Exodus 21 - Labrador Inuttitut Heritage Bible

Perᴋojat maligaksallo sunatuinait.

¹ Tamadja tagva maligaksat unertutigijaksarijatit tâpkonunga.

² Pisiniaruvit kivgamik angumik Ebrêereojomik, jârit 6it nâvlugit kivgartortuksauvoᴋ: 7inganele aulartuksauvok akilênane kivgaujungnairlune.

³ Inutôvlune itilaukpat inutôvlune aulartuksauvok: aipaᴋalaukpalle, nuliangata aularᴋatigijaksarivâ.

⁴ Angajoᴋângatale tunitjivigikpago nuliamik, tâmnalo ernertârpat panitârpallônêt, angajoᴋâb nuliak ᴋitorngangillo perᴋutiginiarpait, tâmnalo inutôvlune aulartuksauvok.

⁵ Kivgarle nalonangitomik oᴋarpat: Angajoᴋâra aiparalo ᴋitorngakkalo ungagivakka: kivgaujungnairomangilanga:

⁶ Angajoᴋângata tikititaksarivâ idluarsaijunut; tikititaksarivâlo upkoarmut, upkoablônêt napajuanut, angajoᴋângatalo siutinga puttoraksarivâ puttorutemut; tâmnalo kivgartoraksarivâ soraijuitomik.

⁷ Inuble panine niorvgutigikpago anânaurᴋovlugo, tâmna anijuksaungilak sorlo angutit kivgat pingmata.

⁸ Nâmaksititsilungipat angajoᴋâminik tigujiminik nangminerijomavlugo, tâpsoma utertitaksarivâ akimut: niorvgutiksarilugole inôᴋatigênut takorngartanut pitsartuneᴋartuksaungilak, uivêrilauramiuk.

⁹ Ernerminulle aipaksautisimaguniuk, iliorvigijaksarivâ sorlo paninne iliorvigigamigit.

¹⁰ Nuliarnigune tâpsoma sanilianik, mikitlijuksaungilaᴋ tâpsoma nerᴋiksanginik, annorâksanganiglo, nuliablo piksanginik.

¹¹ Tamakkoale pingasut piniarutigingigunigit tâpsomunga, tagva tâmna anijuksauvok ᴋelarudjartauvlune akkilênanelo.

¹² Anauniktok inungmik toᴋodlugo, tâmna toᴋotaksauvok.

¹³ Inugle terliarsilungipat, Gûdible pitipago agganginut, tagva unertutitsomavagit ᴋemâviksariniartanganik.

¹⁴ Inuble pijarellune saniline tikipago pingitsertorlune toᴋotsomavlugo, tâmna tigujaksarivat tunerguservimnit aglât, toᴋotauᴋovlugo.

¹⁵ Anauniktok atâtaminik anânaminiglônêt, tâmna toᴋotaksaudlarpok.

¹⁶ Tigliktorlo inungmik niorvgutigilugolo, ubvalo nagvârtaukpat aggangine, tâmna toᴋotaksaudlarpok.

¹⁷ Oᴋarniluktorlo atâtaminik anânamimiglônêt, tâmna toᴋotaksaudlarpok.

¹⁸ Angutillo ningautigunik, aipangatalo aipâ milorpago ujarangmut, tiglukpagolônêt, toᴋolungipat, inangavingminele nalangajuksaukpat:

¹⁹ Makkimikpat anilunelo ajaupialijarlune, milornilauktok tâpsominga pidlaraksaungilaᴋ: kisianele akkilêjuksauvok taipsoma sulitailititauninganik, âᴋiktaumariktitaksarivâlo.

²⁰ Inuble kivgane angut arnarlônêt anaukpago ajaupiamut, tâmnalo toᴋokpat agganginut, pidlaraksaudlarpok.

²¹ Kisianele ᴋuggujaukpat uvlormik atautsemik maggûngniglônêt, pidlaraksauniangilaᴋ; perᴋutigigamiuk.

²² Inuit ningautigunik, arnarlo singaijok akᴋunarlugo, singainga pêrᴋovlugo, ᴋanoetomigle maliktoᴋartinago: pidlartaujuksauvok arnab uingata pijomajanga maliklugo; akkilêjuksauvorlo idluarsaijut nâmagijanganik.

²³ ᴋanoetomigle maliktoᴋarpat, tagva tunitjijuksauvotit inôtsemik inôtsemut,

²⁴ Ijemik ijemut, kigumik kigumut, aggangnik aggangnut, itiganik itiganut,

²⁵ Ônermik ônermut, ikkemiglo ikkemut, tiglûjarmiglo tiglûjarmut.

²⁶ Inublo kivgane angut kivganelônêt arnak tiglukpago ijingagut, ije aserorlugo; kivgaujungnaivlune aulartitaksarivâ ijine pivlugo.

²⁷ Tigluklugolônêt kivgane angut kivganelônêt arnak kigutairpago, kivgaujungnairlune aulartitaksarivâ kigutine pivlugo.

²⁸ Tuktuvaublo angut arnarlônêt nakjungmigarpago toᴋodlugo, tuktuvak milortaujuksauvok ujarᴋanut, nerᴋingale nerrijaksaungilak; tuktuvauble inua pidlaraksaungilak.

²⁹ Tuktuvagle nakjungmigarsôngolaukpat sivorngane, inualo ᴋaujititaulauᴋpat tamattominga, parngnanairsorlaungipagolo, tâmnale toᴋotsigune angumik arnarmiglônêt; tuktuvak taimna miloraksauvok ujarangnut, inualotauk toᴋotaujuksauvok.

³⁰ Kênaujanigle akilêrᴋojaugune tagva tunitjijuksauvok ilijivionermitut inôsine pisiarijomavlugo.

³¹ Nakjungmigarsimamangât ernermiglônêt paningmiglônêt maligaksak tamanna maliklugo piniarviojuksauvok.

³² Tuktuvaub kivgak angut kivgarlônêt arnak nakjungmigarpago, kivgab angajoᴋânga tunitjiviojuksauvok silberemik sêkeletut 30tut. (Sêkele atausek 50 censustut akkitutigingoarpok.)

³³ Inublo imektarvik angmarpago, inublônêt imektarvik poagijarpago, matunagolo, tagvungalo tuktuvak siuterᴋortojarlônêt nakkarpat;

³⁴ Imeᴋtarviub inuata akileraksarivâ, tunitjivlune kênaujanik taipkoa inuanut, ᴋigdlorlo pigijaksarivâ.

³⁵ Inuille naliata tuktuvangata asime tuktuvanga akᴋunarpago toᴋodlugo, tuktuvak ômajok niorvgutigijaksarivât, akingalo avilugo; ᴋigdlorlo avigaksarivâttauk.

³⁶ ᴋaujijaukpallônêt tuktuvak nakjungmigarsôngolaungmat sivorngane, inuatalo parngnanairsorlaungipago, tuktuvangmik tauksêjuksauvok tuktuvangmut; ᴋigdlorlo nangminerijaksarivâ.