Exodus 6 - Labrador Inuttitut Heritage Bible

Gûdib Mosese kivgartoriartorᴋovâ amma. Mosesib sivorlingit.

¹ Nâlegarle oᴋarpok Mosesemut: Mânna takojomârpotit, ᴋanok Faraomut ilioromârama, aggangnut pitsartujunut (aksorôtjauvlune) aularᴋojomârmagit, aggangnut pitsartujunut (aksorôtjauvlune) ᴋenugijomârmagit aglât nunaminit.

² Gudiblo Mosese oᴋarvigivâ, oᴋarlune: Uvanga Nâlegauvunga.

³ Sakᴋertipungalo Abrahamut Isaamullo Jakomullo Gûdeojunga ajugaᴋangitok, aterale una: Nalegak nalunailungitara taipkonunga.

⁴ Angervigivakka, nunamik Kânaanemik tunitjivigijomavlugit, nunamik tujormiangovigijanganik, tujormiangovlutik nunagijanganik.

⁵ Ammatauk Israêlikut nipliadlarningit tusarpakka, Egiptenemiut kivgartortingmagit; angersimaneralo erᴋaumavara.

⁶ Tamanna pivlugo Israêlikunut oᴋarit: Uvanga Nâlegauvunga Egiptenemiullo siorniortitsininginit aularutijomârpapse, nûtiluse kivgartortitsininginit, piulivluse talikut isamijokut, sugiartauviksoakullo.

⁷ Ilalioromârpapselo inuᴋotigijomavluse, Gûdeojomavungalo ilipsingnut: Tukisijuksauvoselo uvangaugama Nâlegak Gûdise aularutijise Egiptenemiut siorniortitsininginit.

⁸ Itertitsomavapselo nunamut isagutigijamnut (angerama) tunijomavlugo Abrahamut Isaamullo Jakomullo; ilipsingnut tamanna tunijomârpara perᴋutautilugo ilipsingnut, uvanga Nâlegaujunga.

⁹ Mosesiblo tamakkoa oᴋautigivait Israêlikunut, tusalungilâlle mungunermut, oᴋumainartomiglo kivgartorᴋojaunermut.

¹⁰ Tavga Nâlekab Mosese oᴋarvigivâ, oᴋarlune:

¹¹ Farao Egiptenemiut ataningat oᴋautijartoruk, aularᴋojilerᴋovlugo Israêlikunik nunaminit.

¹² Mosesible Nâlegak oᴋautivâ, oᴋarlune: Ahâk, Israêlikut tusangilânga, ᴋanok tagva Faraub tusarniarpângâ ᴋangasinâᴋartunga kippisimangitûngnik?

¹³ Nâlegarle oᴋarpok Mosesemut Aronemullo, pijaksaᴋartilugik Israêlikunut, Faraomut Egiptenemiut ataninganut aularutjaurᴋovlugit Egiptenemit.

¹⁴ Tamadja atâtaᴋaᴋatigêne angajoᴋaujut: Rubenib, Israêlib ernerirᴋârtangata erningit: Hanok, Pallu, Hitseron, Karme; tagva ilagêt Rubenemit pijut.

¹⁵ Simeonib erningit: Jemuel, Jamin, Ohad, Jakin, Soggar, Saulelo, arnab Kânaanemiub erninga; tagva ilagêt Simeonemit pijut.

¹⁶ Tamadja Levib erningita atingit ilagêngningillo: Gerson, Kagat, Merari; jârillo Levib inôvigijangit tagva jârit 137.

¹⁷ Gersonib kinguvângit: Libnilo Simeilo ᴋitorngarêngningillo.

¹⁸ Kagatib kinguvângit: Amra, Itsear, Hebron, Usiele. Jârillo Kagatib inôvigijangit tagva jârit 133.

¹⁹ Merarib kinguvângit: Maheli Musilo. Tamadja Levikut ᴋitorngarêngningit ilagêngningillo.

²⁰ Amrablo adsane Jokiba nuliarilerpâ; tâpsomangat Aronelo Moseselo ernertârivak. Jârillo Amrab inôvigijangit tagva jârit 137.

²¹ Itsearib kinguvângit: Kora, Nifag, Siggeri.

²² Usielib kinguvângit: Misael, Elsafa, Siteri.

²³ Aroniblo nuliarilerpâ Elisabak, Aminadab paninga, Nagusub najanga, tâpsomangallo ernertârivait Nâda, Abihu, Eleasure, Itamare.

²⁴ Korablo kinguvângit: Assire, Elkana, Abiasafe. Tagva Korakut ᴋitorngarêngningit.

²⁵ Eliasarible Aronib erningata nuliarilerpâ Putielib paningita ilangat; tâpsomangat Pinehase ernertârivâ. Tâpkoangovut Levikut sivorlingine angajoᴋaujut ilagêngningillo.

²⁶ Aronelo Moseselo tâpkoangovuk oᴋautjaujuk Nâlekamut: Aularutitikik Israêlikut Egiptenemit, katimajuit ingmikôrtilugit.

²⁷ Tâpkoangovuk oᴋartuk Faraomut Egiptenemiut ataninganut, Israêlikut aularᴋovlugit Egiptenemit, Mosese tâmna Aronelo.

²⁸ Uvlormelo taipsomane Nâlegak oᴋauseᴋarpok Mosesemut Egiptenemiut nunangane,

²⁹ Oᴋarlune: Uvanga Nâlegauvunga; Oᴋauserijakka tamaita ilingnut oᴋauseriniarpatit Faraomut Egiptenemiut ataninganut.

³⁰ Tagva Mosese kiovok Nâlekamut: Takovarma ᴋangasinâᴋartunga kippisimangitûngnik; ᴋanok tagva Faraub tusarniarpângâ?