Exodus 25 - Labrador Inuttitut Heritage Bible

Tupek ivsornaitok perᴋutingillo ajoᴋertûtauvut.

¹ Nalekablo Mosese oᴋarvigivâ, oᴋarlune:

² Israêlikut oᴋarvigikit ᴋaitserᴋovlugit tunergutinik uvamnut: inungnit tamainit ᴋuviasuklutik ômmatimingnullo tunitjijunit tigujaksarivase tunergutit uvamnut.

³ Tamadja tunergutit tigujaksarijase tâpkonangat: Goldelo, silberelo, ᴋaᴋorlerlo,

⁴ Tungujoktarlo, tungulângajorlo, aupalutsiartorlo, ᴋablunâktajatsiarlo, tuktungajullo merᴋungit;

⁵ Saukallo angusâluit amingit aupaluktitaumajut, ᴋabvîllo amingit, ᴋejutsiarsajallo;

⁶ Orᴋsullo ᴋollinut, tipigiksaullo orᴋsumut mingoarutiksamut, iserluanerutiksamullo tipitsiariktomut;

⁷ Alliguillo tungujuangajut, alliguillo ilijaksat ikiarmut opinartomut, sagvingmiutarmullo.

⁸ Ivsornaitoviliorlillo uvamnut, iniksaᴋarungnarᴋovlunga akorngane.

⁹ Tamaita ilingnut unertûtigijakka, tupiub ôktûtinga perᴋutingitalo ôktûtingit maliklugit, taimâk sanajaksarivase.

¹⁰ Iklerviliortuksauvut ᴋejutsiarsajamit: tallertut Maggûtut abvatullo takitigijuksauvok, tallertullo atausertut abvatullo sanimuᴋarlune, tallertullo atausertut abvatullo poktotigijuksauvok.

¹¹ Kallineᴋartitaksarivallo goldemik ilaᴋangitomik, silatâgullo iluagullo ᴋallineᴋartitaksarivat. ᴋângalo avaliarutaᴋartitaksarivat goldemik avatâgut.

¹² Tâpsomungalo kovisijuksauvotit nuklûnik sitamanik goldemit, ililugillo terreᴋunginut sitamanut; nuklûk maggûk sanerangata igluanut, nuklûglo maggûk sanerangata igluanut.

¹³ Akkigauteliortuksauvotillo ᴋejutsiarsajamit, ᴋallineᴋartilugiglo goldemik.

¹⁴ Akkigautîglo ilijaksarivakik nuklûnut iklerviub sanerâgingnêtunut, iklervik akkigartaurᴋovlugo tâpkungnunga.

¹⁵ Akkigautîk nuᴋlûnêtsainartuksauvuk: pêjartaujuksaungilak tagvangat.

¹⁶ Kigligiutjinîllo tunijomajakka ilingnut ilijaksarivatit iklervingmut.

¹⁷ Iksivaviliortuksauvotillo saimarvigijauvingmik goldemit ilaᴋangitomit: tallertut maggûtut abvatullo takitigijuksauvok, tallertullo atausertut abvatullo siliktigivlune.

¹⁸ Kerubîngniglo maggûngnik goldemit sanajuksauvotit; katjuklugik sanajaksarivakik, iksivaviub saimarvigijauviub isûgingne.

¹⁹ Kerubelo aipâ isuanêtilugo aipâne, Kerubelo aipanga isuanêtilugo aipangane; iksivaviub saimarvigijauviub isûgingne iglugêngne sanajaksarivakik.

²⁰ Kerubîglo isivitsijuksauvuk esarᴋumingnik ᴋollâgut, iksivavik saimarvigijauvik uliklugo esarᴋumingnut, kênâgik sângautijuksauvuk: iksivavik saimarvigijauvik sâvigivlugo kênâgik pijuksauvuk.

²¹ Iksivaviglo saimarvigijauvik ilijaksarivat iklerviub ᴋânganut, kigligiutjinîllo tunijomajakka ilingnut ilijaksarivatit iklervingmut.

²² Tagvanelo naipitsomavagit, oᴋaᴋatigijomavagillo iksivaviub saimarvigijauviub ᴋolânit, kerubîk iklerviub kigligiutjinektaliub ᴋânganêtuk akorngangnit, perᴋojat tamaita pivlugit tunijomajakka ilikut Israêlikunut.

²³ Sâliortuksaugivotit ᴋejutsiarsajamit: tallertut Maggûtut takitigijuksauvok, tallertullo atausertut siliktigivlune, tallertullo atausertut abvatullo poktotigivlune.

²⁴ ᴋallineᴋartitaksarivallo goldemik ilaᴋangitomik, avaliarutalioraksarivallo goldemik avatâgut.

²⁵ Pinarnarsauteᴋartitaksarivallo atâta avatâgut aggait silingningittitut siliktigijomik, siningalo avaliarutalioraksarivat ᴋolâgut goldemit.

²⁶ Tâpsomungalo nukloliortuksauvotit sitamanik goldemit, nuklullo ilivlugit niulungita sitamat terreᴋunginut sitamanut.

²⁷ Nuklut sinakjuata atânêtuksauvut, ᴋejûk akigautîk, sâmik akigautîk, kaimitaurᴋovlugik tagvunga.

²⁸ Akkigautîglo sanajaksarivakik ᴋejutsiarsajamit, ᴋallineᴋartilugiglo goldemik, sâ akigartaurᴋovlugo tâpkungnunga.

²⁹ Pôgutanginiglo, allupsautinginiglo, ᴋajutanginiglo ᴋalutanginiglo ᴋaluviojungnarᴋovlugo, sanajuksauvotit goldemit ilaᴋangitomit.

³⁰ Sâblo ᴋânganut ilijitsainartuksauvotit ᴋakᴋôjanik takonâraksanik sâmne.

³¹ Naneroaᴋaviliortuksauvotillo goldemit ilaᴋangitomit: Sanajaujuksauvok katjuksimajomit: ikogganga, akkerungillo, ᴋingmingoangoangillo, paungangoangillo, nuvugulângoangillo tâmnatsainaujuksauvut.

³² Akerᴋut 6it anijuksauvut sanerâgingnit; akerᴋut pingasut sanerangata aipânit, akerᴋullo pingasut sanerangata igluanit.

³³ Akerᴋut atunit ᴋingmingoangoaᴋartuksauvut pingasunik, paungangoamiglo nuvugulângoamiglo: taimâk akkerᴋut 6it naneroaᴋavingmit anijut atunit pitaᴋartuksauvut.

³⁴ Naneroaᴋaviublo nappajua ᴋingmingoangoaᴋartuksauvok sitamanik, paungangoangit nuvugulângoangillo ilagivlugit.

³⁵ Akerᴋuglo akilerêk atâgut paungangoaᴋartuksaugivok, akerᴋuglo akilerêk atâgut paungangoaᴋartuksaugivok, akerᴋuglo akilerêk atâgut paungangoaᴋartuksaugivok, akerᴋut 6it anijut naneroaᴋavingmit maliklugit.

³⁶ Paungangoat akerungillo tâmnatsainaujuksauvut: ilûnnane goldeojuksauvoᴋ katjuksimajomik.

³⁷ Âkᴋisûtingillo 7nit sanajaksarivatit, Âkᴋisurᴋovlugit ikomanginik, ᴋaumaivlutiglo sangmijamingnik.

³⁸ Takᴋersûtingillo argjaᴋautingillo goldeojuksauvut ilaᴋangitomik.

³⁹ Tâmna perᴋutingillo ilûnnaita sanajaksarivatit goldemit ilaᴋangitomit talentemit atautsimit. (Talente atausek paundititut 125ititut oᴋumaitigivalaivok.)

⁴⁰ Kamatsiarillo sanarᴋovlutit tâpkoninga ôktûte unertutaujok ilingnut ᴋakᴋame maliklugo.