Exodus 8 - Labrador Inuttitut Heritage Bible

Narrâjit, kiktoriat, niviuvait.

¹ Nalegarlo tagva oᴋarpok Mosesemut: Faraomut oᴋariartorit: Imâk Nâlegak oᴋarpok: Inuᴋotikka aularᴋokit, kivgartorvigijaksaringmanga!

² Aularᴋolugille ᴋunudlaruvit, ahâk, tagva nunagijat ilûnât pidlarniarpara narrâjitigut.

³ Kôksoak narrâjinik nâmaniarpok, ᴋaᴋivlutiglo iglungnut tikiniarput sinigvingnullo inangavingnullo, kivgavillo iglunginut, inuᴋotivillo akornganut, igavingnullo niaᴋôjaksaliorvingnullo.

⁴ Ilingnullo inuᴋotingnullo kivgarnullo tamainut narrâjit tikiniarput.

⁵ Nâlegarlo oᴋarpok Mosesemut: Arone oᴋautileruk: Ajaupiak tigumiarlugo aggaktit isaktikit kôt kôgvillo tasillo ᴋollâtigut, narrâjit timuarᴋovlugit Egiptenemiut nunanganut.

⁶ Aroniblo aggane isaktingmagit Egiptenib imangita ᴋollâtigut, narrâjit timuarput Egiptenemiut nunangat nâmavlugo.

⁷ Aglangniglo ilisimajut taimailiorivuttauk angakonermingnut, narrâjit timuartilugit Egiptenemiut nunanganut.

⁸ Tagva Faraub Mosese Aronelo ᴋairᴋovak, oᴋautivlugik: Tuksiutitinga Nâlekab sângane, narrâjinik pêjairᴋovlugo uvamnit inuᴋotimnillo, tagva inuit aularᴋojomavakka, Nâlekamut tunerguserᴋovlugit.

⁹ Moseselo oᴋarpok Faraomut: Nertôtilerit pivlunga (oᴋarvigivlunga), ᴋanga tuksiutijaksarimangâpkit kivgatillo inuᴋotitillo, narrâjit ilingnit iglungnillo pêjartaurᴋovlugit; kisiane kôksoarmêtuksauvut sulle.

¹⁰ Oᴋarpok: ᴋaupat. Kiovorlo: Sorlo oᴋaravit (taimainiarpok), tukisilerᴋovlutit Nâlegak Gûdivut naleᴋangimat.

¹¹ Tagva narrâjit ilingnit iglungnillo kivgarnillo inuᴋotingnillo pêrniarput, kisiane kôksoarmêtuksauvut sulle.

¹² Tagva Mosese Aronelo anivuk Faraomit. Mosesiblo Nâlegak tuksiarvigivâ narrâjit pitjutigivlugit pititangit Faraomut.

¹³ Nâlegarlo piniarpok, sorlo Mosese oᴋarmat; narrâjillo toᴋolerput iglune, iglut akornganelo, perorsêvingnelo.

¹⁴ Katersorpaillo tamânelo ikkânelo katitilugit, nunalo tippeludlarpok.

¹⁵ Faraole tukisigame pagvisartaujungnainerminik, ômatine mangaitipâ tusarnagik, sorlo Nâlegak oᴋarmat.

¹⁶ Nalegak oᴋarpok tagva Mosesemut: Aronemut oᴋarit: Ajaupiaᴋotit isautivlugo nunab saningit anaukit kiktoriangorᴋovlugit Egiptenemiut nunangane ilûnâne.

¹⁷ Taimailiorpuglo. Aroniblo ajaupiaᴋotine isautivlugo nunab saningit anaungmagit, kiktoriat pilerput inungnut nergjutinullo; nunab saningit ilûnnamatsiatik kiktoriangorput Egiptenemiut nunangane ilûnâne.

¹⁸ Aglangniglo ilisimajut taimailiorasuaralloarputtauk angakonermingnut kiktoriat sakᴋertitsomavlugit, sapperpulle. Kiktoriallo inungnêput nergjutinelo.

¹⁹ Tagva aglangnik ilisimajut oᴋarput Faraomut: Tamadja Gûdib aggangit! Farauble ômatinga mangaitilerpok tusaromangilaillo, sorlo Nâlegak oᴋarmat.

²⁰ Nalegarlo oᴋarpok Mosesemut: Uvlârorlutit nangeriartorit Faraub sânganut (ahâk, kôngmut ainiarpok) oᴋautivlugo: Imâk Nâlegak oᴋarpok: inuᴋotikka aularᴋokit, kivgartorvigijaksaringmanga!

²¹ Aularᴋojomangikungnele inuᴋotikka, ahâk, niviuvait tikkerᴋojomavakka ilingnut kivgarnullo inuᴋotingnullo iglungnullo, Egiptenemiut iglungit niviuvanik tatalugit nunalo nunagijangat.

²² Uvlormelo taipsomane Gosenib nunanga, inuᴋotima nunagijangat, ingmikôrniarpara niviuvaᴋartailivlugo, tukisilerᴋovlutit uvanga Nâlegaugama nuname.

²³ Adsigêngititsomavakkalo inuᴋotikka inuᴋotitillo; ᴋaupat nalunaikutaksamik taimâk pijoᴋarniarpok.

²⁴ Nâlegarlo taimailiorpok, niviuvaksuillo tikilerput Faraub iglunganut kivgangitalo iglunginut, Egiptenemiullo nunangane ilûnâne nuna sujuktaulerpok niviuvanut.

²⁵ Tagva Faraub Mosese Aronelo ᴋairᴋolugik oᴋautivak: Tamâne nunaptingne Gûdipsingnut tunerguseriartoritse!

²⁶ Mosesib kiovâ: Taimailiorupta piotsangilak, Egiptenemiut maᴋojugijanginik tunerguserajarapta Nâlekamut Gûdiptingnut; illâ, Egiptenemiut maᴋojugijanginik tunerguserupta takoane, millorajangilâtigût ujarᴋanut?

²⁷ Uvlut pingasut ingergavigivlugit ingergajomavogut inuᴋangitomut, Nâlekamut Gûdiptingnut tunerguseriartorluta, sorlo perᴋungmatigut.

²⁸ Farao tagva oᴋarpok: Aularᴋojomavapse, Nâlekamut Gûdipsingnut tunerguseriartorᴋovluse inuᴋangitomut, kisiane ungasiktomut pitailijuksauvose. Tuksiutisingatôk!

²⁹ Mosese oᴋarpok: Ahâk, anilerêruma ilingnit, Nâlegak tuksiarvigijomavara, niviuvait ᴋaupat pêrᴋovlugit Faraomit kivganginillo inuᴋotinginillo; kisiane Farao uiveriklerungnairmile, inuit tunerguseriartortailijungnairlugit Nâlekamut.

³⁰ Moseselo anigame Faraomit, Nâlegak tuksiarvigivâ.

³¹ Nâlegarlo piniarpok Mosesib oᴋausingit maliklugit, niviuvaillo pêrpait Faraomit kivganginillo inuᴋotinginillo; atautsemiglônêt amiakoᴋangilat.

³² Farauble ômatine mangaitipâ tamattomanetauk inuillo aularᴋongilait.