Filippimiunut 3 - Labrador Inuttitut Heritage Bible

Ajoᴋertuijut nalangaitut ulloreagijauᴋojauninginik. Idluarnermik okpernermit pijomik; piloringnartoᴋsûblo ᴋilangmêtub pinasuartauᴋojauninganik.

¹ Amatauk ᴋatangutikka, ᴋuviasugitse Nâlekame! Aglakka ilipsingnut adsigêtsainarmatta, ᴋunutigingilakka, ilipselo nakimarnitailijutigiluarivase.

² Kingmit nautsertorsigik, ajoᴋertuinerluktut nautsertorsigik, illakungortitsijut nautsertorsigik.

³ Uvagut kipimaniogapta, Gûdemik kivgartortogut anernerme, nertôtivlutalo Kristuse Jêsusemik, uvinik tatiginago.

⁴ Nertôtijungnaralloartungatauᴋ uvamnik uvinipkut. Assimnik uviningmigut tatteᴋarasugijoᴋarpat nangminerminik, peᴋaluarajarpunga uvanga.

⁵ Uvlut sittamaujungane, kipimanerama, Israêlib kinguvânginut ilingajunga Benjaminib kinguvârivânga, Ebrêerinit Ebrêereojunga, perᴋojanik nâlengnermut Farisêereojunga.

⁶ Ilungertornermut unangmiklertôlauᴋtunga illagênik, perᴋojat idluarnerainingitigut pidlaraksaulaungnanga.

⁷ Uvamnulle atornartôlauᴋtut, piungilutarivakka Kristuse pivlugo.

⁸ Ila angijomik piungilutarivakka tamaita, pijomavlugo idluarᴋejangat, illitarsineᴋ Kristuse Jêsusemik Nâlekamik; tâmna pivlugo tamaita piungilutarilauᴋtakka, aktarlukugivakkalo, Kristuse pijomavlugo.

⁹ Tâpsomane naipitaujomavlunga, idluarsineᴋarᴋonanga perᴋojanit pijomik, okpernermille Kristusemut pijomik, idluarsinermik Gûdib ilingatitanganik okpernermut;

¹⁰ Illitarijomavlugo tâmna, makiningatalo pitsartuninga, siorniorningalo illangiubvigijomavlugo, toᴋunga adsiginiarlugo uvanga,

¹¹ Toᴋungajut makiviksanganut pagrearomavlunga.

¹² Imaingilaᴋ, tigumajarêrapko, nâmaksijarêrlungalônêt; pinasuarparale tigujungnarmangâpko, uvangatauᴋ tigujaumangnimigama Kristuse Jêsusemut.

¹³ Katangutikka, issumangilanga nangminimnik tigumajarêrapko. Atautsemigle oᴋarpunga: Tunumnêtut piugorpakka, sivunimnêtulle issagutigivlugit.

¹⁴ Torârviksaᴋ torârvigidlarasuartara, pivianartoᴋsoaᴋ pijomavlugo, tamattomunga Gûde ᴋilangmit ᴋaiᴋojingmat Kristuse Jêsuseme.

¹⁵ Nelivut tagva nâmaksijogut taimâk issumaᴋalerta; sumiglo assianik issumaᴋarupse, tamanna Gûdib saᴋᴋijârtiliuk ilipsingnut.

¹⁶ Ajoᴋertûtsemik atautsemik pititaumagapta, taimâk arvertalauᴋtâ, adsigêktomik issumaᴋaᴋatigêkluta.

¹⁷ Katangutikka, malingniarsinga, taimaglo arvertartut nautsertorsigik, sorlo uvaptingnik igjaraksaᴋarapse.

¹⁸ Unuktut arvertarmatta (assianik), taipkoninga oᴋauteᴋattalauᴋtapse, mânaletauᴋ ᴋugviordlunga oᴋautigivakka, Kristusib kikiaktortauninganik ningarosuktut.

¹⁹ Taipkoa asserornermik naggateᴋaromârput, natjatik Gûdigivlugo pijut, kangusûtiksaujunik nertornauteᴋardlutik nunab pinginik pinasuartut.

²⁰ Arvertarnivulle ᴋilangmêpoᴋ, takpângallo nerriugivavut piuliklerte Jêsuse Kristuse Nâlegavut.

²¹ Tâpsoma timivut ajulertoᴋ ablatsângortitsomârpâ, timiminut ânanaudlartomut adsiutilugo, pitsartunermut, ajugaringitaminut tamaita ingminut nâlektilugit.