Filemônemut 1 - Labrador Inuttitut Heritage Bible

Filemône ᴋenuvigijauvoᴋ, kivgane Onêsimuse issumagijungnaivigilugo, ᴋemalaungmago.

¹ Pauluse, Jêsusib Kristusib (kivganga) ᴋelaksugaᴋ, Timôteuselo ᴋatangutinga, Filemônemut naglingnartomut piniaᴋatiptingnut,

² Apphiamullo (arnamut) naglingnartomut, Arᴋippusemullo sorsugiaᴋatiptingnut, okpertoᴋatigênullo iglungnêtunut.

³ Gûdib Atâtapta, Nâlekablo Jêsusib Kristusib saimarsautingata ullapirsautingatalo illagilisetôᴋ!

⁴ Gûdiga ᴋujagivara, issumagitsainarlutit tuksiarnimne;

⁵ Tussaumagama naglingerijarnik okpernerijarniglo Nâlekamut Jêsusemut, ivsornaitunullo tamainut.

⁶ Okperneᴋaᴋataunît pitsartutitauᴋovlugo, illitarsinarmut ajungitunik tamainik ilipsingnêtunik Jêsuse Kristusikut pijunik.

⁷ Naglingnîlle ᴋuviasûtigivavut angijomik manigortigilugolo; ivsornaitut ômatingit nakoᴋsititaungmatta ilingnut, ᴋatangutiarsuvut.

⁸ Taimaimat sivôraluârsungikalloartunga Kristuseme, piniaraksarnik perᴋolutit,

⁹ Naglingnermulle kaiblatuinarnersarivagit, uvanga imaitunga Pauluse inutoᴋaujunga, mânale ᴋelaksugaujungatauᴋ Jêsuse Kristuse pivlugo.

¹⁰ Kaiblarpagit tagva, ernera Onêsimuse pivlugo, ᴋelaksorsimanimne ernertârijara:

¹¹ Neliutome anigortome atulaungitoᴋ ilingnut, mânale ilingnut uvamnullo atortuksaulertoᴋ, tâmna utertilugo tilivara.

¹² Igville tâmna, tagva ômatiga, illaliolauruk.

¹³ Uvamnêtsainarᴋojomalauralloartara kivgartortigivlugo simerdlutit, ᴋelaksorsimanimne oᴋautsit tussarnertut pivlugit;

¹⁴ Perᴋojijomatinagle pijomalaungitaga, perᴋojaunermit ajunginiarnît perᴋonago, ᴋununginermille.

¹⁵ Imaᴋâ tamanna pitjutigilugo anikitomik ilingnit avilaungnerpoᴋ, issoᴋangitomut ilingnêtsainarᴋovlugo;

¹⁶ Mâna kivgatun-itsungnairlune, kivgaujomille anginersaujotut, ᴋatangutitut naglingnartotut; uvamnut angijomik, angiluartomigle ilingnut, uviningme Nâlekamelo.

¹⁷ Tagva illagijaktut-inasugigumga, illalioruk uvangaujârtilugo.

¹⁸ Sumigle idluitulivigilauᴋpatit, akkiliksaᴋarpallônêt ilingnut, uvamnut ilingatilaukit.

¹⁹ Uvanga Pauluse aggamnut nangmineᴋ aglakpunga, uvanga akkilerniarpakka. Oᴋarvigingigalloarpagit, uvamnut akkiliksaᴋaravit ilingnik nangmineᴋ.

²⁰ Ila, ᴋatangutiarsuga, ᴋenuvlunga pivagit, ᴋuviasûtigilagit Nâlekame; ômatiga nakoᴋsititsuk Nâlekame.

²¹ Nâlengniaravit sungertûtigivlutit aglagvigivagit; nelungilangatauᴋ, oᴋautsima angerᴋejanginik piniaravit.

²² Tamanna illavlugo siniktarviksamnik pinialerit; nerriukama tuksiarnise pitjutigivlugit tunijauniartunga ilipsingnut.

²³ Epafrasib ᴋelaksorsimaᴋatima Kristuse Jêsuse pivlugo,

²⁴ Marᴋusiblo, Aristarᴋusiblo, Dêmasiblo, Lukasiblo piniaᴋatima salutipâse.

²⁵ Nâlegapta Jêsusib Kristusib saimarsautingata anernise illagilitsuk. Amen. Tamakkoa aglaktaumajut Rômame Onêsimusib neksalauᴋpait.