Exodus 28 - Labrador Inuttitut Heritage Bible

Perᴋojat Aron erningillo pitjutigivlugit.

¹ Aronelo angajuit erningillo ilagivlugit annerijaksarivatit ilingnut Israêlikut akornganit, kivgartorᴋovlugit uvamnut ajoᴋertuijôvlutik; Arone, Nadabelo, Abihulo, Eleâserelo, Itamârelo, Aronib erningit.

² Aronemullo angajungnut annorâliortuksauvotit ivsornaitunik, opigijaurᴋovlugo ânanausijaurᴋovlugolo.

³ Tamaitalo ilisimajunik ômatelît, illumertitakka anernermik ilisimatitsijomik, oᴋarvigijaksarivatit annorâliorᴋovlugit Aronemut ivsornaitoᴋutautitaurᴋovlugo, ajoᴋertuijônerme kivgartorᴋovlugo uvamnut.

⁴ Tamadjalo annorât sanajaksarijangit; sagvingmiutak ikiarlo, atigiujarlo, ulliglo pinnarnarsautelik, nasarlugarlo, tapserullo: Ivsornaituniglo annorâliortuksauvut Aronemut angajungnut erninginullo, kivgartorᴋovlugo uvamnut ajoᴋertuijônerme.

⁵ Atortuksauvullo goldemik, tungujoktamiglo, tungulângajomiglo, aupalutsiartomiglo, ᴋablunâktajatsiarmiglo.

⁶ Ikkialiortuksauvullo goldemit, tungujoktamillo, tungulângajomillo, aupalutsiartomillo, ᴋablunâktajatsiamillo, ânanausilugolo.

⁷ Kivilerêkutaujâgik katitaujuksauvuk sinîgikut tamakkut; taimâk katitaujuksauvuk.

⁸ Ikiablo takosungnaitub tapserutinga ᴋânganêtok tâmnatsainaujuksauvok sanajauninga maliklugo; tagva goldemik, tungujoktamiglo, tungulângajomiglo, aupalutsiartomiglo, ᴋablunâᴋtajatsiamiglo.

⁹ Tigusijuksauvotillo aligûngnik tungajuangajûngnik maggûngnik aglagvigivlugiglo Israêlib ᴋitorngangita atinginik:

¹⁰ Atingit 6it aligorme atauserme, atingillo 6it asingit aligub aipangane, nukarêngningit maliklugit.

¹¹ Aligulerijub aglanginut, aglangnut sorlo naᴋitjumêtunut aligûk tamarmik aglagvigijaksarivakik Israêlib ᴋitorngangita atinginik: ilijaksarivakiglo avaliarutanut goldeojunut.

¹² Aligûglo ilijaksarivakik ikiab kivilerêkutaujâgingnut, erᴋaumajaujutiksaurᴋovlugik Israêlikunut: Aroniblo nangmaraksarivait atingit tuîngmine Nâlekab sângane erᴋaumajaujutiksaurᴋovlugit.

¹³ Avaliarutaliortuksauvotillo goldeojunik.

¹⁴ ᴋelaumgujângniglo maggûngnik goldeojûngnik ilaᴋangitomik isûgingne; ᴋepjarlugik sanajaksarivakik, ᴋelaumgujâglo ᴋepjartâk atsungersorlugik avaliarutanut.

¹⁵ Sagvingmiutarlo erᴋartuinermut sanajaksarivat pinarnarsauteᴋartilugolo; ikkiab ânanausijauningatut sanajaksarivat: goldemit, tungujoktamillo, tungulângajomillo, aupalutsiartomillo, ᴋablunâktajatsiamillo sanajaksarivat.

¹⁶ Iktoᴋeriktuksauvok tapitarêklunelo; aggait atautsît isângningatut takitigijuksauvok, aggaillo atautsît isângningatut siliktigivlune.

¹⁷ Ilijivigijaksarivallo alikunik, alikunik siaktunik sitamanik sanilerêktunik: siaktut sivorlît tamadja: Ruby, Topaselo, Karbunkelelo;

¹⁸ Siaktut aipanga, tagva Emeralde, Safirelo, Diamantelo;

¹⁹ Siaktut pingajuat, tagva Ligure, Agatelo, Amitistelo;

²⁰ Siaktullo sitamangat, tagva Berile, Onikselo, Jasperelo: Ilijaujuksauvullo avaliarutaksanginut goldeojunut.

²¹ Allikullo aglagviojuksauvut Israêlib ᴋitorngangita atinginik 12nik, atingit aglaksimavlutik sorlo naᴋitjutib aglangititut; atunit ateᴋarlutiᴋ kinguvârêt 12 maliklugit.

²² Sagvingmiutarmelo ᴋelaumgujaliortuksauvotit goldemit ilaᴋangitomit ᴋepjarsimajunik isûgingne.

²³ Sagvingmiutarmelo nukloliortuksauvotit maggûngnik goldemit, nuklûglo maggûk atsungersoraksarivakik sagvingmiutab isûgingnut maggûngnut.

²⁴ ᴋelaumagujâglo ᴋepjarsimajûk maggûk goldeojûk nuvijaksarivakik nuᴋlûngnut maggûngnut sagvingmiutab isûgingnêtungnut.

²⁵ ᴋelaumagujâglo ᴋepjarsimajûk isûgik aipâgik atsungersoraksarivakik saneroângnut, ililugiglo ikiab kivilerêkutaujâgingnut sânganêtungnut.

²⁶ Maggûngniglo nukloliortuksauvotit goldemit, sagvingmiutablo isûkita sinîgingnut atsungersoraksarivakik, iluanut, ikiarmut sângavlutik.

²⁷ Tâpkoalo asîgingnik nukloliortuksauvotit goldemit, atsungersorlugiglo ikkiab sanerâgingnut iglugêngnut, atsungervîk sâkita nalâgingnut, ikkiab tapserutingata ᴋolânut.

²⁸ Sagvingmiutarlo ᴋelaksoraksarivat nuklungitigut ikkiab nuklûgingnut, ᴋelarutemut tungujoᴋtarmut, ikiab tapserutingata ᴋolânêrᴋovlugo, sagvingmiutak pêrᴋonago ikiarmit.

²⁹ Aroniblo Israêlib ᴋitorngangita atingit nangmaraksarivait sagvingmiutakut erᴋartuinermut ilingajokut ômatime nalâne, iterangame ivsornaitovingmut, erᴋaumajaujutiksaurᴋovlugit Nâlekab sângane soraijuitomik.

³⁰ Sagvingmiutarmullo erᴋartuinermut ilingajomut ilijaksarivakik ᴋaumaᴋut idluaᴋullo; tâpkoalo Aronib ômmatingata nalânêtuksauvuk iterangame Nâlekab sânganut: Aroniblo Israêlikut idluarsaijutiksangat nangmaraksarivâ Nâlekab sângane soraijuitomik.

³¹ Ikiablo atigiujanga ilûnnane sanajaksarivat tungujoᴋtamit.

³² ᴋolâta ᴋerᴋagut iterviᴋartuksauvok: itervingalo pergaimajôjamik nuilaᴋartuksauvok, sorlo sorsuktuksab annorângata itervingatut, alirᴋonago.

³³ Atâne periningane paungangoaliortuksauvotit tungujoktamit, tungulângajomillo, aupalutsiartomillo, periningata ilûnnangagut, tâpkoalo akorngagut sivaniarsungnik goldemit ilûnâgut.

³⁴ Sivaniarsuk golde paungangoarlo, sivaniarsuk golde paungangoarlo, atigiujab siningagut perisimaningagut ilûnâgut.

³⁵ Tâmna atijaujuksauvok Aronemut kivgartorangat; sivaningit tusaksaurᴋovlugit iterangat ivsornaitovingmut Nâlekab sânganut, anijarangallo, toᴋorᴋonago.

³⁶ Sivumiutaliortuksauvotillo goldemit ilaᴋangitomit, aglagvigivlugolo, sorlo naᴋitjutib aglangititut: Ivsornaitok Nâlekamut.

³⁷ ᴋelarutemullo tungujoktamut nuvijaksarivat, nesarlugarmiutaurᴋovlugo, nesarlugablo sivumiutaksarivâ.

³⁸ Aroniblo ᴋaunganêtuksauvok, Arone nangmarᴋovlugo ivsornaitut idluininginik, Israêlikut ivsornaitilârtanginik tunergutimingne ivsornaitune tamaine; ᴋaunganêtsainartuksauvorlo, tâpkoa nâmagijaurᴋovlugit Nâlekab sângane.

³⁹ Ulliglo ᴋablunâᴋtajatsiak takoranersautelioraksarivat; nasarlugarlo ᴋablunâktajatsiamit sanajaksarivat, tapserullo sanajaksarivat nuilapaujaksajamit.

⁴⁰ Aroniblo erningit ullilioraksarivatit, tapseruteliorlugillo nasarlugaliorlugillo, opigijaujutiksamut pinarnarsijaujutiksamullo.

⁴¹ Atijautitaksarivatillo angajungnut Aronemut erninginullo ilagivlugit; mingoaraksarivatillo, ivsornaitoᴋutautilugillo, ivsornaitilugillo, kivgartorᴋovlugit sâmne ajoᴋertuijônerme.

⁴² Karlilioraksarivatillo ᴋablunâktajatsiamit, usinganingit matujaurᴋovlugit; ᴋetinginit serᴋungit tikidlugit pijuksauvut.

⁴³ Atijaujuksauvullo Aronemut erninginullo iteraikpata tupermut kigligiutjinelingmut, najornileraikpatalo tunerguservingmik kivgartoromavlutik ivsornaitovingme; idluinermik toᴋojutiksamik nangmarᴋonagit: tamanna maligaksaujuksauvok soraijuitok tâpsomunga kinguvânginullo tâpsoma kingorngane.