Exodus 32 - Labrador Inuttitut Heritage Bible

Nochangoab sanajauninganik Gûdiblo ningarninganik.

¹ Inuillo malugosugamik Mosese atersarnasârmat ᴋakᴋamit, inuit Aronemut katersorput, oᴋarvigivlugolo: Atê, gûdingoaliortigut sivuniptigut ingergajuksanik; Mosesele imna, angut majuartitivut nunamit Egiptenemit, nalovavut ᴋanoelingamangât.

² Aroniblo oᴋautivait: Siumiutat goldeojut nuliapse ernipselo panipselo siutinginêtut pêjarsigik, ᴋailugillo uvamnut.

³ Inuillo ilûnnatik siumiutat goldeojut pêjarpait siutimingnit, âlugillo Aronemut.

⁴ Tâpsomalo tiguvait agganginit, nochangoaliorᴋârdlunelo kovimajomik, sanagutemut ilûtsetârpâ; tâpkoalo oᴋarput: Tagga gûdise, Israêle, tikiutijise nunamit Egiptenemit.

⁵ Aroniblo takogamiuk, tunerguserviliorpoᴋ sângane; Aronelo ᴋuggudlarpok, oᴋarlunelo: ᴋaupat uvloksiorviksauvok Nâlekamut.

⁶ ᴋaungmallo uvlârorput, tunerguserlutiglo tunergutinik ôtaksanik, âtsilutiglo tunergutinik ᴋujalitiksanik; inuillo ingiput nerrijomavlutik imeromavlutiglo, nikovipullo pingoaromavlutik.

⁷ Nalekablo Mosese oᴋautivâ: Atê, atersârit; inuᴋotitit tikiutijatit nunamit Egiptenemit, aserorsarmata nangminermingnik:

⁸ Sangusaraidlarput apᴋomit apᴋutaurᴋojamnit tâpkonunga: kovimajomik nochangoaliorput nangminermingnut, tuksiarvigivâllo tunerguservigilâllo, oᴋarlutik: Tagga gûdise, Israêle, tikiutijise nunamit Egiptenemit.

⁹ Nâlekablo Mosese oᴋautivâ: Inuit tamakkoa takonârsimavakka, ahâglo, inôvut tapatojoᴋsôjut.

¹⁰ Taimaimat pagvisarniarnanga mânna, ningaumajârnera ônarserᴋovlugo tâpkonunga, nungulugillo perᴋovlunga; igvillo inôᴋatigêksoangortitsomavagit.

¹¹ Mosesiblo Nâlegak Gûdine ᴋenuvigidlarpâ, oᴋarlunelo: Nâlegak, suna pivlugo ningaumajârnît ônarsivâ inuᴋotingnut, tikiutijarnut nunamit Egiptenemit pitsartunermut angijomut, aggangnullo sôngodlartunut?

¹² Sôk Egiptenemiut oᴋauseᴋartuksauvât oᴋarlutiglo: Uivênermut anitipait, toᴋoraromavlugit ᴋakᴋane, nunablo ᴋânganit nungutsomavlugit? ᴋeviarlaurit ningaumajârnernit ilungertortomit, annusingorlaurillo idluituliveᴋaromanermit ômangat piniaromajarnit inuᴋotingnut.

¹³ Abraha, Isaarlo, Israêlelo, kivgatit, erᴋaumalaukit, tâpkonunga angermarilauravit ilingnik taivlutit, oᴋautilugillo: Kinguvâksase unuksititsomavakka sorlo ᴋilaub uvloriangititut, nunalo tamanna oᴋautigijara ilûnnane tunijomavara kinguvâksapsingnut, tâpkoalo kingormgutijaksarivât isoᴋangitomut.

¹⁴ Nâlegarlo anusingorpok idluinermit piniaromajaminit inuᴋotiminut.

¹⁵ Moseselo sanguvok atersârlunelo ᴋakᴋamit, aglagvîglo maggûk kigligiutjineᴋtalîk agganginêpuk: aglagvîk iglutut aglagviovuk: aglagviovuk sâgingnelo tunûgingnelo.

¹⁶ Aglagvîglo Gûdib sanasimavak, aglaillo Gûdib aglaksimavait aglagvîngnut.

¹⁷ Josuablo inuit ᴋuggudlartut pervalungningit tusaramigit, Mosese oᴋautivâ: Unatartut ᴋuggudlarningit tusaksauvok tangmârvingme.

¹⁸ Tâmnalo oᴋarpok: Sâlaᴋartut ᴋuggudlartut nipingit tusangilakka, sâlagijaujullônêt ogguartut nipingit: tuksiartulle ᴋuggudlarningit tusarpakka.

¹⁹ Sunaubvalo, tangmârvingmut ᴋaglilerame, nochangoak oᴋigêsertullo takovait, Mosesiblo ningaumajârninga ônarsivok, aglagvîglo egipak aggaminit, serᴋomilugiglo ᴋakᴋaub atâne.

²⁰ Nochangoarlo sanajangat tiguvâ, ikitilugolo ikomamut, serᴋalilâllo argjangorlugo, imermullo siamartipâ, Israêlikullo tagvangat imertipait.

²¹ Mosesiblo Arone oᴋautivâ: Inuit tâpkoa ᴋanok piniarvigivâtît idluinermik taimâk angitigijomik passiorangne?

²² Aronelo oᴋarpok: Nâlekama ningaumajârninga ônarsiniarane: Inuit nalungilatit uivêtoᴋsôngmata.

²³ Oᴋautingmanga: Gûdingoaliortigut sivuniptigut ingergajuksanik: Mosesele imna, angut majuartitivut nunamit Egiptenemit, nalovavut ᴋanoelingamangât.

²⁴ Oᴋautivakkale: Nalliselônêt goldeᴋarpat, pêjarliuk. ᴋaipâllo uvamnut: ikomamullo egivara, nutelo, nochangoak sakᴋerpok.

²⁵ Mosesiblo inuit usingajut takogamigit; (tagva Aronib usingatilauᴋpait kangusûtiksanginut omigijingita akorngane:)

²⁶ Mosese nangerpok tangmârterviub pângane, oᴋarlunelo: Kina Nâlekamut iliovâ? Tâmna uvamnut ᴋaile. Lêviblo kinguvângit ilûnnatik katersorput tâpsomunga.

²⁷ Oᴋautivaillo: Imâk oᴋarpok Nâlegak Israêlib Gûdinga: Angutit ilûnnatik saviksoalijaulit, tangmârterviublo pângitigut utertautilutik, atunillo toᴋorailit ᴋatangutiminik, ilannârijaminiglo, inôᴋatiminiglo.

²⁸ Lêviblo kinguvângit taimailiorput Mosesib oᴋausinga maliklugo: Uvlormelo tâpsomane inuit 3,000nêtut toᴋotauvut.

²⁹ Mosese oᴋarsimalaungmat: Ivsornaileritse uvlome Nâlekamut, ilûnnase atunit ernipsigut, ᴋatangutipsigullo; saimauserluse uvlome pijungnarᴋovlugo.

³⁰ ᴋaungmallo Mosesib inuit oᴋarvigivait: Idluitulisimavose angijomik; mânnalo majoraromavunga Nâlekamut; imaᴋâ ulapᴋosêjutiksarsinajarpunga ajornise pivlugo.

³¹ Moseselo Nâlekamut uterpok, oᴋarlunelo: Kappê, inuit ukoa idluitulisimavut angijomik, nangminermingnullo gûdingoaliorput goldeojunik.

³² Mânnale idluituliningit isumagijungnairomagungne; pijomangikuville, pênga aglarangnit igvit aglaksimajarnit.

³³ Nâlekablo Mosese oᴋautivâ: Nalliata idluitulivigisimakpanga, tâmna pêromavara aglaramnit.

³⁴ Taimaimat aularit mânna, inuillo tasiorkit iniksamut oᴋautigisimajamnut ilingnut: ahâk, Engeleᴋotima sivorliniarpâtit: kisianele idluitoᴋsôningit akkiniarutigijomârpakka, uvlok akiniarnermut naliutikpat.

³⁵ Nâlekablo inuit siorniortipait, nochangoaliolauramik Aronib sanajanganik.