Exodus 30 - Labrador Inuttitut Heritage Bible

Tunerguservik iserluanititsivik tipitsiariktomik. Maligaksat inuit kititautilugit.

¹ Tunerguserviliortuksauvotillo iserluanititsivingmik tipitsiariksaumut atortuksamik: Sanajaksarivat ᴋejutsiarsajamit.

² Talertut atausertut takitigijuksauvok, talertullo atausertut siliktigivlune: Iktoᴋeriktuksauvok: talertullo maggûtut poktotigijuksauvok: Nakjungillo tâmnatsainaujuksauvut.

³ ᴋallineᴋartitaksarivallo goldemik ilaᴋangitomik, ᴋângalo sanerangillo avatâgut, nakjungillo; avaliarutalioraksarivat goldemik avatâgut.

⁴ Nuklûngniglo maggûngnik sanajuksauvotit tâpsomunga avaliarutangata atâgut, terreᴋungine, sanerâgingne iglutut sanajaksarivatit; iniksaujuksauvullo akigautîgingnut akigartaurᴋovlugo.

⁵ Akigauteliortuksauvotillo ᴋejutsiarsajamit, ᴋallineᴋartilugiglo goldemik.

⁶ Ilijaksarivallo tâlutab iklerviub kigligiutjineᴋtaliub tuglianêtub sânganut, iksivaviub saimarvigijauviub kigligiutjineᴋtaliub ᴋânganêtub naipitsivigijomajama ilingnik sânganut.

⁷ ᴋânganelo Arone iserluanititsijuksauvok tipitsiariktomik uvlât tamât; ᴋollilerijarangat iserluanititsijuksauvok tipitsiariktomik ᴋângane.

⁸ Unnungmelo Aronib ᴋollît ikijarangagit iserluanititsijuksauvok tipitsiariktomik ᴋângane, tipitsiariktomik nokᴋajuitomik Nâlekab sângane kinguvâpsigut.

⁹ Tipigiksaumik takorngartamik tunergusertuksaungilase ᴋângane tunergutimiglônêt ôtaksamik, tunergutimiglônêt nerᴋêjamik; kovisivigijaksaringilaselônêt tunergutimik imiksamik.

¹⁰ Aronelo atausiardlune jâreme ulapᴋosêjutiksalêjuksauvok nakjungine, ajortoerutjinermik ulapᴋosêjutiksab tunergutiksangata aunganut; atausiardlune jâreme ulapᴋosêjutiksalêjuksauvok ᴋângane kinguvâpsigut: tamanna ivsornainerpauvok Nâlekamut.

¹¹ Nalekablo Mosese oᴋarvigivâ, oᴋarlune:

¹² Israêlikut kititaksat kitikungne, ilûnnatik atunit tunitjijuksauvut tarnimik ulapᴋosêjutiksanganik Nâlekamut kitikungne; nûsilingnartoᴋarᴋonago akorngane kitikungne.

¹³ Kititaumajunut ilaujut atunit tunitjijuksauvut sêkelib abvangatut, ivsornaitoviub sêkelinga maliklugo: (sêkele geratut 20tut akitutigivok:) sêkelib abvangatut Nâlekab tunergusiarijaksarivâ. (Sêkele 50census-tut akitutigingoarpok.)

¹⁴ Kititaumajunut ilaujut ilûnnatik atunit, jâreᴋartut 20nik ᴋângiutijullo, tunitjijuksauvut tunergutemik Nâlekamut.

¹⁵ Akluitut anginersamik tunitjijuksaungilat, aklujullo mikinersamik sêkelib abvanganit tunitjijuksaungilat, tunitjijarangata tunergutemik Nâlekamut, tarnise ulapᴋoseromavlugit.

¹⁶ Kênaujallo ulapᴋosêjutaujut tigujaksarivatit Israêlikunit, ilingatilugillo tupiub kigligiutjineliub kivgartortauninganut; erᴋaumajaujutiksaurᴋovlugo Israêlikunut Nâlekab sângane, tarnise ulapᴋoseromavlugit.

¹⁷ Nalekablo Mosese oᴋarvigivâ, oᴋarlune:

¹⁸ Ubvarviliortuksauvotit ᴋaᴋorlermit, ikoggangalo ᴋaᴋorleojuksaugivok, ubvarnermut: ilijaksarivallo ilagêktut tupingata tunerguserviublo akorngangne, imerlugolo imermik.

¹⁹ Aroniblo erningitalo aggangmingnik itigamingniglo ubvarvigijaksarivât:

²⁰ Itijarangata tupermut kigligiutjineᴋtalingmut, imermut ubvartuksauvut, toᴋorᴋonagit; najornigangatalônêt tunerguservingmik kivgartoromavlutik, tunerguseromavlutik ôtaksanik ikomakut Nâlekamut:

²¹ Aggatik itigatiglo ubvaraksarivait toᴋorᴋonatik: tamannalo maligaksautsainartuksauvok tâpkonunga, tâpsomungalo kinguvânginullo kinguvârêngningitigut.

²² Amalo Nâlekab Mosese oᴋarvigivâ, oᴋarlune:

²³ Tigusigittauk ilingnut tauvluᴋutiksanik piojônerpânik, Mirrimik ilaᴋangitomik sêkeletut 500tut, Sinamônemiglo mamaktomik tâpsoma abvangatut, tagva sêkeletut 250tut, Kalamûsemiglo sêkeletut 250tut,

²⁴ Kasiamiglo sêkeletut 500tut, ivsornaitoviub sêkelinga maliklugo, orᴋsublo napârtungata orᴋsunganik hinitut:

²⁵ Orᴋsulioraksarivatillo mingoarutiksamik ivsornaitomik, mingoarut akusimajok tipitsiariksautelerijub ilisimaninga maliklugo; mingoarutiksauvok orᴋsuk ivsornaitok.

²⁶ Tuperlo kigligiutjineᴋtalik mingoaraksarivat tâpsomunga, iklerviglo kigligiutjineᴋtalik,

²⁷ Sâlo perᴋutingillo, naneroaᴋarviglo perᴋutingillo, tunerguserviglo iserluanititsivik tipitsiariktomik,

²⁸ Tunerguserviglo tunergutinik ôtaksanik, perᴋutingillo ilûnnaita, ubvarviglo ikoggangalo.

²⁹ Ivsornaititaksarivatillo ivsornairmarirᴋovlugit: aktuijut tâpkoninga ivsornaituksauvut.

³⁰ Aronelo erningillo mingoaraksarivatit ivsornaitilugillo, kivgartorᴋovlugit uvamnut ajoᴋertuijônerme.

³¹ Israêlikullo oᴋarvigijaksarivatit, oᴋarlutit: Tamadja orᴋsuk mingoarutiksak ivsornaitok uvamnut kinguvâpsigut.

³² Kovijaujuksaungilak inub uvininganut, adsinganiglônêt sanajuksaungilase, akusimaninga adsigivlugo: ivsornaipok, ivsornaigijaksarivaselo.

³³ Nalliat akutsijok adsinganik, nallialônêt pititsijok tâpsoma ilanganik takorngartamut, avitaumariktuksauvok inôᴋatiminit.

³⁴ Nalekablo Mosese oᴋautivâ: Tigusigit ilingnut tipitsiariksautiksanik, Staktemik, Balsamiglo, Galbânumiglo, Wairauchemiglo ilaᴋangitomik: ilûnnatik oᴋumaitigijigêklutik:

³⁵ Tamakkoalo tipitsiariktoliorutigijaksarivatit, akusimavlutik tipigiksautelerijub ilisimaninga maliklugo, tarrêtsiarilugit, ilaᴋaratik ivsornailutiglo:

³⁶ Ilangalo serᴋalitsiaraksarivat, pitilugolo kigligiutjinît sânganut tuperme kigligiutjineᴋtalingme, naipitsivigijomajamne ilingnik: ivsornainerpârijaksarivase.

³⁷ Tipitsiariksautiksarlo sanajaksarijat pivlugo, adsinganik sanajuksaungilase ilipsingnut akkusimaninga itjuarlugo: Ivsornaigijaksarivat Nâlekamut.

³⁸ Nalliat taimailiortok adsinganik, naimajomavlugo, avitaumariktuksauvoᴋ inôᴋatiminit.