Exodus 5 - Labrador Inuttitut Heritage Bible

Faraub ᴋununinga. Israêlikut sugaluluartomik siorniortitauvut.

¹ Kingorngane Moseselo Aronelo oᴋariartorpuk Faraomut: Imâk oᴋarpok Nâlegak Israêlib Gûdinga: Inuᴋotikka aularᴋokit, inuᴋangitome uvamnut uvloksiortuksaungmata.

² Faraub kiovak: Nâlegak taimna kinauvâ, nipinga nâlagaksarigapko Israêlikut aularᴋojaksarivlugit? Nâlegak taimna nalovara, Israêlikullo aularᴋoniatsangilakka.

³ Oᴋarpuk: Ebrêerit Gûdingata tikipâtigut. Inuᴋangitomut aularᴋolauktiguttôk uvlut pingasut ingergavigivlugit, Nâlekamut Gûdiptingnut tunerguseromagapta, ᴋanimasiâlungmut saviksoarmullônêt pijaurᴋonata.

⁴ Tagva Egiptenemiut ataningata oᴋautivak: Iliptik, Mosese Aronelo, sôk inuit sulijaksanginit ᴋikartitsomavitikîk? Pijaksaᴋarvipsingnut aituinaritik.

⁵ Faraolo oᴋarpok amma: Takovatik inuit unulualerêrtut nuname, iliptiglo ᴋikarᴋojomavatik aglât sulijaksanginit.

⁶ Faraublo uvlorme taipsomane inuit angajoᴋângit aulatsijingillo perᴋovait oᴋarlune:

⁷ Sivornganetut iliorungnaivluse ivît atortut ivitâlioriamut tunijaksarijungnairpase inungnut; nangminek ivingnik atoraksamingnik katersoijartulit!

⁸ Ivitâlle unurningit, sanajaksarijangit mânna tikidlugo, sanajaksaurᴋoniarivase, ikiglitinagit mikijomiglônêt. Erᴋeasugamik niplialerput oᴋarlutik: Gûdiptingnut tunerguseriartorta.

⁹ Angutit kivgartorvingat sugaluluartitaule, sulijaksanik ajoksarᴋonagit, oᴋautsiniglo uiverijaunartunik kamarᴋonagit.

¹⁰ Tagva anivut inuit angajoᴋângit aulatsijingillo, oᴋarpullo inungnut: Farao oᴋarpok imâk: Ivingnik tunitjiviojungnairᴋovapse.

¹¹ Ilipse nangminek ivingnik katersoijartoritse nanetuinak, sanajaksarijasele ikiglititauniatsangilat.

¹² Tagva inuit siamalerput Egiptenemut ilûnânut, ivivinernik kippanik katersoilutik ivititut atoraksamingnik.

¹³ Angajoᴋângitale ômaridlarᴋovait oᴋarlutik: Sanajaksarijase pijarêrsigik, uvloinak sanajaksat uvloinak pijarêrlugit sivornganetut iviᴋartitaugapse.

¹⁴ Israêlikullo aulatsijingit, angajoᴋât Faraub inuᴋotingita ilijangit, anaujaulerput oᴋautjauvlutik: Sôk sanajaksarijase ikpeksarlônêt uvlomelônêt pijarêngipisigîk sivornganetut?

¹⁵ Tagva Israêlikut aulatsijingit iterput nipliadlarpullo Faraomut, oᴋarlutik: Sôk kivgatit taimailiorvigivigît?

¹⁶ Ivingnik kivgatit tunitjiviojungnairput, sulele oᴋautjauvogut: Ivitâlioritse! Sunaubvalo, kivgatit anaujauvut; inuᴋotitile idluitulivut.

¹⁷ Faraole oᴋarpok: Erᴋeasukpose; Erᴋeasugapse ilâ oᴋarpose: Nâlekamut tunerguseriartorta.

¹⁸ Anititse mânna kivgartoriartorluse. Ivingnik tunitjivioniangilase, ivitâllo unurningit sanajaksarijase sanajaksarivase.

¹⁹ Tamattomuna Israêlikut aulatsijingit tukisilerput erᴋagijaunginermingnik, oᴋartoᴋarmat: Ikiglititsijuksaungilase ivitât unurninginik, uvloinak pijaksase pijarêraksarivase.

²⁰ Faraomit anigamik, Moseselo Aronelo nalaupakit utaᴋijûk.

²¹ Oᴋautivakillo: Nâlekab takonârlitik erᴋartuivlune, ominarsitigaptigut Faraomut kivganginullo, saviksoak tunivlugo agganginut toᴋotaurᴋovluta.

²² Mosesib tagva Nâlegak sâvigivâ, oᴋarlune: Nâlegak, sôk inuit ukkoa pilukpigît taimâk? Sôk tilivingâ tamaunga?

²³ Taimangat, Faraomut oᴋariartorama aterne, inuit ukkoa angiluartomik pilukpait, igvillo inuᴋotitit piulingimarikpatit.