Exodus 7 - Labrador Inuttitut Heritage Bible

Imek aungorpok.

¹ Nalegak oᴋarpok Mosesemut: Ahâk, Faraomut Gûdetut-itipagit, Aronelo angajuit oᴋartigijaksarivat.

² Igvit perᴋojamnik tamainik ilingnut oᴋartuksauvotit, Aronible angajuvit oᴋautigijaksarivait Faraomut, Israêlikunik aularᴋojerᴋovlugo nunaminit.

³ Uvangale Faraub ômmatinga sittisititsomavara, nalunaikutat tatamnartullo (piniaromajakka) unuksitilugit Egiptenemiut nunangane.

⁴ Faraublo tusaromaniangilâtik; tagva Egiptenemiut isagomavakka, katimagajoᴋsoaᴋutikka, inuᴋotikka Israêlikut, aularutivlugit Egiptenemit sugiartauviksoatigut.

⁵ Egiptenemiullo tukisijuksauvut uvanga Nâlegaugama, Egiptenemiut isagupkit, Israêlikullo aularutikupkit akornganit.

⁶ Moseselo Aronelo taimailiorpuk; sorlo Nâlekab perᴋungmagik, taimâk iliorpuk.

⁷ Moseselo 80nik jâreᴋarpok, Aronelo 83nik jâreᴋarpok, taimâk oᴋauseᴋaramik Faraomut.

⁸ Nalegarlo oᴋarpok Mosesemut Aronemullo, oᴋarlune:

⁹ Oᴋarvigilutik Farao oᴋarpat: Tatamnartomik takuksautitsileritik! Tagva Aronemut oᴋartuksauvotit: Ajaupiaᴋotit tiguvlugo, Faraub sânganut egileruk, ᴋuglugiangortilugo.

¹⁰ Tagva Mosese Aronelo Faraomut iterpuk taimailiorlutiglo, sorlo Nâlekab perᴋungmagik. Aronible ajaupiaᴋotine egipâ Faraub kivgangitalo sânganut ᴋuglugiangortilugo.

¹¹ Tagva Faraub ilisimajut angakullo ᴋairᴋovait, tâpkoalo, Egiptenemiut ilisimajoᴋotingit aglangnik, taimailiorivut angakonermingnut.

¹² Nelliᴋârdlutik ajaupiaᴋotitik egipait ᴋuglugiangortilugit, kisiane Aronib ajaupiaᴋotingata ajaupiaᴋotingit êvait.

¹³ Taimailingagalloarmat Faraub ômatinga mangaitilerpok, tusaromangilaglo, sorlo Nâlegak oᴋarmat.

¹⁴ Nalegak tagva oᴋarpok Mosesemut: Faraub ômmatinga mangaipok, inuilo aularᴋovlugit ᴋunuvok.

¹⁵ Ailerit Faraomut uvlâkut. Ahâk, kôngmut ainiarpok, igville nangeriartorit kôb sinânut utaᴋivlugo, ajaupiarlo ᴋuglugiangolauktok tigumiaraksarivat.

¹⁶ Oᴋarvigijaksarivallo: Nâlekab Ebrêerit Gûdingata tilivânga ilingnut, oᴋautjaurᴋovlutit: Inuᴋotikka aularᴋokit, kivgartorvigijaksaringmanga inuᴋangitome. Kisiane mânna tikidlugo tusaromangilatit.

¹⁷ Imâk oᴋarpok Nâlegak: Mattomunga tukisijuksauvotit, uvanga Nâlegaugama: Ahâk, ajaupiamut tigumiartamnut kôb imanga anaugupko, ablatsângorniarpok aungorlune.

¹⁸ Mingeriat kôngmêtut toᴋolerniarput, kôglo tippiludlarniarpok, Egiptenemiullo maᴋojuginiarpât kôb imanga imerungnairlugo.

¹⁹ Nâlegarlo oᴋarpok Mosesemut: Arone oᴋautileruk: Ajaupiaᴋotit tiguvlugo aggaktit isaktikit Egiptenib imangita ᴋollâtigut, kôngita kôgvingitalo tasingitalo tasekullungitalo ᴋollâtigut, aungortilugit; auᴋartuksauvorlo Egiptenemiut nunangane ilûnnâne, imektautine ilûnnaine ᴋejungnelo ujarangnelo.

²⁰ Tagva Mosese Aronelo taimailiorpuk, sorlo Nâlekab perᴋungmagik; ajaupiarlo silluktilugo kôb imanga anaungmago Faraub kivgangitalo sângane, tagva kôb imanga ilûnnane ablatsângorpok aungorlune.

²¹ Mingeriallo kôngmêtut toᴋolerput; kôblo imanga tippiludlalermat, Egiptenemiut kôb imanga imerlugo ajulerpât; auᴋarporlo Egiptenemiut nunangane ilûnâne.

²² Egiptenemiullo ilisimajoᴋotingit aglangnik taimailiorivuttauk angakonermingnut. Taimaimat Faraub ômatinga mangaitilerpok tusaromangilaglo, sorlo Nâlegak oᴋarmat.

²³ Tagva Farao uterlune angerarpok, tamannalo ômamiutaringilâlônêt.

²⁴ Egiptenemiullo ilûnnatik kôb avatâgut itersaliorput imiksamingnik imeksiorlutik, kôb imanga imerlugo ajoramitsuk.

²⁵ Uvlullo 7nit nâvut, Nâlegak anaunerᴋârtilugo kôngmik.