigle ᴋuviasûtigivara Nâlekame, mâna ama issumagijungnarapsinga (piksamnik); issumagitsainalauralloarpapsingale, piviksaᴋalaungitosele.

¹¹ Ajoᴋsarnermut taimâk oᴋauseᴋangilanga; ilûnâne nanêtarangamalônêt nâmaksijuksaunimnik illinialaurama.

¹² Peᴋangineᴋ sungiusimavara, peᴋaluarnerlo sungiutingmilât; tamainik tamaine sungiutivunga, aᴋeartornermiglo, kângnermiglo, peᴋaluarnermiglo, ajoᴋsarnermiglo.

¹³ Tamainik pijungnarpunga Kristuseme pitsartutitsijimne.

¹⁴ Idluartomigle pivose, kiksartilunga issumagilaurapsinga.

¹⁵ Ilipsele, Filippimiut, nangmineᴋtauᴋ ᴋaujimavose, oᴋautsit tussarnertut oᴋâlatigijautainarningane Mazedôniamit aulalaurama, illagêt assipse avâgilaungilânga, tunijineᴋ tigusinerlo issumagivlugo, ilipse kissipse.

¹⁶ Tessalônikamêtilunga aglât atausiarluse, amalo aipanganik tujortapsinga inôgutiksamnik nâmaktomik.

¹⁷ Tunitsivionasuarlunga pingilanga, peᴋangârviksaᴋarᴋojomavlusele nautsertortauniarvipsingne.

¹⁸ Tamainigle peᴋarpunga, peᴋaluarlunga aglât; ununârviovlunga neksartitaunipsingnik pigama Epafroditusemit, tamadja tipitsiariksautiksaᴋ, tunergut takominartoᴋ, ᴋuvianartorlo Gûdemut.

¹⁹ Gûdimale tunitsivigilise ajoᴋsarungnairutiksapsingnik tamainik, akluinerminut ânanaunerme, Kristuse Jêsusikut.

²⁰ Gûdivulle Atâtavullo nâlengnarsile issoᴋangitomit issoᴋangitomut. Amen.

²¹ Ivsornaitut ilûnaita salutisigik Kristuse Jesuseme. Katangutigêt uvamnêtut salutipâse.

²² Ivsornaitut ilûnatik salutipâse, ataniviksûble iglunganêtut piluardlutik.

²³ Nâlegapta Jêsusib Kristusib saimarsautingata illagilise ilûnase. Amen. Filippimiunut aglaktaumajut Rômamit Epafroditusib naksalauᴋpait.