Exodus 29 - Labrador Inuttitut Heritage Bible

Ajoᴋertuijut ivsornaititauningit tunergutillo pivlugit.

¹ Imailiorvigijaksarivatillo ivsornaitilugit kivgartorᴋovlugit uvamnut ajoᴋertuijônerme: Tigusijuksauvotit tuktuvangmik, saukangniglo angusâlungnik maggûngnik ᴋanoetoᴋangitungnik,

² ᴋakᴋôjamiglo sêrnarsauteᴋangitomik, ᴋakᴋôjaniglo sâpatânik sêrnarsauteᴋangitunik orᴋsumut akᴋusimajunik, ᴋakᴋôjârsuniglo sâtunik orᴋsumut mingoarsimajunik: sanaugamit ᴋaᴋortamit sanajaksarivatit.

³ Amârgaujarmullo atautsemut ilijaksarivatit, amârgaujarmelo ᴋaitaksarivatit, tuktuvak saukaglo angusâluk maggûk ilagivlugit.

⁴ Aronelo erningillo ᴋaitaksarivatit tupiub kigligiutjineliub pânganut, imermullo ubvarlugit.

⁵ Annorâllo tigujaksarivatit, Aronemullo atijautilugit, ullik, ikiablo atigiujanga, ikiarlo, sagvingmiutarlo, tapseruserlugolo ikiab tapserutinganut:

⁶ Nasarlugarlo ilijaksarivat niaᴋunganut, sivumiutarlo ivsornaitok nasarlugaub ᴋânganut ilivlugo,

⁷ Orᴋsuk mingoarutiksak tigujaksarivat tagva, kovilugolo niaᴋoanut, mingoarlugo.

⁸ Erningillo ᴋaitaksarivatit atitilugillo ulingnik.

⁹ Tapseruseraksarivatillo tapserutinut, Arone erningillo, ilijivigivlugillo nasarluganik: tâpkoalo ajoᴋertuinermik suliaksaᴋalârput soraijuitomik: Aronelo erningillo ivsornaititaksarivatit.

¹⁰ Tuktuvaglo ᴋaitautitaksarivat tupiub kigligiutjineliub sânganut, Aroniblo erningitalo tuktuvaub niaᴋoa patigaksarivât aggangmingnut.

¹¹ Tuktuvaglo toᴋotaksarivat Nâlekab sângane, tupiub kigligiutjineliub pângata sângane.

¹² Tuktuvaublo aungata ilanga tigujaksarivat, aggangnullo tunerguserviub natjûgik mingoarlugik tâpsomunga, aublo amiakoa ilûnnane kovilugo tunerguserviub tungavinganut.

¹³ Tunorlo erchavît ᴋânganêtok ilûnât tigujaksarivat, kiksautillo tingub avatânêtok, taktûgiglo, tunorlo tâpkoa ᴋângangnêtok, ôttilugillo tunerguservingme.

¹⁴ Tuktuvauble nerᴋinga, amingalo, annangalo, ôttitaksarivatit ikomamut tupersuit silatâne: tamadja tunergutiksak ajortoerutiksak.

¹⁵ Saugarlo angusâlok atausek tigujaksarivat; Aroniblo erningitalo angusâlub niaᴋoa patigaksarivât aggangmingnut.

¹⁶ Angusâloklo toᴋotaksarivat, aungalo tigulugo serᴋerautigivlugolo tunerguserviub avatânut.

¹⁷ Avgoraksarivallo angusâlok, erchavingillo niungillo ergortorᴋârlugit, ᴋatiganganut avgorsimajomut niaᴋoanullo ilivlugit.

¹⁸ Angusâloklo ilûnât ôtitaksarivat tunerguservingme: tunergutiksauvok ôtaksak Nâlekamut: tamadja tipigiksautauvok, tunergut ôtâk Nâlekamut.

¹⁹ Saukablo angusâlub aipanga tigujaksarivat: Aroniblo erningitalo angusâlub niaᴋoa patigaksarivât aggangmingnut.

²⁰ Toᴋotaksarivallo angusâlok, aungatalo ilanga tiguvlugo pitilugolo Aronib siutingata talerpiata nuvuanut, erningitalo siutingita talerpingita nuvunginut, aggangitalo talerpingita kublunginut, itigangitalo talerpingita putugunginut, auglo serᴋerautigivlugo tunerguserviub avatânut.

²¹ Aublo tunerguservingmêtub ilanga tigujaksarivat, orᴋsublo mingoarutiksab ilanga, serᴋerautigivlugolo Aronemut annorânginullo, erninginullo, erningitalo annorânginut tâmna ilagivlugo: ivsornaititauniarporlo, annorângillo, erningillo, erningitalo annorângit, tâmna ilagivlugo.

²² Tigujaksarivatittauk angusâlub tunnûgik okpatîgiglo, tunnorlo erchavît ᴋânganêtok, kiksaullo tingub avatânêtok, taktûglo, tunnorlo tâpkoa ᴋânganêtok, talerlo talerpik; angusâlok tâmna ivsornaijutaungmat:

²³ ᴋakᴋôjarlo atausek, ᴋakᴋôjarlo orᴋsulik atausek, ᴋakᴋôjârsuglo sâtok atausek amârgaujarmit sêrnarsauteᴋangitomik ᴋakᴋôjaᴋtalingmit Nâlekab sânganêtomit:

²⁴ Tamakkoalo ilûnnaita pitilârpatit Aronib agganginut, erningitalo agganginut; isautiᴋatarlugillo tunergutautilugit Nâlekab sângane.

²⁵ Tigujaksarivatillo agganginit ôtilugillo tunerguserviub ᴋângane tunergutautilugillo ôtaksamik, tipigiksautiksautilugit Nâlekab sângane: tunergutauvok ôtâᴋ ikomakut Nâlekamut.

²⁶ Aroniblo ivsornaititaujutingata angusâlub sakiangit tigujaksarivatit isautiᴋatarlugillo Nâlekab sângane: tamanna ningeᴋsiarijaksarivat.

²⁷ Ivsornaititaksarivatillo sakiangit tunergutaujut isautijauᴋatartut, talerlo tunergutaujok isautijaujok ᴋongmut, isautijauᴋatartok isautijaujorlo ᴋongmut Angusâlormit ivsornaijutiksaujomit, Aronemut erninginullo ilingajomit:

²⁸ Aroniblo erningitalo ningeksiarijaksarivait Israêlikunit maligaksakut soraijuitokut; tunergutaungmat isautijaujok ᴋongmut: Tunergutaujuksauvorlo isautijaujok ᴋongmut Israêlikunit, tunergutinginit ᴋujalijutinit tunergusertaujunit, llâ, tunergut isautijaujok ᴋongmut Nâlekamut.

²⁹ Aroniblo annorângit ivsornaitut erningita kingormagutijaksarivait tâpsoma kingorngagut, mingoartausiutigivlugit ivsornaititausiutigivlugillo.

³⁰ Erningatalo inangertingata atijaksarivait uvlunik 7nik iterangat tupermut kigligiutjinelingmut kivgartoromavlune ivsornaitovingme.

³¹ Angusâloklo ivsornaititausiut tigujaksarivat, nerᴋingalo igalugo ivsornaitovingme.

³² Aroniblo erningitalo angusâlub nerᴋinga nerrijaksarivât, ᴋakᴋôjallo amârgaujarmêtut tupiub kigligiutjineliub pângane.

³³ Tamakkoalo ulapᴋosertausiutit nerrijaksarivait ivsornaititaujutigivlugit idluarsititaujutigivlugillo: takorngartable nerrijaksaringilait, ivsornaingmata.

³⁴ Nerᴋêjable ivsornaititausiutib ilanga, ᴋakᴋôjaublônêt ilanga amiakolerpat uvlârmut, amiakoa nungutaksarivat ikomamut: Nerrijaujuksaungilak, ivsornaingmat.

³⁵ Taimailiorvigijaksarivatit Aronelo erningillo, ilûnnaita perᴋojakka ilingnut maliklugit: uvlut 7nit nâvlugit ivsornaititaksarivatit.

³⁶ ᴋaut tamât tunergusertuksauvotit tuktuvangmik, tunergutauvlune ajortoerutiksamik ulapᴋosertaunermut: tunerguserviglo ivsornaititaksarivat ulapirksarungne, mingoaraksarivallo ivsornaitilugo.

³⁷ Uvlunik 7nenik tunerguservik ulapirksaraksarivat ivsornaitilugolo; tunerguserviojuksauvorlo ivsornainerpâmik: ilûnnatiglo aktuijut tunerguservingmik ivsornaituksauvut.

³⁸ Tamadja tunergutigijaksarijatit tunerguservingme: Saugârsûk maggûk atautsimik jâreᴋartuk tunergutigijaksarivakik ᴋaut tamât tunerguservingme.

³⁹ Saugârsuk aipâ tunergutigijaksarivat uvlâkut; saugârsublo aipanga tunergutigijaksarivat unnukut:

⁴⁰ Saugârsuglo aipâ ilagivlugo sanaugarmik îfab tallimaujoanik akkusimajomik orksumut kaugaktamut hinib sitamanganik; vainemiglo hinib sitamanganik tunergutiksauvlune imiksamik.

⁴¹ Saugârsublo aipanga tunergutigijaksarivat unnukut, ilaᴋartitaksarivallo tunergut nerrijaksak uvlâkut adsigivlugo, tunergullo imiksak adsigivlugo, tippigiksautiksaurᴋovlugo, tunergut ôtâk Nâlekamut.

⁴² Tamanna tunergutiksauvok ôtaksak soraijuitok kinguvâksapsigut tupiub kigligiutjineliub pângane Nâlekab sângane: Tagvane naipitsomavagit oᴋaᴋatigivlutillo.

⁴³ Tagvanelo Israêlikut naipitsomavakka, tâpkoalo ivsornaititaulârput ânanaunimnut.

⁴⁴ Tuperlo kigligiutjinelik ivsornaititsomavara, tunerguserviglo: Ivsornaititsomagivakkalo Aronelo erningillo kivgartorᴋovlugit uvamnut ajoᴋertuijônerme.

⁴⁵ Ineᴋaromavungalo Israêlikut akorngane, Gûdiojomavungalo tâpkonunga.

⁴⁶ ᴋaujijuksauvullo tâmnaugama Nâlegak Gûdingat aularudjijingat nunamit Egiptenemit, ineᴋarungnarᴋovlunga tâpkoa akorngane: Uvanga tagva Nâlegak Gûdingat.