Exodus 26 - Labrador Inuttitut Heritage Bible

Tupek ivsornaitok perᴋutingillo pivlugit.

¹ Tuperlo sanajaksarivat itsanit tallimaujortunit ᴋablunâktajatsiamit, tungujoktamillo, tungulângajomillo, aupalutsiartomillo; ânanausilugillo kerubingoanut sanajaksarivatit.

² Itsaksak atausek tallertut 28tut takitigijuksauvok, itsaksarlo atausek tallertut sitamatut siliktigijuksauvok; itsallo ilûnnatik adsigêktomik ôktûteᴋartuksauvut.

³ Itsat tallimat katitaujuksauvut tuglerêklutik, itsallo asingit tallimat katitaujuksauvut tuglerêklutik.

⁴ Erᴋearviliortuksauvotillo tungujoᴋtamit itsaksab sivorliub siningane katiningata siningane, itsaksablo aipanga taimailioraksarivat siningane, aipaminut katiningata siningane.

⁵ Erᴋearviliortuksauvotit 50nik itsaksamut atautsimut, erᴋearvingniglo 50nik itsaksab aipangata siningane katiningane, erᴋearvît erᴋeakterungnarᴋovlugit.

⁶ Erᴋeaktauteliortuksauvotillo 50nik goldeojunik, itsaksallo katilugit erᴋeaktautinut: tupingorᴋovlugit atausermik.

⁷ Itsaksaliortuksauvotillo tuktungajut merᴋunginit, matuksaurᴋovlugit tupermut: 11nik itsaksaliortuksauvotit.

⁸ Itsaksak atausek tallertut 30tut takitigijuksauvok, itsaksarlo atausek tallertut sitamatut siliktigijuksauvok: Itsaksallo 11 adsigêktomik ôktûteᴋartuksauvut.

⁹ Itsaksallo tallimat katitaksarivatit ingmingnut, itsaksallo 6it ingmingnut, itsaksallo 6ingat tappitarêktitaksarivat tupiub sângane.

¹⁰ Erᴋearvingniglo 50nik sanajuksauvotit itsaksab sivorliub siningane katiningane, erᴋearvingniglo 50nik itsaksab aipangata siningane.

¹¹ Erᴋeaktauteliortuksauvotillo 50nik ᴋaᴋorlermit, erᴋeakterlugillo erᴋearvingnut, tuperlo katilugo atausiorᴋovlugo.

¹² Tupiublo itsaksangita amiakunga, itsaksab abvanga amiakôjok, nivingajuksauvok tupiub tunuane.

¹³ Tupiublo itsaksangita takiningita amiakungit nivingajuksauvut tupiub sanerâgingne, sanerâne ômane, sanerânelo igluane, matuvlugo.

¹⁴ Tupiublo mattuksanganik silallermik sanajuksauvotit saukat angusâluit aminginit mingoarsimajunit aupaluktamik, tâpsomalo ᴋânganut silalliksanganik ᴋabvît aminginit.

¹⁵ Satojaliortuksauvotillo napajuksanik tupermut, ᴋejutsiarsajamit.

¹⁶ Sâtojak atausek tallertut tallimaujortotut takitigijuksauvok, tallertullo atausertut abvatullo siliktigivlune.

¹⁷ Sâtojak atausek mangoᴋartuksauvok maggûngnik, Nalleᴋarêktûngnik: tupiub sâtujaksangit ilûnnaita taimailioraksarivatit.

¹⁸ Sâtojallo âᴋiksoraksarivatit tupermut, sâtojat 20 saneranganut seᴋernganut sângajomut.

¹⁹ Manguviliortuksauvotillo 40nik silbereojunik sâtojat atânêtuksanik; manguvîk maggûk sâtojab atausiub atâne mangûgingnut maggûngnut, manguvîglo maggûk sâtojab asiata atâne mangûgingnut maggûngnut.

²⁰ Tupiublo sanerangata igluanut tachânêtomut sâtojaᴋartuksauvok 20nik.

²¹ Tâpkoalo manguvingit 40 silberemit; manguvîk maggûk alliovlutik sâtojamut atausermut, manguvîglo maggûk alliovlutik sâtojab asianut.

²² Tupiublo tukianut kangianêtomut sâtojaliortuksauvotit 6inik.

²³ Sâtojaliortuksauvotillo maggûngnik tupiub terreᴋunginut iglugêngnut.

²⁴ Katitaujuksauvuglo atâgut, katitaujuksauvuglo ᴋolâgut nuklormut atautsimut: tamarmik taimailijuksauvuk; terreᴋuksaujuksauvullo tamangnut.

²⁵ Sâtojaᴋartuksauvok 8nik, manguvinginiglo silbereojunik 16nik; manguvîngnik maggûngnik sâtojab atausiub atâne, manguvîngniglo maggûngnik sâtojab assiata atâne.

²⁶ Saningajuksaliortuksauvotillo ᴋejutsiarsajamit, tallimanik tupiub sanerangata sâtojanginut.

²⁷ Tallimaniglo saningajuksanik tupiub sanerangata igluanut, tallimaniglo saningajuksanik tupiub tukianut kangianêtomut.

²⁸ Saningajuksarlo ᴋetterdlek sâtojat ᴋetterᴋangagôrtok ikârtuksauvok isuanit isuanut.

²⁹ Sâtojallo ᴋallineᴋartitaksarivatit goldemik, nuklungillo, saningajuksat nuklungit, sanajaksarivatit goldemit; saningajuksallo ᴋallineᴋartilugit goldemik.

³⁰ Tuperlo napartitaksarivat ôktûtinga unertutijaujok ilingnut ᴋakᴋame maliklugo.

³¹ Upkoliortuksauvotillo tungujoᴋtamit, tungulângajomillo, aupalutsiartomillo, ᴋâblunâktajatsiamillo; ânanausilugillo kerubingoanut.

³² Nivingatitaksarivallo napajunut sitamanut ᴋejutsiarsajamit ᴋallinesimajunik goldemik: Niksingillo goldeojuksauvut, manguvingne sitamane silbereojune.

³³ Upkolo nivingatitaksarivat erᴋeaktautit atâgut, itertitsijungnarᴋovlutit iklervingmik kigligiutjineᴋtalingmik takamunga upkub ungatânut; upkolo aviksiniarpok ilipsingnut ivsornaitovingmik ivsornainerpâmiglo.

³⁴ Iksivaviglo saimarvigijauvik ilijaksarivat iklerviub kigligiutjinektaliub ᴋânganut ivsornainerpâme.

³⁵ Sâlo ilijaksarivat upkub silatânut, naneroaᴋaviglo sâb akianut tupiub sanerangane seᴋernganut sângajome: sâlo ilijaksarivat tachânut sângajome.

³⁶ Tupiublo upkoaksanganik tâlutaliortuksauvotit tungujoktamit, tungulângajomillo, aupalutsiartomillo, ᴋablunâktajatsiamillo, takominarsauteliorvigivlugolo.

³⁷ Tâlutarmullo napajuksaliortuksauvotit tallimanik ᴋejutsiarsajamit, ᴋallineᴋartilugillo goldemik, erᴋeaktautingillo goldeojuksaugivut: kovisijuksauvotillo manguvingnik tallimanik ᴋaᴋorlermit tâpkoa piksanginik.