Exodus 22 - Labrador Inuttitut Heritage Bible

Perᴋojat maligaksallo sunatuinait.

¹ Inuk tiglikpat tuktuvangmik saugarmiglônêt, toᴋodlugolo niorvgutigilugolônêt, tauksêjuksauvok tuktuvangnik tallimanik tuktuvangmut atautsimut, saukaniglo sitamanik saugarmut atausermut.

² Tigligomajok naipitaukpat itârasuartilugo, anaujaukpallo toᴋorᴋovlugo, aungmik kovijaujoᴋartuksaungilak tâmna pivlugo.

³ Seᴋinek nuisimakpat tâpsomunga, aune pisiarijaksarivâ, tigligarijane uttertitaksaringmagit; sunaᴋangikunele niorvgutigijaksauvok tiglingnine pivlugo.

⁴ Tigligak ômavlune naipitaukpat aggangine, tuktuvaungmangât, siuterᴋortojorlônêt, saugarlônêt, maggoertorlugo akkileraksarivâ.

⁵ Inub perorsêvik vaineliksataliglônêt nerrijautikpago, nergjutinelo tagvungautikpago nerrerᴋovlugo inub asime perorsêvingane, perorsêvingme ânanauninga vaineliksatalingmelônêt ânanauninga tauksiutijaksarivâ.

⁶ Ikoma ikoalakpat, ukpigaillo ikilugit, ᴋakᴋôjaksallo katitat, ᴋakᴋôjaksallônêt sule perortut, perorsêviglônêt, ikiᴋataurᴋovlugit, ikitsijub akkileraksarivait.

⁷ Inub inôᴋatine tunitjivigiguniuk kênaujanik perᴋutiniglônêt piulimajaurᴋovlugit, inublo tâpsoma iglunganit tigliktaukpata; tigliktok naipitaukpat akilêle maggoertorlugo.

⁸ Tigliktorle naipitaungipat, iglub angajoᴋânga âtaujuksauvok idluarsaijunut, nautsertortaurᴋovlugo aggane isalaungmangâgit inôᴋatime perᴋutinginut.

⁹ Inub inôᴋatine pasilerpago nâmangitulinermik sunamik, tuktuvak, siuterᴋortojorlônêt, saugarlônêt, annorâllônêt, asiosimajullônêt sunatuinait pasijutaugalloarpata, tamarmik pitjutingit âtaujuksauvut idluarsaijunut; idluarsaijullo pasijangat akilêjuksauvok maggoertorlugo inôᴋatiminut.

¹⁰ Inub inôᴋatine unertutjivigikpago siuterᴋortojomik, tuktuvangmiglônêt, saugarmiglônêt, sumiglônêt nergjutemik, piulimajaurᴋovlugo; unertutausimajok toᴋokpat, akᴋunartaukpallônêt, aularutijaukpallônêt, takonârtoᴋartinago:

¹¹ Tâpkoa angerᴋatigêmariktuksauvuk Nâlekamut, taipsoma aggane isaktilaunginamigit inôᴋatime perᴋutinginut; perᴋuteliublo tamanna nâmagijaksarivâ, ipsomalo tauksigaksaringilâ.

¹² Tigliktaukpalle tâpsomangat tauksigaksarivâ inuanut.

¹³ Alliktortaukpat âliuk nalonaijautigivlugo, alliktortarlo tauksitaurᴋojaksaringilâ.

¹⁴ Inuglo atarsikpat sunamik inôᴋatiminit, akᴋunartaukpallo toᴋokpallônêt inua tagvanêtinago, tauksigaksarivâ.

¹⁵ Inuatale najorpago tauksigaksaringilâ, atartortaukpat kênaujanut, atautimut ᴋailaukpok.

¹⁶ Inublo uigasuk aipaksarilungitane uerisarpago tutiklugolo singairᴋovlugo, aiparijaksarivâ.

¹⁷ Atâtangatale panine ᴋippilûtigimarikpago tâpsomunga, taimna akilêjuksauvok kênaujanik, sorlo uigasuit patangaititaujuteᴋariaᴋarningititut.

¹⁸ Arnak angakkok inôrᴋojaksarilungilat.

¹⁹ Naliata nergjute tutikpago (uvineᴋaᴋatigijomavlugo) toᴋotaksauvok.

²⁰ Tunergusertok Gûdit nallianut, Nâlegaujotôlungitomut, aserortaumariktuksauvok.

²¹ Takorngartak nakêlititaksarilungilat oᴋumaiksartinagolo; takorngartaulaurapse nuname Egipteneme.

²² Kapiasuktitsijuksaungilase uigarnerit nallianik, iliarsungmiglônêt.

²³ ᴋanorlônêt kapiasuktigungne, unneksiorvigikpangalo, tusaromadlarpunga nipliarninganik;

²⁴ Ningaumajârneralo ônarsilârpok, toᴋotsomavapselo saviksoarmut; nuliaselo uigarniolârput, ᴋitorngaselo atâtairlârput.

²⁵ Inuᴋotima ilangat aklujoᴋ ilingnêtok atartortigungne kênaujanik, ilingavigijaksarilungilat kênaujaniaromajotut, akilêtitaksarilungilat atautemik.

²⁶ Tigusiguvit asivit annorânganik tauksiutiksautilugo, utertitaksarivat tâpsomunga seᴋinek nipilerᴋârtinago;

²⁷ ᴋepituarivâ taimna, matuksarilugo uviningminut: sumik usingasiksaᴋarniarᴋâ? Imaᴋâ nipliarvigilârpânga, tusaromavaralo; nâpkigosuktôgama.

²⁸ Idluarsaijut mitautigijaksaringilatit, inôᴋativillo angajoᴋângit oᴋarnerlûtinagit.

²⁹ Mulludlartuksaungilatit paungavit innertut, imiksavillo sivorlerpângit tunerguserilugit; ernivillo angajuklingat tunijaksarivat uvamnut.

³⁰ Taimâktauk tuktuvatit saugatillo taimailiorvigijaksarivatit; uvlunik 7nenik anânaminêtuksauvok, uvlulle 8ingane tunijaksarivat.

³¹ Ivsornaituksauvose uvamnut: nerrijuksaungilaselo nerᴋêjamik ômajut naternamêtut aliktortanganik; egitaksarivase ᴋingminut.