Filippimiunut 2 - Labrador Inuttitut Heritage Bible

Kristuse maliklugo piojorijuiᴋojaunermik. Timôteuse Epafrodituselo pivlugik.

¹ Ilipsingne tagva kaiblaijoᴋarpat Kristuseme, manigoijoᴋarpat naglingnerme, illagêktoᴋarpat Anernerme, ômamut naglingniktoᴋarlunelo nâpkiniktoᴋarpat;

² Kuviasûtiksara tagva nâmaksitiniarsiuk, issumaᴋaᴋatigêngnipsingnut, nagliᴋatigêngnipsingnullo, illagêngnipsingnullo, atausionipsingnullo;

³ Sunamik piniarase akkerartornermut nertornauteᴋaromamullo nunguniartomik; piojoringinermulle illase opiginersarisigik ilipsingnit nangmineᴋ.

⁴ Ilûnaselo atunit pipsingnik nangminipsingnik piniarase, ilapsele pinginik issumaᴋaritse.

⁵ Ilûnase issumaᴋaritse Jêsusib Kristusib issumaᴋarningatut.

⁶ Tâmna Gûdetun-ikalloarame, nertornautigilaungilâ, Gûde adsigivlugo:

⁷ Ingminigle nikanarsâlauᴋpoᴋ, kivgatun-ilerdlune; inutuinaᴋ adsigililauᴋpâ, inutuinaujotullo ilinganinga naipitaulauᴋpoᴋ.

⁸ Ingminik miklilerdlune nâlainalauᴋtoᴋ toᴋomut, toᴋomut seningajolingme aglât.

⁹ Tamanna pivlugo Gûdib nâlegaviksoangortilauᴋpâ, atteᴋartilâllo atternit tamainit anginerpângojomik.

¹⁰ Jêsusib attingane sêrᴋut ilûnatik sêrᴋortortuksaungmatta nâlengnermut, ᴋilangmêtullo nunamêtullo, nunab atanêtullo:

¹¹ Oᴋallo ilûnatik nalonaijaijuksaungmatta Jêsuse Kristusemik Nâlegaujomik, Gûdib Atâtab nitornautinganut.

¹² Taimaimat nagliktakka, sorlo nâletsainalaurapse, najorapse kissianeungitoᴋ, mânaletauᴋ anginersamik aglat apsimatilunga, piulijauniksase piniarsiuk kuksasukluse sajukluselo.

¹³ Gûde tagva pititsijoᴋ ilupsingne pijomanermiglo nâmaksititsinermiglo, idluarijane pitjutigilugo.

¹⁴ Tamainik piniaritse ᴋunutuiluse ᴋolaraselo;

¹⁵ Passijaksauᴋonase idluarkovluselo, Gûdemut ᴋitorngaulerdluse, pidlaraksaunase inuᴋatigêt oᴋautsarêtut mumiksimajullo akorngane, tâpkonane ᴋaumaniogapse nennergoatitut nuname;

¹⁶ Oᴋauseᴋ inôjutaujoᴋ atavigênarlugo; tamattominga Kristusib uvluksangane nertornauteᴋarᴋovlunga, sulinanga aᴋpangilaunginama, sulinangalônêt sanalaunginama.

¹⁷ Augale kovijaukpallônêt okpernipsingnut, Gûdemik kivgartûtigijapsingnut, tunergutaujomut sorlo, ᴋuviasukpunga, ilûnaselo ᴋuviasuᴋatigiluse.

¹⁸ Tamanna ilipsetauᴋ ᴋuviasûtigijaksarivase, ᴋuviasuᴋatigijaksarivapsingalo.

¹⁹ Nerriukpungale Nâlekame Jêsuseme, mânakassakut Timôteuse tiliniarapko ilipsingnut, uvangatauᴋ nakoᴋsijauᴋovlunga, ᴋanoᴋ ilinganipsingnik tussaruma.

²⁰ Nilâgôrtomik issumaᴋateᴋanginama assianik, tâpsotunaᴋ ômamut (pijariaᴋarnipsingnik) issumagivluse pijomik.

²¹ Ilûnatik nangminitik issumagingmagit, Kristusib Jêsusib pingit issumaginagit.

²² Tâmnale ᴋaujimavase idluartoᴋsôngmat; sorlo atâtab ᴋitorngane kivgartoᴋatigingmago, taimâk kivgartoᴋatigilauᴋpara oᴋautsinik tussarnertunik.

²³ Nerriukpungale tâmna tiliniarlugo tagvainaᴋ, tukkisitualeruma ᴋanoᴋ ilinganiarmangârma.

²⁴ Nâlekamele sungertûteᴋarpunga, nangmineᴋtauᴋ uvanga mânakassâkkut tikiniarapse.

²⁵ Pijariaᴋarasugijarale, tilivlugo ilipsingnut Epafrodituse ᴋatangutiga, piniaᴋatigalo, sorsugiaᴋatigalo, ilipselo tililauᴋtase, uvangalo pitsiartiga ajoᴋsarnimne.

²⁶ Ilûnase kipiniarvigilaungmase, angijomiglo issumajâlauᴋpoᴋ, tussaumagapse ᴋanimalaungninganik.

²⁷ Ila ᴋanimadlalauᴋpoᴋ toᴋoniarᴋôrdlune, Gudible nâpkigilauᴋpâ; tâmnale kissimeungilaᴋ, uvangeletauᴋ, kappiasungnikka unuksivalliatitauᴋonagit.

²⁸ Tamanna pitjutigillugo tuavi tilivara ᴋuviasuᴋovluse takolermigupsiuk, uvangalo kiksarnikinersauᴋovlunga.

²⁹ Illaliorsiuk tagva Nâlekame ᴋuviasutsiarluse; taimaitullo opigisigik.

³⁰ Kristusib piniarᴋojangit pivlugit toᴋo ᴋanidlalaungmago, inôtsine ivlerinikidlaramiuk, kivgartoromavlunga innangerdluse.