Exodus 34 - Labrador Inuttitut Heritage Bible

Gûdib atinga oᴋâlautauvok. Gûdib Israêlikut angeᴋatigivait.

¹ Nalekablo Mosese oᴋarvigivâ: Aglagvîngnik maggûngnik ujaraujûngnik ulimarit, sivorlîk adsîgingnik: aglagvigijomavâkkalo oᴋautsinik sivorlîgingnêlauktunik serᴋomilauktângne.

² Achâgolerillo, uvlâkullo majorarit ᴋakᴋamut Sinaimut sângeriartorlungalo ᴋakᴋaub ᴋângane.

³ Inungmigle majoraᴋateᴋartuksaungilatit, inungmiglônêt takuksaujoᴋarniarane ᴋakᴋame ilûnâne; saukallônêt nergjutillônêt nerriniaratik ᴋakᴋaub tungâne.

⁴ Aglagvingniglo maggûngnik sivorlîgiktitut ullimarpok: Moseselo uvlârorpok majorarlunelo ᴋakᴋamut Sinaimut, sorlo Nâlekab perᴋongmago, aglagvigiporlo maggûngnik ujaraujûngnik.

⁵ Nâlegarlo akᴋarpok nuvujakut, nangeᴋatigivlugolo tagvane, Nâlekablo atinga oᴋâlautigivâ.

⁶ Nâlegarlo ᴋângerpok sânganut, oᴋâlavorlo: Nâlegak, Nâlegak, Gûde, nâpkigosuktok saimajorlo, kamangitsertortok nagligosuktoksôjorlo, nalâgôrtoksôjorlo,

⁷ Naglingnermik soᴋosertailitsijok tausendeoᴋatartunut, idluitulinernik tappatonerniglo ajornerniglo isumagijungnainiktok, pidlartailitsingitorle ᴋaᴋialerneᴋangitunik; atâtat idluitulininginik pidlarniktok ᴋitorngane, ᴋitorngallo ᴋitorngangine, ernerêt kingorlerêt pingajungit sitamangillo tikidlugit.

⁸ Moseselo okᴋosârpok nunamut, tuksiarlunelo.

⁹ Oᴋarporlo: Saimaneksiguma ijîkpit sângangne, Nâlegak, Nâlekama ilagilitiguttôk; Inuit ukoa tapatojoksôngmata; idluitulinivullo ajornivullo isumagijungnailaukit, kingormgutijaksautitigullo ilingnut.

¹⁰ Oᴋarporlo: Ahâk, angeᴋatigêngnelioromavunga inuᴋotingnut tamainut, tatamnartulijomavungalo sorlo nunaksoarme ilûnâne inôᴋatigêksoarnelo nalliane piniartoᴋalauᴋsimangimat: inuillo ilûnnatik najortatit takojuksauvut Nâlekab sulianganik: ᴋoaksârnarmat suliarijomajara ilingne.

¹¹ Perᴋojakka ilingnut uvlome naipertutsiarkit: Ahâk, sivunerne ᴋemâtitsomavakka Amoriterit, Kânaaniterillo, Hetiterillo, Perisiterillo, Heviterillo, Jebusiterillo.

¹² Udjertorit, nunab aivigijavit inungit angeᴋatigêngnelioᴋatigivlugit perᴋonak, nigarniutiksaurᴋonagit akunapsingne:

¹³ Tunerguservingille aseroraksarivase, gûdingoangillo serᴋomivlugit, napârtungillo nakalugit:

¹⁴ Gûdib asianut tuksiartuksaunginavit, Nâlegak, Illungertortomik atelik, Gûdeongmat ilungertortok:

¹⁵ Nunab inungit angeᴋatigivlugit, gûdingoangillo ajortuliᴋatigivlugit perᴋonak, tunerguserlutillo gûdingoanginut, tunergutingillo nerrivlugit perᴋonak, inatauguvit;

¹⁶ Tiguserᴋonaglo paninginik ernernut; paningit tagva ajortuligunik gûdingoanginut, ernitillo uerisarlugit ajortuliᴋataurᴋovlugit gûdingoanginut perᴋonagit.

¹⁷ Auktisimajunik gûdingoaliortuksaungilatit.

¹⁸ Uvloksiorvik sêrnarsauteᴋangitomik ᴋakᴋôjaktorvik uvloksiorvigijaksarivat. Uvlunik 7nenik ᴋakᴋôjaktortuksauvotit sêrnarsauteᴋangitunik, sorlo perᴋolaurapkit, takᴋiub Abibib naliutisimaningane: takᴋerme Abibeme anilauravit Egiptenemit.

¹⁹ Igliarmik angmaijut ilûnnaita perᴋutigivakka; nergjutivillo erniarirᴋârtangit angutaujut tamaita, tuktuvaglônêt saugarlônêt.

²⁰ Siuterᴋortojuble erniarirᴋârtanga tauksiutijaksarivat saugârsungmut: tauksiutilungikungnelo ᴋongesêjaraksarivat. Ernivit erniarirᴋârtangit ilûnnaita tauksiutijaksarivatit. Tunergutiksalijaranelo sakᴋijârtoᴋartuksaungilak sâmne.

²¹ Uvlunik 6inik sulijuksauvotit, uvlulle 7ingane merngoersertuksauvotit: nunab poagijartauvingane perutsiallo katersivingane merngoersertuksauvotit.

²² ᴋakᴋôjaksallo sivorlerpât katersivingata naliuninga uvloksiorvigijaksarivat, taimâktauk katersiviub jârib nâninganêtub uvloksiorvinga.

²³ Pingasuertorlutik jâreme angutiᴋotitit ilûnnatik sakᴋijârtuksauvut Nâlekab Gûdib, Israêlib Gûdingata, sângane.

²⁴ Inôᴋatigêksuit pingujaromagapkit sângnit, nunavillo kiglingit nerototitsomavlugit; nunangniglo uningartoᴋartuksaungilak majorarsimatilutit sakᴋijâromavlutit Nâlekab Gûdivit sângane pingasuertorlutit jâreme.

²⁵ Tunergusiama aunga tunerguseraksarilungilat sêrnarsautelingmik aipiujaᴋartilugo; tunergullo ᴋângerviksiorviksiut piksaᴋumitârijaksarilungilat uvlârmut.

²⁶ Nunavit paungangita sivorlît sivorlerpângat ᴋaitaksarivat Nâlekab Gûdivit iglunganut. Tuktungajoarak, sule amâmaktok, igajaksarilungilat.

²⁷ Nâlekablo Mosese oᴋautivâ: Oᴋautsit tamakkoa aglakit: oᴋautsit tamakkoa maliklugit angeᴋatigêngneliorpunga ilingnut Israêlikunullo.

²⁸ Tagvanêporlo Nâlegak ilagivlugo uvlunik 40nik unuarniglo 40nik; nerrilungilak imilungilarlônêt. Aglagvîngnullo aglakpait angeᴋatigêngnerub oᴋausertangit, perᴋojat 10.

²⁹ Moseselo atersârmat ᴋakᴋamit Sinaimit, aglagvîk maggûk kigligiutjinektalîk tigumiarlugik, atersârmat ᴋakᴋamit, Mosese ᴋaujimalungilak kêname aminga ᴋeblermat Gûde oᴋaᴋatigisimagamiuk.

³⁰ Aroniblo Israêlikullo ilûnnatik Mosese takungmatsuk, nute, kênangata aminga ᴋeblerpok; erᴋsivullo ᴋaglilerlugo.

³¹ Mosesible ᴋaigarsugvigivait; Aroniblo ilagêktullo angajoᴋângita utervigivât: Mosesiblo oᴋaᴋatigivait.

³² Kingorngagullo Israêlikut ilûnnatik tikipât: tâpsomalo oᴋâlavigivait tamainik Nâlekab oᴋauserijanginik tâpsomunga ᴋakᴋame Sinaime.

³³ Oᴋaᴋatigijungnairᴋârnagillo Mosesib kênane tâlutserpâ.

³⁴ Mosesele itermat Nâlekab sânganut oᴋaᴋatigijomavlugo tâlutane pêrpâ anerᴋârane. Anivok tagva, Israêlikullo oᴋarvigivait perᴋojaunerijaminik.

³⁵ Israêlikullo Mosesib kênanga ulernairpât, Mosesib kênangata aminga ᴋeblermat: Mosesiblo kênane tâlutserivâ iterᴋârane Gûde oᴋaᴋatigijomavlugo.