Exodus 9 - Labrador Inuttitut Heritage Bible

Nûsilingnartok; ajuat puppiksoalît; nattarᴋonâluit.

¹ Nalegak tagva oᴋarpok Mosesemut: Faraomut oᴋariartorit: Imâk Nâlegak Ebrêerit Gûdingat oᴋarpok: Inuᴋotikka aularᴋokit, kivgartorvigijaksaringmanga.

² Aularᴋolugille ᴋunudlaruvit, noᴋangatitsomavlugit sulle,

³ Ahâk, tagva Nâlekab aggangit nergjuteᴋotingnut naternamêtunut pijuksauvut: horsinullo siuterᴋortojunullo kamêlinullo tuktuvangnullo saukanullo, sugaluluartomik nûsiliktilugit.

⁴ Nâlekablo Israêlikut nergjuteᴋotingit Egiptenemiullo nergjuteᴋotingit adsigêngitiniarpait, Israêlikut nangminerijanginit toᴋojoᴋartuksaungimat atautsemiglônêt.

⁵ Nâlekablo ᴋaujijautinivâ piviksanga taimâk, oᴋarlune: ᴋaupat Nâlegak taimailiorniarpok nuname.

⁶ ᴋaungmalle, Nâlegak taimailiorpok, Egiptenemiullo nergjuteᴋotingit sunatuinait nûsilikput, Israêlikulle nergjuteᴋotinginit toᴋojoᴋalungilak atautsemiglônêt.

⁷ Faraolo takosaijoᴋarᴋojingmat, nute, Israêlikut nergjuteᴋotinginit toᴋungajoᴋalungilak atautsemiglônêt. Taimaigalloarmalle, Faraub ômatinga mangaitipok, inuillo aularᴋongilait.

⁸ Tagva Nâlegak oᴋarpok Mosesemut Aronemullo: Tigusileritik paumik kiaksautemit, itimâktik tatalugit, Moseselo siamangatitsile makkoninga ᴋilangmut Faraub sângane,

⁹ Egiptenib nunanganut ilûnânut pujungolerᴋovlugit ajuangolerᴋovlugillo puppiksoalît inungnelo nergjutinelo, Egiptenib nunangane ilûnâne.

¹⁰ Tagva paumik tigusivlutik kiaksaumit nangeriartorpuk Faraub sânganut; Moseselo siamangatitsingmat makkoninga ᴋilangmut, ajuangorput inungnelo nergjutinelo.

¹¹ Ilisimajullo nangerlutik Mosesib sângane ajulerput ajuanut, ajualulermata ilisimajut Egiptenemiullo ilûnnamatsiatik.

¹² Nâlekable Faraub ômatinga mangaitipâ, tusaromangilaglo tâpsoma, sorlo Nâlegak oᴋarmat Mosesemut.

¹³ Nalegak tagva oᴋarpok Mosesemut: ᴋaupat uvlârorlutit nangeriartorit Faraub sânganut, oᴋautivlugolo: Nâlegak Ebrêerit Gûdingat oᴋarpok imâk: Inuᴋotikka aularᴋokit, kivgartorvigijaksaringmanga!

¹⁴ (Kunuleruvit) tamattomane kapiasûtaurᴋojakka tamaita tilijomavakka ilingnuluatsiak kivgarnullo inuᴋotingnullo, tukisilerᴋovlutit uvaptun-itoᴋangimat nuname ilûnâne.

¹⁵ Aggakka isaklugit mânna sugiarama ilingnik inuᴋotingniglo nûsilingnartomut, pêjartaunajarᴋaugalloarpotit nunamit.

¹⁶ Tamanna pivlugole inûlivagit, pitsartunera takuksautitsomavlugo ilingnut, ateralo oᴋautigijaurᴋovlugo nuname ilûnâne.

¹⁷ Sulle atangusiguvit inuᴋotimnut, aularᴋojomanagit,

¹⁸ Ahâk, tagva ᴋaupat nalliutome tamattomane nattarᴋonâlungnik sugaluluartunik silalurᴋojijomavunga, sorlo Egipteneme pijoᴋalaungimat nunab mattoma pigiarninganit mânna tikidlugo.

¹⁹ Taimaimat tiliklerit mânna, nergjuteᴋotitit ilûnnamatsiatiglo perᴋutitit naternamêtut torᴋortautilugit. Inuit nergjutillo ilûnnamatsiatik natername naipitauniartut katersortaungitullo iglunut, nattarᴋonâluit katagvigikpagit, toᴋoniarput.

²⁰ Tagva Faraub kivgangita ilangita, Nâlekab oᴋausinganik kiksasuktut, kivgatik nergjuteᴋotitiglo ᴋemârᴋovait iglunut.

²¹ Ilangitale, Nâlekab oᴋausinganik erᴋasungitut, kivgatik nergjuteᴋotitiglo naternamêtuarᴋovait.

²² Tagva Nâlegak oᴋarpok Mosesemut: Aggaktit isakit paunga ᴋilangmut, nattarᴋonarᴋovlugo Egiptenib nunanganut ilûnânut, inungnut nergjutenullo, perorsianullo perorsêvingnêtunut ilûnnamatsianginut nuname Egipteneme.

²³ Mosesiblo ajaupiaᴋotine isautingmago ᴋilangmut, tagva Nâlegak kallertitsivlunelo nattarᴋonartitsivok, ikomalo katakpok nunamut. Taimâk Nâlegak nattarᴋonâlungnik silaluktitsivok Egiptenib nunanganut.

²⁴ Nattarᴋonartilugo, ikomamik kataktoᴋarpok, aksaujanik (ikomaujunik) nattarᴋonâluit akorngane, sugaluluartunik. Taimâk sivorngane pijoᴋalaungilak Egiptenib nunangane ilûnâne inuᴋalertainarninganit.

²⁵ Nattarᴋonâluillo nungupait Egiptenib nunangane ilûnâne tamaita naternamêtut inuillo nergjutillo, perorsiallo tamaita perorsêvingnêtut nungupait, napârtullo tamaita naternamêtut navikpait.

²⁶ Gosenemele, Israêlikut nunagijangane, kisiane nattarᴋonâlungnik kataktoᴋalungilak.

²⁷ Tagva Farao tiliklerpok, Moseselo Aronelo ᴋairᴋovlugik, oᴋautivlugiglo: Tamattomane idluitulivunga; Nâlegak idluartôvok, uvangale inuᴋotikkalo idluitoksôvogut.

²⁸ Tuksialeritik Nâlekamut, Gûdib kallidlartitsininga nattarᴋonâluillo sorairᴋovlugit; tagva aularᴋojomavapse tamânêrᴋojomairluse.

²⁹ Mosesiblo oᴋautivâ: Iglugasaksoarnit aniguma, aggakka isagomavakka Nâlekamut, tagva kallidlarungnairniarpok nattarᴋonarungnairniarlunelo, tukisilerᴋovlutit Nâlekab nuna perᴋutigingmago.

³⁰ Kisiane nallungilapse, igvit kivgatillo sulle Gûde Nâlegaᴋ sivôraginginapsiuk.

³¹ Taimâk perorsiat flaksinik gêstaniglo taijaujut nungutaumavut, gêstat sullugaineᴋarêrmata, flaksillo nuvugulâᴋarêrmata.

³² Vaitsinigle sapeltaniglo taijaujut nungutaulungilat, kinguraigamik tamakkoa.

³³ Tagva Mosese Faraomit anivok iglugasaksoarnillo, agganelo isangmagit Nâlekamut kallerungnairpok nattarᴋonarungnairlunelo, silaluglo katagungnairpok nunamut.

³⁴ Faraole takogame, silaluk kalluglo nattarᴋonâluillo sorairmata, idluituligannituinarpok, tâpsomalo kivgangitalo ômatitik mangaitipait.

³⁵ Taimâk Faraub ômatinga mangaitipok, aularᴋongilaillo Israêlikut, sorlo Nâlegak Mosesemut oᴋarmat.