Exodus 33 - Labrador Inuttitut Heritage Bible

Mosesib inuit tuksiupait. Gûdib Mosese oᴋaᴋatigivâ.

¹ Nalekablo Mosese oᴋautivâ: Aularit, tamângat majoarit, igvit inuillo tikiutititatit nunamit Egiptenemit, nunamut angermarijutigilauktamnut Abrahamut, Isaarmullo, Jakomullo, oᴋarlunga: Kinguvâksarnut tunijomavara.

² Engelelo tilijomavara sivunipsigut; ᴋemâtitsomavakkalo Kânaaniterit, Amoriterillo, Hetiterillo, Perisiterillo, Heviterillo, Jebusiterillo:

³ Nunamut imummik igupsaujârtullo orksuanik kôlingmut: kisianele akunapsingne majuarᴋataujomangilanga; tapatojoksôgapse: nungutitserᴋonanga ilipsingnik apᴋome.

⁴ Inuillo tusaramik oᴋautsinik ukuninga tusarominaitunik kiksadlarput: nalliallo atisilungilak pinarnarsautiminik.

⁵ Nâlegak oᴋarsimalaungmat Mosesemut: Israêlikut oᴋarvigikit: Tapatojoksôvose: Tikikadlaromavunga akorngangnut sikungilarnerme, nungulutillo: taimaimat pinnarnarsautitit pêrkit ilingnit, ᴋaujimarᴋovlunga ᴋanok piniarvigijaksarimangâpkit.

⁶ Israêlikullo pinarnarsautitik pêrpait ᴋakᴋaub Hôrebib erᴋâne.

⁷ Mosesiblo tupek tiguvâ nappartilugolo tangmârterviub silatâne, atserarlugolo: Tupek kigligiutjinelik. Ilûnnatiglo Nâlekamik ᴋenertut anivut tupermut kigligiutjinelingmut, tangmârterviub silatânêtomut.

⁸ Imaiporlo, Mosese anijarangat tupermut, inuit ilûnnatik nikoviput nangerlutiglo tupermik pângine Mosese takosarlugo itersimaᴋârtinago tupermut.

⁹ Moseselo tupermut iterangat, nuvujak napajok akᴋarpok nappavlunelo tupiub pângane, Nâlekablo Mosese oᴋaᴋatigivâ.

¹⁰ Inuillo ilûnnatik nuvujaᴋ nappajoᴋ tupiub pânganêtoᴋ takovât: inuillo ilûnnatik nikoviput tuksiarlutiglo, atunit tupime pânganêdlutik.

¹¹ Nâlekablo Mosese oᴋaᴋatigivâ kênarmit kênarmut, sorlo inub ilannârijane oᴋaᴋatigingmago. Uttilerivorlo tangmârvingmut: kivganele Josua, Nunib erninga, inôsuktok, anilungilaᴋ tupermit.

¹² Mosesiblo Nâlegak oᴋautivâ: Takuit, oᴋautivarma, Inuit ukkua majuartikit: ᴋaujitilungilarmale kinamik ilaᴋarᴋoniarmangâmnga. Oᴋarsimagalloarpotit: Atterkut ilitarivagit, saimaneᴋsivotillo ijîngma sângangne.

¹³ Mânna tagga, saimaneᴋsiguma ijîkpit sângangne unertutilaunga apᴋotingnik, ilitarᴋsilerᴋovlunga ilingnik, saimanekserᴋovlunga ijîkpit sângangne: inôᴋatigêksuillo ulernairtorkit inuᴋotigigangne.

¹⁴ Kiovorlo: Najornima ilaginiarpâtit, merngoersertitsomavagillo.

¹⁵ Tâpsomale oᴋautivâ: Najornivit ilagingipanga, takpaungautiniaratigut tamângat.

¹⁶ Sunakulle ᴋaujijauniarᴋâ uvanga inuᴋotitillo saimaneᴋsigapta ijîkpit sângangne? Tamattomûnaulungilâᴋ, igvit ilagigaptigut? Taimâk aptersimaniarpogut, uvanga inuᴋotitillo, inungnit tamainit nunab ᴋânganêtunit.

¹⁷ Nâlekablo Mosese oᴋautivâ: Tamannatauk oᴋautigijat piniaromavara: saimaneᴋsigavit ijîngma sângangne, aterkullo ilitarigapkit.

¹⁸ Oᴋarporlo: Unertutjivigilaungatôᴋ ânanaunernik.

¹⁹ Tâmnalo oᴋarpok: Ajunginera tamât ᴋângertitsomavara kênavit sângagut, sângnelo Nâlekab atinga oᴋâlautigijomavara; saimauseromajakkalo saimauseromavakka, nâpkigijomajakkalo nâpkigijomavakka.

²⁰ Oᴋarporlo: Kênara takonârungnangilat, inûb takonârungnangimanga inôniarlunelo.

²¹ Nâlegarlo oᴋarpok: Takuit, iniksaᴋarpok sanimne, nangertuksauvotillo ᴋairtub ᴋângane:

²² Pijoᴋalârporlo imâk: ânanaunera ᴋângerpat, iniksaᴋartitsomavagit ᴋairtub ᴋongnângane, mattujomavagillo aggamnut ᴋângertilunga:

²³ Aggakkalo pêromavakka, tunugalo takojaksarivat: kênarale takonâraksaungilak.