Exodus 4 - Labrador Inuttitut Heritage Bible

Mosese tatamnartulititauvok. Egipteneliarpok.

¹ Mosese kiovoᴋ oᴋarlune: Ahâgle, okperijomângilânga, nipigalo nâlagomângilât, oᴋaromârpulle: Nâlekab sakᴋervigitsangilâtit.

² Nâlekable oᴋautivâ: Suna tigumiarᴋiûk? Oᴋarpok: Ajaupiak.

³ Oᴋarporlo: Nunamut egileruk! Nunamullo egingmago, tagva ᴋuglugiangorpok; Mosesiblo ᴋemâlerpâ.

⁴ Nâlekable oᴋautivâ: Isaklugo pamiungagut tiguleruk! Isaklugo tagva tigungmago, aggangine ajaupiangorivok.

⁵ Okperᴋovlugit, Nâlekab atâtangita Gûdingata, Abrahab Gûdingata, Isaab Gûdingata, Jakob Gûdingata sakᴋervigingmatit.

⁶ Nâlekablo amma oᴋautivâ: Aggatit ikkiavit iluanut ilikit! Tagva aggane ikkiame iluanut ilivait, amuarmagillo sunaubva, kallaktut aputitut ᴋaᴋortigijut.

⁷ Oᴋarporlo: Amma aggatit ilikit ikkiavit iluanut! Iligivaillo amma ikkiame iluanut, amumagillo sunaubva, uviningatut ilingalerêrivut.

⁸ Tagva okperijomângikunitit, nipîllo nâlangnago tatamnartokut sivorlikut, nipît okperijomârpallaivât tatamnartokut kingorlikut.

⁹ Tatamnartugle tâpkoa maggûk okperinajangipatikik nippîllo nâlangnago, imermik ᴋallujartorit kôngmit nunamut panertomut kovilugo, tagvainak kôngmit ᴋallujat aungoromârpok nuname panertome.

¹⁰ Mosesele oᴋarpok Nâlekamut: Takûk, Nâlegak, oᴋaloritsangilanga, sivornganelônêt mânnalônêt oᴋauseᴋaravit kivgarnut, ᴋaneralo oᴋaralo oᴋumaingmanik.

¹¹ Nâlekable oᴋautivâ: Kia inuit ᴋaneᴋartipagît? Ubvalo kia oᴋajuitut tussilartullo tautuktullo tautungitullo taimaitipagît? Uvanga Nâlegak pingitungâ?

¹² Taimaimat aularit taikunga. Uvanga ᴋanît najoromavara ajoᴋertoromavagillo oᴋautigijaksarnik ᴋanok.

¹³ Oᴋarporle: Nâlegak, tililauruktôk kinalônêt tilijomajat.

¹⁴ Tagva Nâlegak ningaumajârpok Mosese pivlugo, oᴋarlunelo: Arone Leviteojok angajugingipiûk? ᴋaujimavara tâmna oᴋaloringmat. Ahâglo, pagrearpâtit, takogunitillo ômamut ᴋuviasugomârpok.

¹⁵ Tâmna oᴋarvigijaksarivat, oᴋausiksat ilivlugit ᴋaninganut. Uvangalo ᴋanît najoromavara ᴋaningalo, ajoᴋertoromavaptiglo iliortuksauniptingnik ᴋanok.

¹⁶ Tâmnalo oᴋartigijaksarivat inungnut, ilingnut ᴋanertut-ituksauvok tâmna, igvillo tâpsomunga Gûdetut-ituksauvotit.

¹⁷ Ajaupiarlo una tigujaksarivat aggangnut, tâpsomûna tatamnartunik piniartuksaugavit.

¹⁸ Moseselo aularlune uterpok sakkiminut Jêtromut, oᴋarporlo tâpsomunga: Omât, aularlangatôk! ᴋatangutikka Egiptenemêtut utervigilakka, takojomavlugit sule inôngmangâta. Jêtro oᴋarpok: Ulapirksauteᴋarlutit aularit.

¹⁹ Nâlegak oᴋarpoktauk Mosesemut Midiamêtilugo: Atê, Egiptenemut uterit, angutit ilingnik toᴋotsinasuartut ilûnnatik toᴋungmata.

²⁰ Tagva Mosese nuliane ernîngnelo ilagivlugit siuterᴋortojokullo ingergatilugit uterpok Egiptenemut, Gûdiblo ajaupianga tigumiarpâ.

²¹ Nâlegarlo oᴋarpok Mosesemut: Tikingmikuvit Egiptenemut, kamatsialerit, tatamnartunik tamainik ilijamnik aggangnut piniarᴋovlutit Faraub sângane. Uvangale ômatinga mangaititsomârpara, inuillo aularᴋojomângilait.

²² Tagva oᴋartuksauvotit Faraomut: Nâlegak oᴋauseᴋarpok imâk: Israêle tagva ernera angajuklek.

²³ Oᴋautivagillo: Ernera aularᴋojaksarivat, kivgartorᴋovlugo uvamnik. Aularᴋojomangikungne, tagva ernît angajuklek toᴋotsomavara.

²⁴ Apᴋometilugole siniktarvingme Nâlekab tikipâ toᴋonasuarlugo.

²⁵ Tagva Ziporab savik ujaraujok tiguvâ, ernimelo uviningata amingata nuvua kipivâ, itiganginullo egilugo oᴋarpok: Ilâ, auliksôvlutit uigivagit.

²⁶ Tagva pijungnairpâ. Taipsomane oᴋarpok: Auliksôvlutit uigivagit, kipimanek pitjutigivlugo.

²⁷ Nalekablo Arone oᴋarvigivâ: Aularit Mosese pagrearlugo inuᴋangitomut. Aularamelo naipipâ Gûdib ᴋakᴋangane, kunikpâlo.

²⁸ Mosesiblo Aronemut oᴋautigivait tamaita Nâlekab tilijime oᴋausingit, tatamnartullo tamaita perᴋojangit.

²⁹ Moseselo Aronelo aularpuk Israêlikut angajoᴋângit tamaita katitilugit.

³⁰ Aroniblo oᴋautsit tamaita Nâlekab oᴋauserijangit Mosesemut oᴋauserivait, tatamnartullo piniarnerivait inuit sângane.

³¹ Inuillo okpilerput; tusaramiglo Nâlekab Israêlikut takojartormagit, kapiasuktitauningillo takonârmagit, tagva okᴋungalerput opigosuklutik.