Exodus 3 - Labrador Inuttitut Heritage Bible

Mosesib kivgartorᴋojauninga.

¹ Mosesible sakimene Jetrub, ajoᴋertuijub Midiamêtub, saugaᴋutingit mianerivait, saukallo ungorlugit inuᴋangitub kangianut, Gûdib ᴋakᴋanga Hôrebe tikipâ.

² Nâlekablo engelingata sakᴋervigivâ ikomab ikoalaningagut ukpigait kakilautelît akornganit. Takonâramelo takolerpait ukpigait kakkilautelît ikoalagalloartut ikomamut, nungutaulungitulle.

³ Moseselo oᴋarpok: Tagvungarlanga, takotitjutsoak tamanna takolugo, suna pivlugo ukpigait kakilautelît ikomamut nungutaungimangâta.

⁴ Nâlekable takogamiuk takojartortok, Gûdib tagva nipliavigivâ ukpigait kakilautelît akornganit, oᴋarlunelo: Mosese! Mosese! Kiovâ: Mânêpunga.

⁵ Oᴋarporlo: Kaglitailigit maunga, itigagutîkik itigarnit pêkik, nuna tullerartat ivlernarmat.

⁶ Amma oᴋarpok: Uvangauvunga atâtavit Gûdigijanga, Abrahab Gûdigijanga, Isaablo Gûdigijanga, Jakoblo Gûdigijanga. Tagva Mosesib kênane mattuvâ; Gûde takonârlugo sivôragame.

⁷ Nalegarlo oᴋarpok: Inuᴋotima siorniorningit Egipteneme takovakka tusarpakkalo, angajoᴋâtik kivgartorlukatitsijut nipliajutigingmagit, kapiasungningit nalungilakka.

⁸ Akᴋarpungalo, Egiptenemiut agganginit piulijartoromagapkit aulartitsomavlugillo nunamit tamatomangat nunamut ajungitomut nerrotojomullo, nunamut imumik igupsaujârtullo orᴋsuanik kôlingmut, Kânaanemiut Hetiterillo Amoriterillo Feresiterillo Heviterillo Jebusiterillo nunanganut.

⁹ Mânna Israêlikut nipliadlarningit pivut sâmnut, kapiasungningillo takovakka, ᴋanok Egiptenemiut kapiasuktingmagit.

¹⁰ Taimaimat ailerit mânna taikunga, Faraomut tilijomagapkit, inuᴋotimnik Israêlikunik aulartitserᴋovlutit Egiptenemit.

¹¹ Moseselo oᴋarpok Gûdemut: Kinauvêk uvanga Faraomut aijuksaujunga, aulartitsijuksauvlungalo Israêlikunik Egiptenemit?

¹² Kiovâle: Uvanga ilagijomavagit; imaitorlo nalunaikutaksarivat uvanga tiligapkit: Inuit Egiptenemit aularterᴋârungne, Gûde kivgartorvigijomârpase ᴋakᴋame matomane.

¹³ Moseselo oᴋarpok Gûdemut: Ahâk, Israêlikunut tikikuma, oᴋarvigigupkillo: Atâtapta Gûdingata tilivânga, taipkoalo aperikpanga: ᴋanorle ateᴋarᴋâ? Sumik tagva oᴋartuksauvingâ?

¹⁴ Gûdelo oᴋarpok Mosesemut: Tâmnauvunga tâmnatsainak! Oᴋarporlo: Taimâk oᴋartuksauvotit Israêlikunut: Tâmnaujungagôk, tâpsoma tilivânga ilipsingnut.

¹⁵ Amma Gûde oᴋarpok Mosesemut: Imâk oᴋartuksauvotit Israêlekunut: Nâlekab atâtapse Gûdingata, Abrahab Gûdingata, Isaab Gûdingata, Jakob Gûdingata tilivânga ilipsingnut. Tamadja atera nâksaungitomut pijara, tamadja taigusera kinguvarêt kingordlinginut.

¹⁶ Tagva angajoᴋaujut Israêlikune katititsartorkit oᴋautivlugillo: Nâlekab atâtapse Gûdingata, Abrahab Gûdingata, Isaab Gûdingata, Jakob Gûdingata sakᴋervigivânga oᴋarlune: Takonârpapse, ᴋanorlo piniarviogapse Egipteneme:

¹⁷ Oᴋarpungalo: Egiptenib kapianartoksôninganit paungartitsomavapse Kânaanemiut Hetiterillo Amoriterillo Feresiterillo Heviterillo Jebusiterillo nunanganut, nunamut imumik igupsaujârtullo orksuanik kôlingmut.

¹⁸ Nipîllo nâlagaksarigalloarpât tagva, itertuksauvoselo, igvit angajoᴋaujullo Israêlikune, Egiptenemiut ataninganut, oᴋarvigilugo: Nâlekab Ebrêerit Gûdingata nalipsarpâtigut. Mânnalo ingergalertatôk inuᴋangitomut, uvlut pingasut ingergavigivlugit, tunerguseriartorluta Nâlekamut Gûdiptingnut.

¹⁹ Uvangale nalungilanga, Egiptenemiut ataningata aularᴋoniatsangimase, aggangnik pitsartujunik soᴋûteᴋarane aglât.

²⁰ Kisianele aggakka isaklugit Egipteneme sugiaromârpara tatamnartunut sunatuinarnut piniaromârtamnut akorngane. Kingorngagullo aularᴋojomârpâse.

²¹ Inuillo saimaneᴋsititsomavakka Egiptenemiut sângane, imaitsomârporlo: Aularluse aularomângilase piksaᴋarase.

²² Arnat atunit silalermingnit iglomioᴋatimingnillo piksarsiortuksauvut iluleᴋutinik silbereojunik goldeojuniglo annorâniglo; tamakkoa ernipsingnut panipsingnullo ilijomârpase Egiptenemiunit tiguvlugit.