Exodus 24 - Labrador Inuttitut Heritage Bible

Moses majorarᴋojauvok Sinaimut.

¹ Mosesemullo oᴋarpok: Majorarit Nâlekamut, igvit, Aronelo, Nadabelo, Abihulo, 70lo Israêlikut angajoᴋânginit; alivasiktomelo tuksiaritse.

² Moseselo kisime ᴋaglilertuksauvok Nâlekamut, tâpkoale ᴋanitomut ᴋaijuksaungilat; inuillônêt majorarᴋatigijaksaringilât.

³ Mosesiblo inuit oᴋautijartorpait Nâlekab oᴋausinginik tamainik, maligaksaniglo tamainik; inuillo ilûnnatik nipemut atausermut kiovut, oᴋarlutiglo: Nâlekab oᴋauserijangit tamaita piniaromavavut.

⁴ Mosesiblo Nâlekab oᴋausingit ilûnnaita aglakpait, uvlârarsukullo makipok, tunerguserviliorporlo ᴋakᴋaub atâne, napajuliorporlo 12nik, Israêlib kinguvârêngit 12 maliklugit.

⁵ Tiliklerporlo angutinik inôsuktunik Israêlikunit, tâpkoalo tunerguserput tunergutiksanik ôtaksanik tunergutiksaniglo ᴋujalijutiksanik tuktuvangnik Nâlekamut.

⁶ Aungitalo abvanga Mosesib tiguvâ kovilugolo pôgutaujanut; aublo abvanga serᴋerautigilugo tunerguservingmut.

⁷ Angerᴋatigêngnerublo aglangit tiguvait atuarsivlunelo inuit tussâtilugit: tâpkoalo oᴋarput: Nâlekab oᴋauserijangit tamaita piniaromavavut, nâlagomavlutalo.

⁸ Mosesiblo auk tiguvâ serᴋerautigilugolo inungnut, oᴋarlunelo: Ahâk tagga, tamadja angerᴋatigêngnerub aunga, Nâlekab ilipselo angerᴋatigêgutigijase oᴋautsit tamakkoa pivlugit.

⁹ Tavga Mosese, Aronelo, Nadabelo, Abihulo, 70lo Israêlikut angajoᴋânginit majorarput:

¹⁰ Israêliblo Gûdinga takovât: itigangitalo atâne pitaᴋarpok sorlo ujarᴋanik ᴋeblâlâjunik, sorlolo ᴋilaktut allaᴋidlartilugo.

¹¹ Tâpsomale aggane ililungilait Israêlikut angajoᴋânginut: taipkoale Gûde takonârpât, nerrilutiglo imerput.

¹² Nâlekablo Mosese oᴋautivâ: Majorarit uvamnut ᴋakᴋamut, tagvanêtuarlutillo: tunitjivigijomavagillo aglaksimavingnik ujarᴋanik, maligaksaniglo perᴋojaniglo aglaktamnik; ajoᴋertuijungnarᴋovlutit tâpkoninga.

¹³ Moseselo nikovipoᴋ kivgangalo Josua; Moseselo majorarpok Gûdib ᴋakᴋanganut.

¹⁴ Angajoᴋâllo oᴋautivait: Utaᴋigitse tamâne, tikitsiarilunuk: Takoitse, Aronelo Hurelo ilipsingnêpuk: pitjutiksaᴋartoᴋarpat, tâpkungnunga ᴋaituinarle.

¹⁵ Moseselo majorarpok ᴋakᴋamut, nuvujablo ᴋakᴋak ulikpâ.

¹⁶ Nâlekablo pinnarnarninga ᴋakᴋame Sinaime ineᴋarpok, nuvujablo ulikpâ uvlunik 6inik: Uvlullo 7ingane ᴋaigarsukpok Mosesemut nuvujab iluanit.

¹⁷ Nâlekablo pinarnarningata tautuᴋapoᴋ sorlo ikomatut nungutsijotut ᴋakᴋaub ᴋângane Israêlikut ijinginut.

¹⁸ Moseselo nuvujab iluanut iterpok, majorarlunelo ᴋakᴋamut: Moseselo ᴋakᴋamêpok uvlunik 40nik unnuaniglo 40nik.