Exodus 27 - Labrador Inuttitut Heritage Bible

Otaksat tunerguservingat perᴋutingillo.

¹ Tunerguserviliortuksauvotillo ᴋejutsiarsajamit, talertut tallimatut takitigivlune, talertullo tallimatut siliktigivlune; tunerguservik iktoᴋeriktuksauvok: talertullo pingasutut poktotigijuksauvok.

² Nakjungillo sanajaksarivatit terreᴋungine sitamane; nakjungit tâmnatsainaujuksauvut; ᴋallineᴋartitaksarivallo ᴋaᴋorlermik.

³ Sanajuksauvotillo argjaᴋautinginik, ᴋalugautinginiglo, pôgutaujanginiglo, kapoᴋautinginiglo, aumaᴋautinginiglo; perᴋutingit ilûnnatik ᴋaᴋorleojuksauvut.

⁴ Kilapatâliortuksauvotillo tâpsomunga nuluangojârtomik ᴋaᴋorlermit; nuluangojârtublo terreᴋungine sitamane nuᴋloliortuksauvotit sitamanik ᴋaᴋorlernik.

⁵ Ilijaksarivallo tunerguserviub ikomaᴋarvingata atânut, nulluangojârtoᴋ tunerguserviub ᴋerᴋanêtsiarᴋovlugo.

⁶ Akigauteliortuksauvotillo tunerguserviub piksâgingnik, akigautîngnik ᴋejutsiarsajamit, ᴋallineᴋartilugiglo ᴋaᴋorlermik.

⁷ Akigautîglo ilijaujuksauvuk nuklûngnut, akigautîglo tunerguserviub sanerâgingnêtuksauvuk, akigarianganut.

⁸ Sâtojanit sanajaksarivat iloᴋarane: sorlo unertutijaungmat ilingnut ᴋakᴋame, taimâk sanajaksarivat.

⁹ Tupiublo avatâ avalulioraksarivat; seᴋerngane avalut tâlutaᴋartuksauvut ᴋablunâᴋtajatsiamik, talertut 100tut takitigijunik;

¹⁰ Napajungillo 20 manguviᴋartuksauvut 20nik ᴋaᴋorlernik; nappajullo kikkiaktangit ikârusingillo silbereojuksauvut.

¹¹ Tachânelotauk tâlutaᴋartuksauvok talertut 100tut takitigijunik, napajunginiglo 20nik, manguvinginiglo 20nik; napajullo kikkiaktangit ikârusingillo silbereojuksauvut.

¹² Tupiublo avatâta kangianêtub silingninga tâlutaᴋartuksauvok talertut 50tut sanimortotigijunik; napajunginiglo 10nik, manguvinginiglo 10nik.

¹³ Avatâlo kitânêtok talertut 50tut sanimortotigijuksauvok.

¹⁴ Tâlutat upkoab sanianêtut igluane talertut 15tut ituksauvut: napajungillo pingasut, manguvingillo pingasut.

¹⁵ Igluanelo tâlutat talertut 15tut: napajungillo pingasut, manguvingillo pingasut.

¹⁶ Avatâtalo upkoanganut tâlutaᴋartuksauvok talertut 20tut, tungujoktamik, tungulângajomiglo, aupalutsiartomiglo, ᴋablunâᴋtajatsiamiglo, takominarsauteliortauvlutik; napajungillo sitamaujuksauvut, manguvingillo sitamat.

¹⁷ Napajut ilûnnatik avalunêtut ikâruseᴋartuksauvut silbereojunik, kikkiaktangillo silbereojuksaugivut, manguvingillo ᴋaᴋorleovlutik.

¹⁸ Avalut ilua talertut 100tut takitigijuksauvok, silingningalo talertut 50tut ilûnâne, poktoningalo talertut tallimatut ᴋablunâᴋtajatsiamit, manguvingillo ᴋaᴋorleovlutik.

¹⁹ Tupiublo perᴋutingit ilûnnatik atortangit kivgartornerme, kikkiaktangillo, avalullo kikkiaktangit ᴋaᴋorleojuksauvut.

²⁰ Israelikullo ᴋaitserᴋoniarpatit ilingnut napârtut orᴋsunganik kaugarsimajomik ikomaksanganut, ᴋolek ikimatsainarᴋovlugo.

²¹ Ilagêt tupingane, upkub silatâne, kigligiutjineᴋtaliub sângane, Aronib erningitalo kamagijaksarivât unnungmit uvlârmut Nâlekab sângane; tamanna maligaksautsainartuksauvok kinguvânginut, Israêlikut akorngane.