Exodus 40 - Labrador Inuttitut Heritage Bible

Tuperterᴋojauvut. Nuvujab tupek ulikpâ.

¹ Nalekablo Mosese oᴋarvigivâ, oᴋarlune:

² Takᴋiub sivorlerpâb uvlungita sivorlerpângane tupertertuksauvotit ilagêktut tupinganik.

³ Iklerviglo kigligiutjinektalik ilijaksarivat takamunga, tachilugolo iklervik tâlutamut.

⁴ Sâlo itertitaksarivat, âᴋiksorlugillo âᴋiksortaujariaᴋartut ᴋângane; naneroaᴋarviglo itertitaksarivat, ᴋollingillo ikilugit.

⁵ Tunerguserviglo goldeojok iserluanititsivik iklerviub kigligiutjineᴋtaliub sânganut ilijaksarivat, tupiublo pângata tâlutanga âᴋiksorlugo.

⁶ Tunerguserviglo tunergutinik ôtaksanik pititaksarivat ilagêktut tupingata ivsornaitoviub pângata sânganut, tâlutarlo âᴋiksorlugo tupiub pângane.

⁷ Ubvarviglo pititaksarivat ilagêktut tupingata tunerguserviublo akorngangnut, imilugolo.

⁸ Avalullo avatânêtut âᴋikseraksarivatit, tâlutallo nivingatilugit avalut itertarvinganut.

⁹ Orksorlo mingoarutiksak tigujaksarivat tuperlo mingoarlugo, ilûnnaitalo takᴋamanêtut, ivsornaititaksarivallo perᴋutingillo tamaita: ivsornaituksauvorlo.

¹⁰ Tunerguserviglo tunergutinik ôtaksanik mingoaraksarivat perᴋutingillo tamaita, tunerguserviglo ivsornaitilugo: Tunerguserviojuksauvorlo ivsornainerpâmik.

¹¹ Ubvarviglo ikoggangalo mingoaraksarivakik ivsornaitilugiglo.

¹² Aronelo erningillo tikititaksarivatit ilagêktut tupingata pânganut ubvarlugillo imermut.

¹³ Aronelo atititaksarivat annorânik ivsornaitunik, mingoarlugolo, ivsornaitilugolo; kivgartorᴋovlugo uvamnut ajoᴋertuijônerme.

¹⁴ Erningillo tikititaksarivatit annorârtilugillo ulingnik:

¹⁵ Mingoaraksarivatillo sorlo atâtangat mingoarangne, kivgartorᴋovlugit uvamnut ajoᴋertuijônerme: mingoartauningillo ajoᴋertuijungortitaujutiksauvok nâksaungitok kinguvângitigut.

¹⁶ Taimailiorpok Mosese: Nâlekab perᴋojangit tâpsomunga tamaita maliklugit, taimailiorpok.

¹⁷ Jâriblo aipangata takᴋingita sivorlerpângata uvlungita sivorlerpângane, tupek napartitauvok.

¹⁸ Moseselo tuperterpok, manguvingillo atsungersorpait, sâtojangillo naparlugit, saningajungillo ilivlugit napajungillo naparlugit.

¹⁹ Matuksarlo ilullerpâk isipterpâ tupiub ᴋolâgut, matuksarlo silallek tâpsoma ᴋânganut ilivlugo, sorlo Nâlekab Mosese perᴋongmago.

²⁰ Kigligiutjinîllo tiguvait pôrlugillo iklervingmut, akigautîglo ilivak iklervingmut, iksivaviglo saimarvigijauvik ilivâ iklerviub ᴋânganut:

²¹ Iklerviglo itertipâ tupermut, upkolo tachititsijok âᴋiksorpâ, iklerviglo kigligiutjinektalik tachipâ; sorlo Nâlekab Mosese perᴋongmago.

²² Salo itertipâ ilagêktut tupinganut, tupiub saneranganut tachardlermut, upkub silatânut.

²³ ᴋakᴋôjallo âᴋiksorpait ᴋânganut Nâlekab sângane; sorlo Nâlekab Mosese perᴋongmago.

²⁴ Naneroaᴋarviglo pitipâ ilagêktut tupinganut, sâb akianut, tupiub saneranganut seᴋinerdlermut.

²⁵ Kollîllo ikipait Nâlekab sângane; sorlo Nâlekab Mosese perᴋongmago.

²⁶ Tunerguserviglo goldeojok pitipâ ilagêktut tupinganut, upkub sânganut;

²⁷ ᴋânganelo ikitsivok tipitsiariksautiksanik; sorlo Nâlekab Mosese perᴋongmago.

²⁸ Talutarlo âᴋiksorpâ tupiub pânganut.

²⁹ Tunerguserviglo tunergutiksanik ôtaksanik ilivâ ilagêktut tupingata ivsornaitub pângata sivorânut, tunerguserlunelo ᴋângane tunergutemik ôtaksamik, tunergutemiglo nerᴋiksamik; sorlo Nâlekab Mosese perᴋongmago.

³⁰ Ubvarviglo pitipâ ilagêktut tupingata tunerguserviublo akorngangnut, imilugolo ubvautiksamik.

³¹ Moseselo Aronelo erningillo aggatik itigatiglo ubvarpait tagvane:

³² Iterangamik ilagêktut tupinganut, najornigangamiglo tunerguservingmik, ubvarput; sorlo Nâlekab Mosese perᴋongmago.

³³ Avalullo naparpait tupiub tunerguserviublo avatâgut, tâlutarlo âᴋiksorpâ avalut itertarvinganut. Taimaglo Mosesib suliaksak pijarêrpâ.

³⁴ Tagva nuvujab ilagêktut tupingat ulikpâ, Nâlekablo ânanauningata tupek ilumavâ.

³⁵ Moseselo iterungnangilak ilagêktut tupinganut, nuvujab ᴋânganêngmat, Nâlekablo ânanauningata tupek ilumangmago.

³⁶ Nuvujjarlo ᴋangatarangat tupiub ᴋânganit, Israêlikut sivumuarput ingerganingine tamât.

³⁷ Nuvujarle ᴋangatalungipat, tagva ingergalungilat uvlok ᴋangatarvinga tikitsiarivlugo.

³⁸ Nâlekab nuvujanga tupiub ᴋânganêngmat uvlôtilugo, ikomalo ᴋânganêngmat unuarme, Israêlikut ilûnnatik takoane, ingerganingat ilûnât nâvlugo.