Exodus 39 - Labrador Inuttitut Heritage Bible

Kivgartortut annorângit atoriaᴋartangillo sanajauvut âtauvlutiglo Mosesemut, tâpsomalo nâmagivait.

¹ Tungujoktamillo, tungulângajomillo, aupalutsiartomillo annorâliorput kivgartornermut ilingajunik, kivgartornermut ivsornaitovingme, annorâliorpullo ivsornaitunik Aronib piksanginik, sorlo Nâlekab Mosese perᴋongmago.

² Ikiarlo sanavâ goldemit, tungujoᴋtamillo, tungulângajomillo, aupalutsiartomillo, ᴋablunâktajatsiamillo.

³ Goldelo katjukpât saglilugo, kililugolo ilerksangortipât, akulerêktilugillo tungujoktak, tungulângajorlo, aupalutsiartorlo, ᴋâblunâᴋtajatsiarlo takominarsausertaujut akornganut.

⁴ Kivilerêkutaujaliorpâlo katitaurᴋovlugo: sinîgikkut iglotut katitauvok.

⁵ Ikiangatalo tapserutâ tâpsomanêtok tâmnatsainauvok, sanajauninga maliklugo; goldemit, tungujoktamillo, tunulângajomillo, aupalutsiartomillo, ᴋablunâktajatsiamillo; sorlo Nâlekab Mosese perᴋongmago.

⁶ Alliguniglo tungujuângajunik sanavut avaliarutsilugillo goldemik, aglagvigivlugit, sorlo naᴋitjut aglagviongmat, Israêlib ᴋitorngangita atinginik.

⁷ Ilivaillo ikiab tuîgingnut, ujaraulerᴋovlugit erᴋaumajaujutiksanik Israêlikunut; sorlo Nâlekab Mosese perᴋongmago.

⁸ Sagvingmiutaliorporlo ilisimanartomik, ikiab sanajauningatut; goldemit, tungujoktamillo, tungulângajomillo, aupalutsiartomillo, ᴋablunâktajatsiamillo.

⁹ Iktoᴋerikpok; sagvingmiutak tapitarêktilugo sanavât: aggait isangningatut takitigivok, aggaillo isangningatut siliktigivok, tappitarêkporlo.

¹⁰ Ilijivigivâllo alligunik siaktunik sitamanik sanilerêktunik: siaktut sivorlît tamadja, Ruby, Topaz, Karbunkelelo: tâpkoangovut siaktut sivorlît.

¹¹ Siaktullo aipanga, Emeralde, Safirelo, Diamantelo.

¹² Siaktullo pingajuat, Ligure, Agatelo, Amitistelo.

¹³ Siaktullo sitamangat, Berile, Onikselo, Jasperelo: ilijauvut avaliarutanut goldeojunut.

¹⁴ Allikullo 12ovut Israêlib ᴋitorngangita atingit maliklugit, aglagviovlutik atinginik, naᴋitjutib aglagvioningatut, atunit ateᴋarlutik kinguvârêt maliklugit.

¹⁵ Sagvingmiutarmelo ᴋelaumgujaliorput issûgingne, goldemit ilaᴋangitomit ᴋepjarsimajomit.

¹⁶ Saneroaliorpullo maggûngnik goldeojûngnik, nuklûngniglo maggûngnik goldeojûngnik; nuklûglo atsungersorpakit sagvingmiutab isûgingnut.

¹⁷ ᴋelaumgujâglo goldeojûk ᴋepjartâk nuvivakit nuklûngnut maggûngnut sagvingmiutab isûgingnêtûngnut.

¹⁸ ᴋelaumgujâglo ᴋepjartâk goldeojûk isûgik atsungersorpakit saneroângnut, ilivlugiglo ikiab kivilerêkutaujâgingnut, sâgingnut.

¹⁹ Nukloliorpullo maggûngnik goldeojûngnik ililugiglo sagvingmiutab isûgingnut sinâgingnut, iluanut, ikiarmut sângavlutik.

²⁰ Tâpkoalo asîgingnik maggûngnik nukloliorput atsungersorlugiglo ikiab sanerâgingnut iglutut, atsungervîk sâkita nellâgingnut, ikiab tapserutingata ᴋolânut.

²¹ Sagvingmiutarlo ᴋelaksorpât nuklûngmigut ikiab nuklûgingnut ᴋelarutemut tungujoktamut ikiab tapserutingata ᴋollânêrᴋovlugo, sagvingmiutarlo atsungerudjarᴋonago ikiarmit; sorlo Nâlekab Mosese perᴋongmago.

²² Ikiablo atigiujanga sanavâ pergaimajomit, ilûnnât tungujoktamit.

²³ Atigiujarlo ᴋerᴋagut iterviᴋarpok, sorlo sorsuktuksab annorângata itervingatut, itervingalo nuilatârtauvok, allirᴋonago.

²⁴ Atigiujablo periningane paungangoaliorput tungujoktamit, tungulângajomillo, aupalutsiartomillo, ᴋablunâktajatsiamillo.

²⁵ Sivanearsuliorpullo goldeojunik ilaᴋangitomik, sivanearsuillo pitipait paungangoat akornganut atigiujab periningane, avatâgut paungangoat akornganut;

²⁶ Sivanearsuk paungangoarlo, sivanearsuk paungangoarlo, avatâgut atigiujab kivgartûtib periningane; sorlo Nâlekab Mosese perᴋongmago.

²⁷ Uliliorpullo ᴋablunâktajatsiamit sanasimatsiartomit Aronemut erninginullo,

²⁸ Nasarlugarmiglo ᴋablunâktajatsiamit, sivumiutaniglo ᴋablunâktajatsiamit, ᴋarlingniglo ᴋablunâktajatsiamit,

²⁹ Tapserumiglo ᴋablunâktajatsiamit, tungujoktamillo, tungulângajomillo, aupalutsiartomillo, nuilapaujaksajamit; sorlo Nâlekab Mosese perᴋongmago.

³⁰ Nasarlugaublo ivsornaitub sivumiutanga sanavât goldemit ilaᴋangitomit, aglagvigivlugolo aglangnik, sorlo naᴋitjutib aglangititut: IVSORNAITOK NALEKAMUT.

³¹ ᴋelaruserpâllo ᴋelarutemik tungujoktamik, nasarlugaub ᴋânganut atsungersortaurᴋovlugo; sorlo Nâlekab Mosese perᴋongmago.

³² Taimâk suliaksat ilûnnatik ilagêktut tupingane ivsornaitome pijarêrtauvut: Israêlikullo piniarput tamainik Nâlekab perᴋojijutigijangit tamaita Mosesemut maliklugit, taimâk piniarput.

³³ Tuperlo âpât Mosesemut, tupek, perᴋutingillo, saneroangit, sâtojangillo, ikârusingillo, napajungillo, manguvingillo,

³⁴ Matuksarlo saukat angusâluit aminginit aupaluktitaumajunit, matuksarlo ᴋabvît aminginit, upkoksablo tachititsijub tâlutangit,

³⁵ Iklervik kigligiutjineᴋtalik, akigautîgiglo, iksivaviglo saimarvigijauvik,

³⁶ Sâ perᴋutingillo tamaita, ᴋakᴋôjallo takonâraksat,

³⁷ Naneroaᴋarvik ivsornaitok ᴋollingillo, ilâ, ᴋollît atuinaujut perᴋutingillo ilûnnaita, orksorlo ᴋollît piksangat,

³⁸ Tunerguserviglo goldeojok, orksorlo mingoarutiksak, tipitsiariksautiksallo naimajominartut, tâlutarlo tupiub pângata piksanga,

³⁹ Tunerguservik ᴋaᴋorleojok, kilapatângalo ᴋaᴋorleojok, akigautîgik, perᴋutingillo tamaita, ubvarvik ikoggangalo,

⁴⁰ Avalut tâlutangit, napajungit, manguvingillo, avalullo itertarvingata tâlutangit, aklunângillo, kikiangillo, perᴋutillo tamaita kivgartornermut tuperme, ilagêktut tupingane,

⁴¹ Annorât kivgartûtit kivgartornermut ivsornaitovingme, annorâllo ivsornaitut Aronemut, ajoᴋertijôjomut, erningitalo annorângit kivgartornermut ajoᴋertuijônerme.

⁴² Nâlekab perᴋojijutigijangit Mosesemut tamaita maliklugit, taimâk Israêlikut suliaksat suliarivait.

⁴³ Mosesiblo sanajaujut tamaita ᴋemergovait, ahâglo, piniarsimavait sorlo Nâlegak perᴋojingmat, taimâluatsiak piniarsimavait: Mosesiblo saimauserpait.