Exodus 38 - Labrador Inuttitut Heritage Bible

Tunerguservik tunergutinik ôtaksanik. Ubvarvik. Avaluliorsimajok. Inuit tunergutingita unurningit.

¹ Tunerguserviliorporlo tunergutinik ôtaksanik ᴋejutsiarsajamit; talertut tallimatut takitigivok, talertullo tallimatut siliktigivok; Iktoᴋerikpok; talertullo pingasutut poktotigivok.

² Nakjungillo ilivait terreᴋungine sitamane; nakjungit tâmnatsainauvut: ᴋallineᴋartipaillo ᴋaᴋorlermik.

³ Tunerguserviublo perᴋutingit, argjaᴋautit, ᴋalugautillo, pôgutaujat, kapoᴋautillo, aumaᴋautillo sanavait; perᴋutingit ilûnnaita sanavait ᴋaᴋorlermit.

⁴ ᴋilapatâliorporlo nuluangojârtomik tunerguservingmut ikomaᴋarvingata atânêtuksamik ᴋerᴋane.

⁵ Auktitsivorlo nuklunik sitamanik kilapatâb ᴋaᴋorliojub isûgingnut, iniksaurᴋovlugit akigautîngnut.

⁶ Akigautiliorporlo ᴋejutsiarsajamit, ᴋallineᴋartilugiglo ᴋaᴋorlermik.

⁷ Akigautîglo kaimipak nuklunut tunerguserviub sanerâgingnêtunut, akigarianganut; tunerguservik sanavâ sâtojanit illuliotilugo.

⁸ Ubvarviliorporlo ᴋaᴋorlermit, ikoggangalo ᴋaᴋorlermit, arnat ilagêktut tupingata pângane kivgartortut tachar tûtinginit.

⁹ Tupiublo avatâ avaluliorpâ: sanerangane seᴋerngane avalut tâlutangit ᴋablunâᴋtajatsiangovut, talertut 100tut.

¹⁰ Napajungit 20ovut, manguvingillo ᴋaᴋorleojut, 20; napajullo kikiangit ikârusingillo silbereovut.

¹¹ Sanerangane tachâne tâlutaᴋarpoᴋ talertut 100tut, napajungillo 20ovut, manguvingillo 20; napajullo kikiangit ikârusingillo silbereovut.

¹² Saneranganelo kangiane tâlutaᴋarpok talertut 50tut, napajungit 10, manguvingillo 10; napajullo kikiangit ikârusingillo silbereovut.

¹³ Tukianelo kitâne talertut 50tut.

¹⁴ Tâlutat itertarviub sanianêtut igluane talertut 15tut iput; napajungit pingasut, manguvingillo pingasut.

¹⁵ Avalullo itertarvingata igluane, ikanelo mânelo, tâlutaᴋarpok talertut 15tut; napajungillo pingasut, manguvingillo pingasut.

¹⁶ Avalut tâlutangit ilûnnatik avatâne ᴋablunâktajatsiangovut.

¹⁷ Napajullo manguvingit ᴋaᴋorleovut; napajut kikiangit ikârusingillo silbereovut; ibjarutingitalo ᴋalliningit silbereovut; avalullo napajungit ikârusertauvut silberemik.

¹⁸ Avalullo itertarviata tâlutanga pinarnarsauteliortaujok sanasimavok tungujoktamit, tungulângajomillo, aupalutsiartomillo, ᴋablunâktajatsiamillo: talertullo 20tut takitigivok, talertullo tallimatut siliktigivok ᴋongmut, avalut tâlutangit poktoᴋatigivlugit.

¹⁹ Napajungillo sitamauvut, manguvingillo ᴋaᴋorleojut sitamat; kikiangit silbereovut, ibjarutingillo ᴋalliningit ikârusingillo silbereovut.

²⁰ Tupiublo avalullo avatâne kikiangit ilûnnatik ᴋaᴋorleovut.

²¹ Tamadja tagva katersortaujut tupermut ilingajut, kigligiutjineᴋtaliub tupinganut, sorlo kititaungmata Mosesib perᴋojanga maliklugo, Levikut atorianginut, Itamâb, Aronib ajoᴋertuijub erningata agganginut.

²² Bêsalêeliblo, Hurib erningata Urib erninga, kinguvârênit Judakunit, sanavait tamaita Nâlekab perᴋojijutigijangit Mosesemut.

²³ Aiparivâlo Ahâlia, Ahîsamab erninga, kinguvârênit Dânekunit, alligolerijok, ᴋaᴋiarnangitok sulijok, pinarnarsauteliortorlo tungujoktame, tungulângajomelo, aupalutsiartomelo, ᴋablunâktajatsiamelo.

²⁴ Golde ilûnnane atortaujok suliaksamut ivsornaitoviub sanajauningane ilûnâne, golde tunijaujok, talenteovok 29nik, sêkeleniglo 730nik, ivsornaitoviub sêkelinga maliklugo. ($750,000.00tut akitutigijok.)

²⁵ Silberelo, ilagênut kititaumajut tunijangit, talenteovok 100nik sêkeleniglo 1,775nik, ivsornaitoviub sêkelinga maliklugo: ($176,035.00.)

²⁶ Inungnut tamainut atunit bekamik, tagva sêkelib abvanganik, ivsornaitoviub sêkelinga maliklugo, nâvlugit kititaugiartortut, 20nik jâreᴋartut ᴋângiutijullo, tagva inuit 603,550.

²⁷ Talentenit 100nit silberemik ivsornaitoviub manguvingit, upkublo manguvingit kovijauvut, manguvit 100 talentenit 100nit, talente atausek manguvingmut atausermut.

²⁸ Sêkelenillo 1,775nit kikialiorpok napajunut, ibjarutingillo ᴋallineᴋartipait, ikâruseliorlunelo.

²⁹ Kaᴋorlerlo tunijaujok talenteovok 70nik, sêkeleniglo 2,400nik.

³⁰ Tagvangallo sanavait ilagêktut tupingata pângata manguvingit, tunerguserviglo ᴋaᴋorleojok, kilapatârlo ᴋaᴋorleojok tâpsoma piksanga, tunerguserviublo perᴋutingit,

³¹ Avalullo avatânêtut manguvingit, avalullo itertarvingata manguvingit, tupiublo kikiangit, avalullo avatânêtut kikiangit.