Exodus 36 - Labrador Inuttitut Heritage Bible

Inuit avâgosudlarningit. Tupek atorialîllo suliarijauvut.

¹ Sulilerput tagva Bêsalêelelo Ahâlialo angutillo ilûnnatik silatujunik ômatelît, Nâlekab ilumertangit silatunermik ipaksitsiarnermiglo ᴋaujitilugit ᴋanok suliarivlugit suliaksat sunatuinait ivsornaitoviub kivgartortauninganut ilingajut, Nâlekab perᴋojijutigijangit tamaita maliklugit.

² Mosesiblo ᴋairᴋovait Bêsalêele Ahâlialo angutillo ilûnnaita silatujunik ômatelît, Nâlekab ômamiutaᴋartitangit silatunermik, ilâ, ilûnnaita ômatimigut kajungersartaujut sulijartoromavlutik:

³ Tâpkoalo tunergutit tamaita Israêlikut ᴋaitangit ivsornaitoviub kivgartortauningata suliarijauninganut, tiguvait Mosesemit, suliarijomavlugit. Sulelo uvlât tamât ᴋunulugatik ᴋaitsivigivât tunergutinik.

⁴ Angutillo silatujut ilûnnatik, suliaᴋartut ivsornaitoviub sulianganik, ilûnnatik sulivingmingnit sanavingmingnit, ᴋaivut;

⁵ Moseselo oᴋarvigivât, oᴋarlutik: Inuit âtsivut nâmatuinarlungitunik sanajaujariaᴋartunut, Nâlekab sanajaurᴋojanginut.

⁶ Moseselo perᴋojivok, ᴋaujijautitaurᴋovâlo tangmârvikkut, oᴋarlune: Angutillônêt arnallônêt tunergutiksaliorniaratik sule ivsornaitovingmut ilingajunik. Taimaimat inuit ᴋaitsitailititauvut.

⁷ Ataumajut nâmamaringmata sanajaujariaᴋartunut tamainut, angiluarpullo aglât.

⁸ Angutillo ilûnnatik silatujunik ômatelît, tupiub sanajauningane sanaᴋataujut, itsaksaliorput 10nik ᴋablunâktajatsiamit, tungujoktamillo, tungulângajomillo, aupalutsiartomillo: sanavait Kerubingoaᴋarlutik pinarnarsautenik.

⁹ Itsaksak atausek talertut 28tut takitigivok, itsaksarlo atausek talertut sitamatut siliktigivok: itsaksat ilûnnatik adsigêktomik ôktûteᴋarput.

¹⁰ Itsaksallo tallimat katipait sanilerêktilugit: itsaksallo asingit tallimat katipait sanilerêktilugit.

¹¹ Erᴋearviliorporlo tungujoᴋtamit itsaksaub siningane katiningata siningane, taimaitoliorivorlo itsaksaub asiata siningane, aipangata katiningane.

¹² Erᴋearviliorpok 50nik itsaksarme atauserme, 50niglo erᴋearviliorpok itsaksaub aipangata katiningata siningane: itsaksak atausek katitauvok asiminut erᴋearvingnut.

¹³ Erᴋeaktauteliorporlo 50nik goldeojunik, itsaksallo katipait aipâ aipaminut erᴋeaktautenut: taimaglo tupingorpok atausek.

¹⁴ Itsaksaliorporlo tuktungajut merᴋunginit tupiub ᴋalliniksanganik: itsaksat 11 sanavait.

¹⁵ Itsaksak atausek talertut 30tut takitigivok; itsaksarlo atausek talertut sitamatut siliktigivok: itsaksat 11 adsigêktomik ôktûteᴋarput.

¹⁶ Itsaksallo tallimat katipait ingmingnut, itsaksallo 6it ingmingnut.

¹⁷ Erᴋearviliorporlo 50nik itsaksaub siningane katiningane, erᴋearviliorporlo 50nik itsaksaub katitaksaub aipanganut siningane.

¹⁸ Erᴋeaktauteliorporlo 50nik ᴋaᴋorleojunik tupek katitaurᴋovlugo atausingorᴋovlugo.

¹⁹ Tuperlo matuksaliorpâ saukat angusâluit aminginit aupaluktitaumajunit, tâpsomalo ᴋângagut matuksamik ᴋabvît aminginit.

²⁰ Tuperlo sâtojaliorpâ ᴋejutsiarsajamit, napartilugit.

²¹ Sâtojak talertut 10tut takitigivok, sâtorjarlo talertut atausertut abvatullo siliktigivok.

²² Sâtojak atausek mangoᴋarpok maggûngnik, adsigêktomik tuglerêklutik: tupiub sâtojangit ilûnnaita taimailiorpait.

²³ Tuperlo sâtojaliorpâ; sâtojat 20 saneranganut seᴋernganêtomut:

²⁴ Manguviliorporlo 40nik silbereojunik sâtojat 20 atâne; manguvîngnik maggûngnik sâtojab atausiub atâne mangûgingnut maggûngnut, manguvîngniglo maggûngnik sâtojab asiata atâne mangûgingnut maggûngnut.

²⁵ Tupiublo sanerangata igluanut, tachamut sângajomut, sâtojaliorpok 20nik,

²⁶ Manguvingniglo 40nik silbereojunik; manguvîngnik maggûngnik sâtojab atausiub atâne, manguvîngniglo maggûngnik sâtojab asiata atâne.

²⁷ Tupiublo tukianut kangimut sângajomut sâtojaliorpok 6inik.

²⁸ Sâtojaliorporlo maggûngnik tupiub terreᴋunginut iglugêngnut.

²⁹ Katitauvuglo atâgut, katitauvuglo ᴋollâgut nuklomut atausermut; taimailiorpak terreᴋungine iglugêngne.

³⁰ Sâtojat 8ovut tagva; manguvingillo 16ovut silbereovlutik, manguvîngnik maggûngnik sâtojat ilûnnatik atâne.

³¹ Saningajoliorporlo ᴋejutsiarsajamit; tallimanik tupiub sanerangata igluata sâtojanginut,

³² Saningajuniglo tallimanik tupiub sanerangata iglungata sâtojanginut, saningajuniglo tallimanik tupiub tukiata kangianêtub sâtojanginut.

³³ Saningajorlo ᴋetterdlek sanavâ kaimerᴋovlugo sâtojat ᴋetterᴋangagut.

³⁴ Sâtojallo ᴋallineᴋartipait goldemik, nuklungillo saningajut iniksangit sanavait goldemit, saningajullo ᴋallineᴋartipait goldemik.

³⁵ Talutaliorporlo tungujoᴋtamit, tungulângajomillo, aupalutsiartomillo, ᴋablunâktajatsiamillo: Kerubingoaᴋartilugo pinnarnarsautenik sanavâ.

³⁶ Napajoliorivorlo tamattomunga sitamanik ᴋejutsiarsajamit, ᴋallineᴋartilugillo goldemik: kikkiangitauk goldeovut, tâpkonungalo auktitsivok manguvingnik sitamanik silbereojunik.

³⁷ Tupiublo pânganut tâlutaliorpok tungujoᴋtamit, tungulângajomillo, aupalutsiartomillo, ᴋablunâktajatsiarmillo, takominarsauteliortaumajomik;

³⁸ Napajungillo tallimat kikkiaktangit ilaliudlugit: ibjarutingillo ᴋallineᴋartipait goldemik, ikârusingillo goldemik: manguvingille tallimat ᴋaᴋorleovut.