Exodus 37 - Labrador Inuttitut Heritage Bible

Iklervik, iksivavik saimarvigijauvik asingillo sanajauvut.

¹ Besaleelelo iklerviliorpoᴋ ᴋejutsiarsajamit: tallertut maggûtut abvatullo takitigivok, talertullo atausertut abvatullo siliktigivok, talertullo atausertut abvatullo poktotigivok.

² Iluagullo silatâgullo ᴋallineᴋartipâ goldemik ilaᴋangitomik, avaliarutaliorpâlo goldemik avatâgut.

³ Tâpsomungalo kovisivok nuᴋlunik sitamanik goldeojunik, terreᴋunginêtuksanik sitamane; tagva nuklûk maggûk sanerangane igluane, nuklûglo maggûk sanerangane igluane.

⁴ Akigauteliorporlo ᴋejutsiarsajamit, ᴋallineᴋartilugiglo goldemik.

⁵ Akigautîglo ilivak nuklunut iklerviub sanerâgingnêtunut, iklerviub akigarianganut.

⁶ Iksivaviglo saimarvigijauvik sanavâ goldemit ilaᴋangitomit: talertut maggûtut abvatullo takitigivok, talertullo atausertut abvatullo siliktigivok.

⁷ Kerubeliorporlo maggûngnik goldeojûngnik, katjuklugik iluitomit sanavak, iksivaviub saimarvigijauviub issûgingne iglugêngne;

⁸ Kerube atausek makkutsiata isuane, kerubelo atausek tâpkutsiata isuane igluane: iksivaviub saimarvigijauviub issûgingne iglugêngne sanavak.

⁹ Kerubîglo esarᴋutik isivipait ᴋollâgut, iksivaviglo saimarvigijauvik ulliklugo esarᴋumingnut, sângautilutik; iksivavingmut saimarvigijauvingmut kerubîk kênâgik sângavuk.

¹⁰ Saliorporlo ᴋejutsiarsajamit: talertut maggûtut takitigivok, tallertullo atausertut siliktigivlune, talertullo atausertut abvatullo poktotigilarme.

¹¹ ᴋalineᴋartipâlo goldemik ilaᴋangitomik, avaliarutaliorpâlo goldemik avatâgut.

¹² Pinarnarsauteliorpâlo atâta avatâgut aggait silingningititut siliktigijomik, siningalo avaliarutaliorpâ avatâgut.

¹³ Kovisivorlo tâpsomunga nuklunik sitamanik goldeojunik, nuklullo ilivait niulungita sitamat terreᴋunginut sitamanut.

¹⁴ Nuᴋlut sinakjuata atânêput, iniksauvlutik akigautîngnut sâ akigartaurᴋovlugo.

¹⁵ Akigauteliorporlo ᴋejutsiarsajamit, ᴋallineᴋartilugiglo goldemik, sâ akigartaurᴋovlugo.

¹⁶ Perᴋuteliorporlo sâmiutanik goldeojunik ilaᴋangitomik, pôgutanginik, alupsautinginiglo, ᴋajutanginiglo, ᴋallutanginiglo ᴋalluviojungnarᴋovlugo.

¹⁷ Naneroaᴋarviliorporlo goldeojomik ilaᴋangitomik: katjuksimajomik naneroaᴋarviliorpoᴋ; ikogganga, akerungillo, ᴋingmingoangoangillo, paungangoangillo, nuvugulângoangillo tâmnatsainauvut:

¹⁸ Akerᴋut 6 anivut sanerâgingnit, naneroaᴋarviub akerungit pingasut sanerangata aipânit, naneroaᴋarviublo akerungit pingasut saneranganit igluanit.

¹⁹ Kingmingoangoaliorpok pingasunik akerome atauserme, paungangoamiglo, nuvugulângoamiglo; ᴋingmingoangoaniglo pingasunik akerᴋub asiane, paungangoamiglo, nuvugulângoamiglo; taimaglo akerᴋut 6 nâvlugit anijut naneroaᴋarvingmit.

²⁰ Naneroaᴋarvingmelo ᴋingmingoangoaᴋarpok sitamanik, paungangoaniglo nuvugulângoaniglo:

²¹ Paungangoamiglo akerûk iglugêk atâne, paungangoamiglo akerûk iglugêk atâne, paungangoamiglo akerûk iglugêk atâne, akerᴋut 6it anijut tâpsomangat maliklugit.

²² Paungangoangit akerungillo tâmnatsainauvut: ilûnnane goldeovok ilaᴋangitok katjuksimajok.

²³ Kollingillo 7nit, takᴋersûtingillo, argjaᴋautingillo, sanavait goldemit ilaᴋangitomit.

²⁴ Tâmna perᴋutingillo ilûnnaita sanavait goldemit ilaᴋangitomit talentemit.

²⁵ Tunerguserviliorporlo iserluanititsivingmik tipitsiariksaumik ᴋejutsiarsajamit: talertut atausertut takitigivoᴋ, talertullo atausertut siliktigivok; iktoᴋerikpok; talertullo maggûtut poktotigivok; nakjungillo tâmnatsainauvut.

²⁶ ᴋallineᴋartipâlo goldemik ilaᴋangitomik, ᴋângalo sanerangillo avatâgut nakjungillo: avaliarutaliorpâlo goldemik avatâgut.

²⁷ Nukloliorpâlo maggûngnik goldemit avaliarutangata atâgut, terreᴋûgingne, sanerâgingne iglutut, iniksaurᴋovlugik akigautîngnut akigarianganut.

²⁸ Akigautiliorporlo ᴋejutsiarsajamit, ᴋallineᴋartilugiglo goldemik.

²⁹ Orᴋsuliorporlo ivsornaitomik mingoarutiksamik, iserluanerutiksamiglo ilaᴋangitomik tauvluᴋutenit mamaktunit, tipitsiariksautelerijub sanasôngoninga maliklugo.