Exodus 23 - Labrador Inuttitut Heritage Bible

Perᴋojat maligaksallo sunatuinait.

¹ Unipkausiksaliortuksaungilatit mikseᴋârtôlungitomik; aggatit ilautailitikit idluitulijunut kigligiudjijôjomavlutit nalâgôngitomik.

² Inugasaksuit maligaksarilungilatit idluitulijomavlutit; idluarsaivingmelo kiojuksaungilatit idluarnek muminasuaromavlugo inuit unuktut taimailiormata.

³ Inuglo aklujok nertoraksarilungilat akkerartorninga pivlugo.

⁴ Omigijivit tuktuvaᴋotinga siuterᴋortojoᴋotingalônêt tammaumajok naipigungne uttertitaksarivat tâpsomunga.

⁵ Ilingnik omisuktub siuterᴋortojoᴋotinga ochosimajok nangmartame atâne takogungne, ikajortailigosugalloarungne ikajoraksarivat.

⁶ Idluarnek sangutitaksarilungilat patangajomit erᴋartortaulertilugo.

⁷ Ungasigit pingitsertornermit nalâgôngitomit; pasijaksaungitullo idluartullo toᴋoniarnagit, idluitut idluarneraromanginapkit.

⁸ Tunergusianiglo tigusijuksaungilatit: tunergusiat tautuktut tautungitingmagit, idluartublo oᴋausingit mumikpait.

⁹ Takorngartarlo oᴋumaiksartitaksarilungilat: takorngartaub ômatinga ilitarigapsiuk, ilipse takorngartaulaurapse nuname Egipteneme.

¹⁰ Jârit 6it kingorlerêklutik nunat karngavigijaksarivat paungangillo katersorlugit:

¹¹ Jârille 7ingane merngoersertitaksarivat ᴋikartilugolo, inôᴋativit aklujungit nerrijungnarᴋovlugit; tâpkoalo amiakôtitangit ômajut naternamêtut nerrijaksarivait. Taimailiorvigijaksarivallo perorsêvit vaineliksatalik perorsêvillo orᴋsuktalik.

¹² Uvlut 6it kingorlerêklutik, suliaᴋartuksauvotit, uvlullo 7ingane merngoersertuksauvotit, tuktuvait siuterᴋortojuillo merngoerserungnarᴋovlugik, kivgavillo arnab erninga, tujormiarlo nakokserᴋovlugik.

¹³ Tamaitalo oᴋauserijakka ilipsingnut nâlaksigik: gûdillo asima atingit erᴋaumaniarasigik, ᴋanernillônêt tusartauniaratik.

¹⁴ Pingasuertorlutit jâreme uvloksiorviksiortuksauvotit uvamnut.

¹⁵ Uvloksiorvik sêrnarsauteᴋangitunik ᴋakᴋôjaktorvik uvloksiorutigijaksarivat: ᴋakᴋôjaktortuksauvotit sêrnarsauteᴋangitunik uvlunik 7nenik, sorlo perᴋogapkit, takᴋiub Abibib naliuningane: tâpsomane anilauravit Egiptenemit: tunergutiksalijaranelo sakᴋertoᴋartuksaungilak sâmne:

¹⁶ Uvloksiorviglo sulinivit paungangita sivorlerpât, karngasortavinivit perorsêvingnut, katersivingat: uvloksiorviglo katersivik, jârib nâningane naliutijok, perutsiatit perorsêvingnit katersorêrungne.

¹⁷ Pingasuertorlutik jâreme angutitit ilûnnatik sakᴋijârtuksauvut Nâlekab Gûdib sângane.

¹⁸ Uvamnut tunergutaujub aunga tunergutiksarilungilat ilaᴋartilugo ᴋakᴋôjamik sêrnarsautelingmik; uvamnullônêt tunergutaujub orᴋsunga ᴋomergutaujuksaungilak uvlâk tikidlugo.

¹⁹ Nunavit perortungita sivorlerpângita ânanaunerpângit âtaksarivatit Nâlekab Gûdivit iglunganut. Tuktungajoarak amâmaktok sulle igajaksarilungilat.

²⁰ Ahak, sivunerne Engele tilijomavara, saputjerᴋovlugo ilingnik apᴋome, tikitilutillo iniksaliarimajamnut perᴋovlugo.

²¹ Ileragiuk, nipingalo nâleklugo, sinaungasarniarnagolo; tappanise isumagijungnairniangimagit: atera tâpsomanêngmat.

²² Nipingale nâlatsiarungne, piniarlutillo tamainik oᴋauserijamnik, omisukteojomavunga omigijingnut, akkerartorteovlungalo akkerartortingnut.

²³ Engelima sivorlerniarpâtit, tikitilutillo Amoriterinut, Hetiterinullo, Perisiterinullo, Kânaaniterinullo, Heviterinullo, Jebusiterinullo; tâpkoalo kippigomavakka.

²⁴ Tâpkoa Gûdingit pâmaktervigijaksaringilatit kivgartornagillo, piniarningillônêt malingnagit; ochomariktitaksarivatille, gûdingoangillo okpikâtilugit.

²⁵ Nâlegarlo Gûdise kivgartoraksarivase, tâpsomalo nerᴋiksatit imiksatillo saimartitsomavait; ᴋanimaserillo pêjaromavakka akunapsingnit.

²⁶ Serᴋomitsijoᴋaromângilak piaraksamingnik, ᴋitorngisuitoᴋaromâranelo nunangne; Uvluksavillo unurningit nâmaksititsomavakka.

²⁷ Sivôranek uvamnik tilijomavara sivunerne, inuillo ilûnnaita tikilârtatit aseroromavakka, omigijitillo ilûnnaita tunutitsomavakka ilingnik.

²⁸ Igupsaksuillo tilijomavakka sivunerne, tâpkoa Heviterit, Kânaaniterillo, Hetiterillo ᴋemâtilârpait sivunernit.

²⁹ Jâreme atauserme ᴋemâtitsomangilakka sivunernit, nuna inuerutjaudlaroarmat, ômajullo naternamêtut unuksidlaroarmata ilingnut.

³⁰ Naleᴋârdlutik ᴋemâtitsomavakka sivunernit, unukserᴋârtinak nunalo kingormgutilugo.

³¹ Kigleᴋartitsomavagillo imarbingmit, suvlolingmit Filisterit imarbinganut, sunaᴋajuitomillo kôngmut: nunab inungit tunijomagapkit aggangnut; ungorlârpatillo sivunerkut.

³² Tâpkoa gûdingillônêt angerᴋatigijaksaringilatit.

³³ Ineᴋartuksaungilat nunangne idluitulitidlaroarmatit uvamnut: tagva gûdingit kivgartorungne, tamanna nigarniutitut ilingnut ilinganajarmat.